VAEGA 3

E faatalofa atu i a tatou paaga o lo o afifio ma papa aao, e le gata i totonu o Amerika Samoa nei, ae faapea foi so’o se vaega o le kelope, o lo o maua mai ai lenei faasalalauga.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ae alo maia mo le so’oso’oga o le tatou Fagogo fou, lenei ua faaulutalaina, “O OE O LO’U TAMA?”.  O lenei Fagogo, e autu i le tama o Taki Sanerivi ma le tamaloa o Tanielu.  Ae se’ese’e mai loa i ou se’etaga malu ae o le a toe fa’aauau atu le tatou Fagogo

********************************************

Na gata mai le tatou Fagogo i le vaiaso ua tuanai, i le toa’i taunu’u o le alii o Taki i le nu’u lea o lo o iai le aiga lenei o le tamaloa o Tanielu ma si ona toalua Eseta ma si a la fanau e toatolu, o le alii matua o Iakopo, ma le teine lona lua o Ruta ia ma le ui’i o Naomi.

O le ulumatua a Tanielu ma Eseta, le alii lenei o Iakopo, talu lava ona faau’u mai i aoga maululuga, o lona naunautaiga lava, o le maua o sana galuega i totonu o le ofisa a le malo lea e fai ai pepa fanau ma ID a tagata.  Ae e iai le suega e tatau ona pasi muamua ona fa’ato’a mafai lea ona maua sau galuega i totonu o lea ofisa.  Ma o le lona lima ai lenei o tausaga o tausinio lava le alii o Iakopo i lenei suega.  O le masani a Iakopo, o le usu i taeao uma i le faletusi a le malo, ona nofo ai lava lea i le aso atoa ma fai ana suesuega, e tapenapena ai mo lenei suega.  E ofo tagata o le nu’u ua lima tausaga o su’e lava lenei alii ae e le pasi lava le suega.  Ae peitai, sa le i faavaivai ai lava le u’unai ma le faamalosi a le ulugalii o Tanielu ma Eseta i si a la tama, aua o le la ulumatua lea.  O lo la talitonuga, a i’u manuia le ulumatua o le aiga, o le a manuia uma le aiga.

O le tamaitai lona lua, o Ruta, o se tamaitai atamai ma le aulelei tele lava.  Na talu mai lava le laititi o Ruta, e sili lava na ia i ana vasega, ma maua le tele o fa’ailoga i so’o se tauvaga faaleaoaoga e alu ai.  O se mitamitaga tele lava i si ulugalii o Tanielu ma Eseta, ia lenei tamaitai o Ruta ma ua avea lea ma tulaga, ua fai ai lava sina loto malosi o lenei tamaitai.  Na faauu mai Ruta mai i iunivesite maualuluga faaLoia.  Ma o lo o maualuga nei lana galuega i totonu o se ofisa faaloia i totonu o le latou malo.  O Ruta, o se tamaitai e fiafia e tutoatasi, e fa’alagolago lava o ia i lona malosi.  E seasea tapa i se fesoasoani mai ona matua.  Ma o le sini autu lava i le olaga a lenei tamaitai, o lona fia alu ese atu lea ma lona aiga, e nofo toatasi na o ia.  Ae paga lea, o le alofa tele o le tamaitai o Ruta i nai ona matua, e faafaigata ai lava ona ia tu’ua lona aiga.

O le ui’i o le fanauga, le tamaitai o Naomi, o se tamaitai agaalofa ma le lotomaualalo tele lava.  A o tuputupu a’e lenei tamaitai, sa fiafia tele ona matua e fafaga o ia.  O le a lava le meaai e mana’o ai Naomi, a le kukaina e Tanielu ma Eseta, ua o faatau mai.  O le masani a Tanielu i aso uma, e latalata loa i le ta o le 12 i le aoauli, alu loa Tanielu e momoli le meaai a si ona afafine o Naomi i le aoga.  E le misi se aso e alu ai Tanielu e momoli le meaai a si ona afafine o Naomi.

O se fiafiaga sili i le olaga o Tanielu ma Eseta le la ui’i ona o se tamaitai e le iloa ita i seisi.  E le o se tagata foi e faamisa.  E fiafia lava Naomi i tagata uma.  Ona o le fiafia tele o Tanielu ma Eseta e fafaga si a la tama, sa amata ona lapo’a ai le teine o Naomi a o talavou o ia.  Ma na avea lea ma tulaga na tele ina ulagia ai o ia e tamaiti o lana vasega.  Sa iai se teine o le vasega a Naomi, e igoa ia Salome, sa fai ma ia le masani o le taufaifai ma faatigaina si teine o Naomi a o latou a’o’oga.  Ae le taitai tali atu iai Naomi pe alu foi ta’u i ona matua mea a Salome lea o lo o fai ia te ia.

Ae ina ua matua le tamaitai o Naomi, na toaga lava e alu e koleni e mafai ai ona faamaui lona tino, aua o lana sini autu, o le fia avea ma Tausima’i i se falemai.  Ina ua ausia le sini a le tamaitai o Naomi ma fa’au’u mai i ana aoga faa Tausima’i, sa tete’i uma tagata o le nu’u i le suiga o le teine o Naomi, e fai o le pae’e, ae ua matua’i aulelei lava. 

E FAIA PEA!