Vaega 157

Taeao Manuia. Taeao Totoa, i le mamalu o le tatou aufaitau nusipepa i lenei taeao fou. Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana tausiga mamana, ia i tatou uma, ua mafai ai ona o tatou toe fesilafai i luma o nuu, ae le o tua o nuu, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapaau i le Lagi. Ae sagai mai loa, o le a toe sosoo atu le tatou Fagogo, “O OE O LO’U TAMA” i lona vaega e 157.

***********************************

Ua fa’ate’ia tagata uma i totonu o le potu faamasino, ina ua fesiligia e le alii faamasino ia le tamaitai loia o Ruta, po o iai ni ana molimau, e faamautu ai le mau a lona tama, po o le tamaloa o Alesana, ae tali mai se tagata mai tua, ma faapea mai, “E iai le molimau.”

Ua tau fai liliu uma tagata i le mea o sau ai le leo lea.  Ma sa fa’ate’ia le tamaloa o Alesana ma lona aiga, ina ua va’ai atu, i le tula’i mai o le tamaloa o Semi Tagaloa.

Le tamaloa lea sa tulituli e Alesana ina ia sau e fa’asa’o lana molimau lea sa fai muamua, i le taimi na tupu ai le faalavelave, a’o latou talavou.  Le alii o Semi lea sa iai foi i le fusuaga lea na maliu ai le atalii a le ulugalii mau’oa.

Ua avea le gase o totonu o le potu faamasino i le gugulu o tagata, ma tulaga na ta leotele ai e le alii faamasino lana samala, ma taumafai e toe fa’ato’a filemu le potu faamasino.

“O ai lau susuga?” o le fesili mai lea a le faamasino ia Semi.

“O lo’u igoa o Semi Tagaloa, ma ou te fa’atulou atu I lau susuga i le alii faamasino ona o lo’u fa’alavelave mai i taualumaga o lenei faamasinoga.  Ae o lo’o iai sa’u molimau e fia fai e tusa ai ma le fa’alavelave ua tu’ua’ia ai le susuga ia Alesana,” o le faamatalaga umi lea a Semi.

“Ia susu mai lou ava lea,” o le faatonuga lea a le alii faamasino ia Semi.  “Leoleo, fa’atauto ia le molimau lea.”

Ua savali mai nei Semi ma saofa’i i le nofoa molimau ma ua agai mai le leoleo o le potu faamasino ma le Tusi Paia, ma fa’atauto ai loa o ia, ina ia tautala i le mea moni ma le sa’o.

[E FAIA PEA]