VAEGA 162

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

**********************************************

Na gata le tatou Fagogo i le vaiaso ua mavae, ina ua alu se tafaoga a le aiga a le tamaloa o Alesana ma le fafine o Eseta, o si a la fanau e to’atolu o Ruta, Iakopo ma Naomi, se’i tau fa’amalolo mai ai o latou mafaufau mai i le lauina o le fa’ai’uga a le faamasinoga e tusa ai ma le Apili a le tamaloa o Alesana.

O le fa’ai’uga o le vaiaso lea o lo’o alu ai lenei tafaoga, ae o le aso Gafua o le vaiaso fou lea o le a lauina ai le fa’ai’uga a le faamasinoga.

Sa matagofie le tafaoga a aiga e lua ma ua o’o i le po o le aso Toonai, ae o le aso Sa e soso’o ai, e toe ta’ape ai le tafaoga.

Ua mae’a le taumafataga a aiga e lua, ona o latou faapotopoto lea i le faapaologa a le faletalimalo o lo’o tua i le matafaga, ma talatalanoa ai.

Ae na fa’ate’ia le tamaloa o Alesana ma le fafine o Eseta, faapea le tina o le alii fomai, o Taki, ina ua tu i luga ia Taki ma faapea atu, “E iai se mea lea ou te fia talanoa atu ai i si o tatou aiga.”

Ua le toe pisa le aiga atoa, ae ua tilotilo uma atu i le alii fomai.

“E o’o mai i le taimi nei, o lo’o avea ma se avega mamafa i lo’u mafaufau ia le tulaga ua tula’i mai ia Alesana, aua ana le seanoa lo’u naunau e fia iloa lo’u tama, ma lo’u o’o atu i totonu o le tou aiga, semanu e le toe save’u a’e i luga nei mea sa tutupu i na tausaga ua mavae,” o le faamatalaga amata lea a le alii fomai.

“O lea ou te fia fa’amaualalo atu ai i si o tatou aiga, aemaise lau susuga Alesana ia faapea le tina ia Eseta,” o a Taki lea.

“Ae e ui i lea, ou te fa’afetai lava ona ua mafai ai ona ou maua lenei avanoa ou te fa’amasani atu ai i si o tatou aiga.  Ma e avea a’u ma sui o si o’u tina, ou te momoli atu ai le agaga fa’afetai i lau susuga Alesana ma le faletua, faapea le nofoaalo, e tusa ai ma lo outou tausiga lelei o a’u ma le mafutaga mafana ua mafai ona tupu mai i le tatou fa’atasiga,” o le fa’aauau lea o le faamatalaga a le alii fomai.

“Ina ia fa’apu’upu’u se faamatalaga, e iai lava sa’u fesili e tasi, ou te fia fesili atu ai ia Alesana.  E mafai ona avea oe ma o’u tama?” o le fesili lea a Taki.

[E FAIA PEA]