Ads by Google Ads by Google

O OE O LO’U TAMA?


[ata: SN]

VAEGA 24

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 24.

*******************************

Na usu le tamaitai tausima’i o Naomi i lana galuega i le taeao na soso’o ai, ae o lo o alu lava lona mafaufau i le mea na tupu anapo i le taimi o le latou meaai ma le alii fomai o Taki.  O lo o talitonu Naomi, sa maligi loimata o le alii fomai i le taimi o le latou meaai, lea na tulai faatopetope ai ma su’e le latou faletaele.

E fai lava la galuega a Naomi i lena aso, ae taumafai lava e tau autilo pe na te iloa atu, pe fetaui foi ma le alii fomai o Taki.  Ae o le taimi lea, e le o iloa atu e Naomi, le maitau mai o ia e lana supavaisa fou, le tamaitai o Salome.

Aua o le taimi foi lea, o lo o fealuai lava Salome ae tau mafaufau lava po o fea e masani mai ai ia Naomi.

Ua latalata i le taimi o le a manava ai Naomi, ae faate’ia o ia i le tu atu o lona tuagane, le alii o Iakopo.  

“O fea sa e alu iai?” o le fesili lea a Naomi i lona tuagane.

“O lea na iai nai a’u pisinisi laiti i le falemai, lea ua ou sau ta te o faatasi i le fale,” o le tali lea a Iakopo.

“Seki,” o le tali atu lea a Naomi i si ona tuagane.  “Ia alu la e faatali mai i nofoa la e i luma, se’i uma o’u alu atu ta o faatasi i le fale.”

Ua alu atu nei Iakpo i le potu malolo pito i luma o le falemai ma nofonofo mai ai, ae ua alu Naomi e faamae’a ona tiute.

E le i umi lava ona saofai Iakppo i lona nofoa, ae sese’e atu ma le tagata i ona tafatafa.

Na fa’ate’ia Iakopo i le ea ifo i luga, o le tamaitai o Salome, le supavaisa fou a le vaega Tausimai o le falemai.

“Auoi, Iakopo, o a mai oe?” o le fesili atu lea a Salome ma ata.

“O lea e manuia lava faafetai,” o le tali tautoa’i mai lea a Iakopo.  Manatua foi, e matua Iakopo ia Salome, ona sa vasega fa’atasi ma Naomi.

“E te le manatua a’u, a ea?” o le tala a Salome, ma soso atu lava ia Iakopo.  “Ae ou te manatuaina oe.  Sa tatou a’o’oga faatasi i le aoga a le tatou itumalo.  Sa ta so’o tausaga.  O a’u o Salome.”

“Oi, malo le soifua Salome,” o le tali mai lea a Iakopo, ma ia va’aia la’ei tausimai a le tamaitai o Salome.  “Oi, e te faigaluega i’i?”

“Ioe, o a’u lea e Supavaisa i Tausimai a le falemai,” ole mimita atu lea a Salome.  “Ae o le a le mea ua faatamavale ai i luma i’i?”

E le i tali atu Iakopo, ae toe oso mai Salome.  “O a’u lea ua ou manava.  E a? Ta o e inu se ta ipu kofe i le fale’aiga la e i leisi itu auala?”

Ua tilotilo Iakopo i lana uati ma ia manatu ifo, e mafai lava na la o ma Salome, tope sana ipu kofe, toe fo’i mai i le falemai e faatali Naomi.

“Manaia foi si na tonu,” o le tali atu lea a Iakopo ma tulai lava i luga.

Ua la savavali ma Salome i le fale’aiga i leisi itu auala o le falemai, ma oka a la ipu kofe.

E le i umi lava, ae manava mai loa si teine o Naomi.  Na fiu Naomi e tau autilo lona tuagane, ua leai seisi.  Ua taumafai e valaau le telefoni feaveai a Iakopo, ae le tali mai seisi. 

Na savali loa Naomi agai i le fale faatali pasi, ae o le taimi lea, o lo o fai lava taliega ma talatalanoa ia Iona tuagane o Iakopo ma lana supavaisa o Salome, i leisi itu o lea auala.

[E FAIA PEA]