Vaega 161

Taeao Manuia. Taeao Totoa, i le mamalu o le tatou aufaitau nusipepa i lenei taeao fou.

Tatou te tau fai sii le Viiga ma le Faamanu i le Silisili Ese, i Lana tausiga alofa ma Lana

tausiga mamana, ia i tatou uma, ua mafai ai ona o tatou toe fesilafai i luma o nuu, ae le

o tua o nuu, i lenei taeao fou. E faafeiloai atu foi i tina ma tama matutua ua mafai ona

aulia mai lenei taeao matagofie i le pule alofa a lo tatou Tapaau i le Lagi.

Ae sagai mai loa, o le a toe sosoo atu le tatou Fagogo, “O OE O LO’U TAMA” i lona

vaega e 161.

***************************************

Sa le’i iai se galuega lelei a le tamaloa o Alesana ma lona to’alua, o Eseta ma le latou aiga atoa, sa faia ina ua mae’a ona fa’ailoa mai e le alii faamasino, le lauina o lana fa’ai’uga i le aso Gafua o le vaiaso e soso’o ai.

O le fa’ai’uga o lena vaiaso, sa faapea ona vala’aulia ai e Alesana ma Eseta, ia le alii fomai o Taki ma si ona tina, ina ia latou faiaiga fa’atasi ae e le’i o’o i le aso Gafua lea e lauina ai le fa’ai’uga a le faamasinoga.

O le aso Toonai na fa’atulagaina e alu ai se tafaoga a le aiga atoa faatasi ai ma le alii fomai o Taki ma lona tina.  Ma na fa’ailoa atu iai e Alesana i le alii fomai, e ui lava ina sili atu le mautu o ia ma lona tina, ae o lo’o mana’o le tamaloa o Alesana e latou te totogia uma le latou tafaoga i lea aso.

Ona o lo’o iai se manatu ia Alesana ma le fafine o Eseta, o se auala lea e momoli atu ai le la agaga fa’afetai i le alii fomai o Taki, aua ana le seanoa o ia, ma lona sailiga o lona tama, semanu e le mafai ona maua e Alesana le lototele e taumafai ai e fa’asa’osa’o nei gasu uma, mai lona talavou.

Sa avea le pisi o le aiga mo lenei tafaoga, ma auala na mafai ona ave’esea ai o latou mafaufau mai i le faamasinoga i le aso Gafua.

Ma sa matagofie le tafaoga a le tamaloa o Alesana ma lona toalua o Eseta ma si a la fanau, o Ruta, Iakopo ma Naomi faapea le alii fomai o Taki ma si ona tina, i se motu e le mamao ese atu mai lo latou nu’u.

I le po o le aso Toonai ina ua mae’a le taumafataga a le aiga, sa o latou potopoto atu ai i luma o le faapaologa o le faletalimalo e fa’asaga tonu lava i le matafaga ma le sami, ma talatalanoa ai.

Ae na fa’ate’ia le tamaloa o Alesana ina ua tula’i le alii fomai o Taki ma ia faapea atu, “O lo’o iai se mataupu ou te fia talanoa atu ai i si o tatou aiga atoa.”

[E FAIA PEA]