Ads by Google Ads by Google

O OE O LO’U TAMA?


[ata: SN]

(w/ banner)

VAEGA 28

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 28.

*******************************

Ua o atu nei le tamaloa o Tanielu ma lona atalii o Iakopo e fesoasoani i le alii fomai o Taki e la’u mai ana mea ato ma meafale, i totonu o lona potu.  Ae o le taimi lea o lo o pisi ai le fafine o Eseta i le faleaiga.  Ina ua mae’a le galuega a Tanielu ma Iakopo ma le alii fomai o Taki, na valaau mai loa Eseta e o atu e fai le latou meaai.

Na fiu Eseta e vavao lana tama o Iakopo e latou te a’ai, ae ua pei e mageso le tino o Iakopo i ni loi, i le tuai ona alu ese atu ma le fale, ona o le la e faatali mai le tamaitai o Salome ia te ia.

Ua saofafai ane nei na o Tanielu ma le alii fomai, faapea ma le fafine o Eseta ma fai le latou meaai.

Ua fesili atu nei Eseta ia Taki po o soifua ona matua, sa tali le alii fomai, e na o lona tina o lo o soifua, ae na te le manatua lona tama, ona na maliu ae o lo o maitaga lona tina ia te ia.  Ua pupula alofa atu le fafine o Eseta i le alii fomai ma lana tala.

Na faapea atu le tamaloa o Tanielu, “A iai se mea e te manaomia, aua e te matamuli e fesili mai”.

Ua mae’a nei le taumafataga a le ulugalii o Tanielu ma Eseta, ma le alii fomai ma faapea atu loa Eseta, “Alu loa e fai sau malologa ona o lena e te faigaluega nanei.”

Ua savali ese atu ia Taki, ae faataupupula atu iai ma le loto momomo ia le ulugalii o Tanielu ma Eseta.  “Talofa e i si fomai,” o le tala lea a Eseta.  “E leai sona tama.”

Ia se’i tu’u ai i’i ia le vaega lea, ae tatou tuliloaina atu le evaga a Iakopo ma le tamaitai o Salome.

“Ou te iloa o se vavega mamana lenei ua fau e le Alii, e ta te toe fetaui ai i le taimi nei, lea ua ta matutua,” o le tala lea a le tamaitai o Salome ia Iakopo.

Ua sologa lelei lava le mafutaga a le toalua lea i le faleaiga, ae toe manatua e Salome, o ia la e le’i manava mail ana galuega.

Ua faapea atu loa Salome, “Fai le tonu, leaga o lea ou te le i manava.  Ae fai se ta tonu po o afea ta te toe feiloai ai”..

Ua oso atu nei le alii o Iakopo ma faapea atu, “E te fia tafao atu i le matou fale i le faaiuga o le vaiaso?”

Ua fai sina umi ua le gagana ia Salome, ae toe faapea atu loa Iakopo.  “E a, ua vave tele?” 

Ua ata Salome ma faapea atu, “Aua le vavevave ne’i te’i ua lavea seisi.  Ae manaia pe a fai seisi fuafuaga o se ta tafaoga, pe ta o i se tifaga.  E leai sau numera telefoni?”

Ua tago nei Iakopo tu’u atu le numera o le telefoni a le latou fale ia Salome, ma sa faapea mai loa Salome, “Ou te valaau atu.”

Ua savali ese atu Salome, ae ua na o le sioa o le alii o Iakopo i alu ese atu a Salome, ua pei ua leaga le ulu.

[E FAIA PEA]