Vaega 155

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O OE O LO’U TAMA” i lona

vaega e 155.

****************************************

Na avea le tali a le teine o Ruta ma tulaga na leotele ai le masu su a le loomatua.  Ma ua tula’i Ruta ma ia faapea atu i le ulugalii, “E faamalie atu, ae ua tatau ona ou alu e ave lo’u tama i le fale faamasino.”

Ua tutu i luga ia le ulugalii ma ta’ita’i atu e le toeaina ia lona to’alua i le faitoto’a ma na ia toe lilium ai ma faapea mai ia Ruta, “O lea sa iai le molimau na ona fa’amaonia le mea sa tupu.”

Ae tali atu Ruta, “O lea ua mafai ona o matou fa’amaonia le le moni ma le le sa’o o le molimau lena.”

Sa tu le toeaina ma pupula to’a mai ia Ruta ae ua toe faapea atu Ruta, “Ua mae’a ona talanoa lo’u tama ma le molimau, ma ua o matou talitonu sa fa’amalosia lena molimau.”

Ua liliu atu le toeaina ma savavali atu loa i fafo o le fale ma lona to’alua.

Ae ua toe savali mai Ruta i le umukuka i le mea o lo’o faatalitali atu ai ona matua ma nai ona tei.  Na ona o’o mai lava iai o Ruta, ia faapea atu i nai ona matua, “Maimau le taimi na o mai ai lea ulugalii.  Tatou o loa e sauni e tatou te o i le fale faamasino.”

O sina taimi mulimuli ane, ua faapea ona toe saofafa’i ia le tamaloa o Alesana ma lona afafine, le tamaitai loia o Ruta, i le pito i luma o le potu faamasino, e faatalitali le ulufale atu o le alii faamasino.

Ae o nofoa pito i tua, sa nonofo atu ai le fafine o Eseta, le to’alua a Alesana, ma leisi ana fanau e toalua, o Iakopo ma Naomi.  Ma sa faapea foi ona auai atu le alii fomai o Taki ma lona tina.  

Na va’aia e Naomi le toe toe a gau le ua o lona tuagane o Iakopo, i le tau fa lo solo, ma sa ia musumusu atu, “E le i sau Salome.”

Ua ulufale mai le alii faamasino ma ua tutula’i le mamalu o le aofia sa i totonu o le potu faamasino.

[E FAIA PEA]