VAEGA 21

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i totonu o Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

**********************

Na gata mai le tatou fagogo i le vaiaso ua mavae ina ua agai atu le alii fomai o Taki ma le tamaitai o Naomi, i le fale o le aiga o Naomi, e talanoa ma matua o Naomi e uiga i le potu lea o lo o mana’o Taki e nofo totogi ai.

I le taimi na feiloai ai Taki ma le tamaloa o Tanielu ma le fafine o Eseta, na maitau e Naomi le fai o sina umi o sioa lava le alii o Taki i lona tama, ae o lo o tu’u atu le lima o Tanielu e la te lulu lima.

Ua fai sina me’ia o Tanielu ma ia toe tu’u mai lona lima ma tilotilo atu i lona toalua ma lona afafine, ua na leiloa leisi ana taga o le a fai.

“Taki,” o le fai atu lea a Naomi.  “Lau susuga i le fomai.”  Na pei o se tagata o lo o faate’i mai i sana miti o lo o fai, le te’i a le alii fomai ma faapea mai, “Oi, faamalie atu.  Sa le’i lelei la’u moe anapo.  Ua fai lava sina o’u vaivai.” 

Ua featai le tamaloa o Tanielu ma si ona toalua ma lona afafine.  Ua faapea atu Tanielu, “E leai se mea e afaina ai.  Ae o e fia tagai i le potu?”

“Oi, ioe, faamolemole lava,” o le tali mai lea a le alii fomai.

E savavali ese atu ia Tanielu ma Taki e o e ave le alii fomai e va’ai i le potu, ae ua tutu le fafine o Eseta ma lana tama o Naomi ma tilotilo atu i le savavali ese atu a le toalua lea.

Ua faapea mai Eseta i si ana tama, “Matuai uiga ese”.  Na tali mai Naomi, “Ae sa’o a?”

Ua savavali atu nei le to’alua lea agai i le faleaiga, ae o lo o alu a o la mafaufau i le mea lea na tupu ia Taki ma Tanielu.

Ua mae’a ona vaai Taki i le potu ma na maitauina e Tanielu le tupu so’o o le mea lea na tupu i le la fa’ato’a feiloaiga ma le alii fomai, e tau faate’i i nisi taimi, ae o lo o sioa mai lava i ona foliga.

Ua faapea atu nei Tanielu I le alii fomai, “E tatau ona fai faalelei sau malologa ananei.  E le aoga lou gasegase mai ae o lo o faalagolago le toatele o le atunu’u ia te oe.”

Ua ata’ata le alii fomai ma faapea atu, “Faafetai lava i lou manatu mai.”

Ua savavali mai nei i lalo ia le tamaloa o Tanielu ma le alii fomai, ae valaau mai loa le fafine o Eseta, “Susu mai loa o lea ua vela le kuka o le afiafi a le aiga.”

Na vaaia le le mautonu o le alii fomai, ae tago atu le tamaloa o Tanielu ma taitai mai agai i le faleaiga ma faapea atu, “Susu mai e fai sau taumafataga ona e alu ai lea e fai faalelei sau malologa.”

Ua le toe iai seisi tala a le alii fomai ae ua savali atu loa i le laulau o lo o nofo mai ai Naomi, ma saofai loa i lalo.

E FAIA PEA!