VAEGA 146

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

****************************************

Na gata mai le tatou Fagogo i le vaiaso ua mavae, ina ua toe fo’i le tamaloa o Alesana ma lona atalii o Iakopo, ua le manuia le la taumafaiga i lena aso, e su’esu’e le tamaloa o Semi Tagaloa e uiga i le faalavelave na tupu a’o latou talavou, lea na molimau ai Semi mo matua o le tamaititi na maliu, ma i’u ina loka ai Alesana i lona talavou.

O le mana’o sa ia Alesana, o le fia talanoa ia Semi e saili le mafuaaga sa molimau pepelo ai mo matua o le tamaititi na maliu.  Ae ua mautu i le mafaufau o Alesana, ina ua mae’a ona o la talanoa ma Semi, po o le a lava sana tala e toe fai i le tamaloa, e le mafai ona toe suia le molimau a Semi, ona ua manumalo ma ua mautu ia faatosinaga o tupe ma ‘oa, i lo le mea moni.

O le mea lea na ia liliu atu ai i lona atalii o Iakopo ma ia fautuaina Iakopo faapea, “Iakopo, ou te mana’o e te folafola mai, po o le a se mea e tupu i lou olaga, ia aua lava ne’i e fa’amuamua tupe ma ‘oa o lenei lalolagi, ae ia avea oe ma se tagata faamaoni ma le alofa,”

Ua alu gugu le taavale a Iakopo ma si ona tama i le fale, ina ua le i’u manuia si a la taumafaiga ina ia liliuina le molimau a le tamaloa o Semi.

Ma ina ua o la taunu’u i le fale, sa leai se tala a le tamaloa o Alesana i seisi o le aiga, ae ua na ona fa’asasa’o i totonu o lona potu ma tapuni mai le faitoto’a.

Ae ua tago atu le teine o Ruta ma toso mai le lima o lona tuagane o Iakopo ma toso atu i totonu o le umukuka ma fa’asaofa’i i le nofoa ma fesili atu loa iai, “O le a le mea na tupu?”

“Sole, ae a pe a aumai muamua se ipu vai ona taso’o mai ai lea o au fesili?” o le tali atu lea a Iakopo ma toe tu i luga i le savali i le pusa aisa.

“Se, o le a le mea na tupu? E te le’i lua maua foi Semi? O le mea lena ua le fiafia ai Dad?” o le taso’o atu lava lea o fesili a Ruta taumulimuli atu i lona tuagane, a’o alu e aumai sana ipu vai aisa.

“Ruta, e sili ona toe saili seisi auala e mafai ona tatou fesoasoani ai ia Dad.  Sa le’i manuia le la talanoaga ma Semi,” o le tali atu lea a Iakopo i lona tuafafine.

Ua saofa’i a’e nei i lalo ia Ruta ma faapea mai, “O le mea la le la ua le fiafia ai Dad, kalofae.”

[E FAIA PEA]