Vaega 153

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi. Ae sagai mai loa, o le a toe sosoo atu le tatou Fagogo, “O OE O LO’U TAMA” i lona vaega e 153.

***************************************

Sa fa’ate’ia le teine o Naomi ina ua ia tatalaina le faitoto’a o le latou fale i lea taeao, ae o lo’o tu tu mai ai le ulugalii matutua mau’oa lea e ana le tamaititi lea ua maliu, lea e mafua ai le faamasinoga a le tamaloa o Alesana.

Ua fa’aulufale mai e Naomi le ulugalii i totonu o le fale ma taitai atu i la’ua i le potu malolo ma fa’asaofafa’i ai, ae ua ia savali atu i le umukuka, i le mea o fai ai le inuga ti a le latou aiga, ma fa’ailoa atu i ona matua, le ulugalii lea e i totonu o le potu malolo.

Na umi se taimi o saofa’i le tamaloa o Alesana ua na leiloa po o le a lana taga o le a fai.  Ae ua tu i luga ia le tamaitai o Ruta, aua o ia lea o lo’o fai ma loia a lona tama, ma ia savali atu i totonu o le potu malolo.

A’o savali ese le tamaitai o Ruta, sa ia faapea mai i lona tama, e fa’atali atu i totonu o le umukuka,  e aua ne’i alu atu i totonu o le potu malolo, aua e le mafai ona o latou talanoa ae lea e loma le faamasinoga.

Ae ua savali atu nei Ruta i totonu o le potu malolo ma fa’afesaga’i ma le ulugalii, ma ia fa’afeiloa’i atu ia i  la’ua.  Ma fesiligia ai le mafuaaga ua usupo atu ai le la asiasiga.

Ua faapea mai nei le toeaina, o la’ua na la o mai e fia talanoa ia Alesana.  Ae na faapea atu iai Ruta, e le mafai ona o latou talanoa ma lona tama, ona o lea e fa’agasolo le faamasinoga.

Ae ona o ia o le loia a lona tama, e mafai ona o la talanoa atu ia te ia.

Ua fetilofa’i le ulugalii ua le mautonu, ona faapea mai lea o le loomatua, “Na ma savalivali mai e talosaga lou tama, pe mafai ona ave i tua lana tagi.”

[E FAIA PEA]