VAEGA 20

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 20.

***************************

“E te valea?  O la e vaavaai uma mai ma’i ma le aufaigaluega?” o le ‘ava’avau atu lea a Naomi i le alii fomai o Taki, a’o toso mai lava lona lima e Taki i fafo mai i le potu sa galue ai Naomi.

“Sau ta o e te faasino mai le tou fale,” o le tali atu lea a le alii fomai.

“E a? O lena ua uma na faasino atu le mea e iai le matou fale.  E le o oe se tamaititi,” o le tali ita mai lea a Naomi.  “Ma e le mafai ona ou alu i le taimi nei, o lea ou te faigaluega.  E faigofie lava ia outou fomai, ae e le tutusa ma tulafono a tausima’i.”

“Aua e te popole o lea o le a ou faia lau faanoi,” O le faapea mai lea a Taki ma tago lava toso ane lana telefoni feaveai ma vili ma talanoa i le tagata i leisi itu o le telefoni.

“Vaai lau susuga i le alii fomai, ou te le mana’o e tia’i la’u galuega,” o le tala atu lea a Naomi.

“E mafai ona ou totogia ou itula ia o le a ta o ai,” o le tala lea a le alii fomai na toe sui ai le pupula a Naomi ma faapea atu ai loa, “Ia faatali so’u alu e aumai la’u ato.”

Ua agai atu nei le taavale a le alii fomai ma le tamaitai tausmai i le a’ai o lo o iai le fale o le aiga a Naomi.

E alu lava le taavale a le toalua lea, ae ua matuai lava seisi e pisa.  Ua nofo lava le tagata ma faasolo ona mafaufauga.

O lo o mafaufau Naomi pe na faapefea ona o’o mai i totonu o le taavale a le fomai fou a le latou falemai, ae o lo o mafaufau Taki agai i le ulugalii lea o le a o latou feiloai.

Ua taunuu le faigamalaga a Naomi ma Taki i le fale o le aiga o Naomi ma na faate’ia matua o Naomi ina ua vaai mai i le oso atu i fafo o Naomi mai i le taavale a le fomai.

“Oi, ua e vave manava?” o le fesili atu lea a Tanielu i sona afafine.

“Ioe, ua vave faamanava a’u e le pule lua o le matou falemai,” o le tali atu lea a Naomi ma faasesepa ona mata i le alii fomai.

“E faamalie atu ua ou ave’esea si a oulua alo mai i lana galuega, ae sa ou manaomia seisi e faasino mai ia te a’u le fale.  O lo’u igoa o Taki,” o le tali atu lea a le alii fomai i matua o Naomi.

“Ia o a’u o Tanielu, ae o se o’u to’alua lea o Eseta,” o le tali mai a le tama a Naomi ma tu’u mai lona lima e fia lulu lima ma le alii fomai.

Ae o le taimi lea, ua na o le tu o le alii fomai ma sioa atu i foliga o le tamaloa o Tanielu ma ona foliga ua mu atoa, e pei o le a tagi.  O le umi o le sioa a Taki ia Tanielu na avea ma mea ua fetilofa’i ai nei le ulugalii o Tanielu ma Eseta, ma le la tama o Naomi.

[E FAIA PEA]