VAEGA 164

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

**********************************************

Na gata mai le tatou Fagogo i  le vaiaso ua mavae, ina ua fa’ailoa atu e le alii fomai ia Taki i le tamaloa o Alesana ma lona toalua o Eseta, lona mana’o ina ia faaipoipo atu i le ui o le la fanauga, le tamaitai o Naomi.

Sa faapea ona taunu’u ai faamoemoega a le alii fomai, ina ua amata lona sailiga o lona tua’a, ina ua maligi loimata o le tamaloa o Alesana ma fa’ailoa atu ia Taki le fa’atumulia o lona agaga i le fiafia, i le avea o ia ma ona atalii.

Ma sa faapea ona tu’uina atu e Alesana ma Eseta le la fa’amanuiaga ia Taki ma le teine o Naomi.

Na ta’ape fiafia le tafaoga a le aiga o Alesana faapea ma le alii fomai o Taki ma si ona tina, e tapena le fa’ai’uga mai i le faamasinoga i le aso Gafua o le vaiaso fou.

I le taeao o le aso Gafua, ae e le’i agai atu le tamaloa o Alesana ma le fafine o Eseta ma le la fanau to’atolu o Ruta, Iakpoo ma Naomi, i le fale fa’amasino, sa valaauina e Alesana lana fanau i totonu o le potu malolo.

Ina ua potopoto mai lana fanau, sa faapea ona toe momoli atu le agaga fa’afetai o le tamaloa o Alesana i si ona afafine o Ruta ona o le tu’ua o lana galuega, ae tu’uina atu lona taimi atoa, e finauina ai le mataupu a lona tama.

Ma sa faatonuina ai e Alesana ia le teine o Ruta, po o le a lava le fa’ai’uga a le faamasinoga i lea aso, o le a latou taliaina.  Ma o lona mana’o, ina ia toe fo’i Ruta e faigaluega.

Ona liliu atu lea o Alesana i si ona atalii o Iakopo ma ia fa’aleoina foi lona agaga fa’afetai ia Iakopo ona o lona le malolo i le fesoasoani malosi i nai ona matua.  Ma sa fa’ailoa atu e le tamaloa o Alesana i lona atalii e faapea, ua mae’a ona o la talanoa ma le tina o le aiga, le fafine o Eseta ma ua o la manana’o ia Iakopo, ina ia alu e toe saili mai le tamaitai o Salome ma toe fa’alelei le la faigauo.

Na maligi loimata o Iakopo ma ia faapea atu i ona matua, “Fa’afetai lo oulua faitama alofa.”

Na mulimuli le faamatalaga a Alesana i si ona afafine laitit ma ia fa’ailoa atu ia te ia, lo la fiafia ma lona tina, ona o le la’asaga fou o lona olaga, lea o le a o latou agai atu iai.  “Po o le a lava le faaiuga a le faamasinoga, ou te talia ma le loto malie, ona ua faamalieina lou agaga i le faamanuiaga ua maua e le tatou aiga, i le avea o Taki ma se tasi o le tatou aiga.”

Ua mae’a ia upu a le tamaloa o Alesana i lana fanau ma ia opo mai lona to’alua ma ia faapea atu loa, “Tatou o.”

Ina ua savali mai i totonu o le potu faamasino ia le alii faamasino, sa tau puni le manava a le tamaloa o Alesana.  Ae ua a’apa atu lona afafine o Ruta ma u’u mau lona lima.

Ua amata le tautalaga a le alii faamasino, ma i’u ina ona faapea mai, “Ua malie le faamasinoga i molimau ua fa’alogo iai ma ua talitonu le faamasinoga, na molia sese ia le susuga ia Alesana a’o talavou o ia.  O lea ua faia ai le fa’ai’uga a le fa’amasinoga, o le a solofua uma tu’ua’iga sa faia e faasaga ia te ia.”

[TOE TULIMATA’I MAI LE TATOU FAGOGO FOU I LE VAIASO FOU]