VAEGA 5

E toe faatalofa atu i a tatou paaga o lo o afifio ma papa aao, e le gata i totonu o Amerika Samoa nei, ae faapea foi so’o se vaega o le kelope, o lo o maua mai ai lenei faasalalauga.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, i le alii fomai o Taki ma le aiga o si ulugalii o Tanielu ma Eseta, ma si a la fanau toatolu o Iakopo, Ruta ma Naomi.

********************************

O le taeao segisegi ae e le i alu a’e i luga le mata o le la, ae ua leva ona tu tu le tama o Taki i luma o le faleaiga a Tanielu ma Eseta ma tau autilo atu i totonu o le faleaiga pe na te iloa atu seisi.  E fai o le tau fa lo atu o le ua o Taki agai i le faleaiga, ae sa tau autilo solo e vaai po o amanaia mai lana mata aitu lea e fai i luma o le faleaiga.

O lo o laei le alii o Taki i ona laei tamo’e ina ia aua ai nei masalosalo seisi po o a ana mea o fai I luga o le auala i lea vaveao.  

Na toeitiiti lava puna le alii o Taki i totonu o le pa aute a le aiga lea e fesagai le latou fale ma le faleaiga a Tanielu ma Eseta, ina ua matala faafuasei mai le faitotoa o le faleaiga, ae savali mai le tamaloa o Tanielu i fafo ma le taga lapisi.

Ua soso atu nei Taki ma tu faagatasi ma le pou moli ae faamata tasi mai i gaioiga a Tanielu lea e fai.  Ae o le taimi lea ua savali atu le Tanielu ma togi ana taga lapisi i totonu o le lapisi tele lea e tu i tafatafa o le auala.  Ona toe savali atu lea ua u’u mai le salu ma amata ona salu salu le lapisi i luma o lona faleaiga.

Na fai sina umi o faataupupula mai Taki mai i lalo o le pou moli, i le tamaloa o Tanielu.  Ai ua u e se namu le taliga o Taki na toe liliu ai le Taki ma savali faatopetope atu agai i leisi itu o le auala, e alu ese atu mai i le faleaiga.

Sei tu’u la Taki la ua alu e fa’auma lana koleniga o le taeao, ae se’i o tatou liliu ane ia Tanielu ma lona aiga ma le alafai mai i lea taeao fou.

A o salusalu lava le otaota a si tamaloa o Tanielu, sa iite lava i lona tino, e pei o iai se tagata o mata’i atu o ia.  Ua ea a’e i luga Tanielu ma autilo solo, ae na o le pau lava le tagata sa na ia iloa atu, o le tama la e u mai le tua, o lo o tamo’e aga’i ese atu ma le faleaiga.

Ua lulu le ulu o le tamaloa o Tanielu ma ia manatu ifo, ai ia ua leaga le ulu.  Ua savali nei Tanielu agai i totonu o le faleaiga ma ia tilotilo atu i tua o le umukuka, o lo o pisi mai lava si ona toalua o Eseta i le tapenaina o meaai mo le pisi o le taeao, i tagata faigaluega ma tamaiti aoga.

Ua valaau atu nei Tanielu ia Eseta e tu’u mai isi meaai e tago e fa’avela ae alu e fafagu le la fanau ina ne’i tuai i galuega ia nai tamaitai o Ruta ma Naomi, ae o le alii o Iakopo, ina ne’i tuai i le faleaoga mo ana suesuega.

Ua tape e Eseta ia le ogaumu sa fai ai lana falaiga fuamoa, ae ua savali atu nei i le latou fale, lea e i tua tonu lava o le faleaiga ma amata ona tauvalaau igoa o lana fanau.

“Iakopo! Sole Iakopo! Gofo ia i luga! Sole, aga o a’u lega ua faalima ga su’e i su’ega ofisa a le malo, ou ke le moe umi faapea.  Gofo loa i luga i e misi le pasi e alu ai i le kaulaga.  E ke alaku foi ua kumu kokogu o le poku aoga!  Se Iakopo, gofo loa i luga!” O le tauvalaau leotele lea a Eseta.

“Luka! Gaomi! Gogofo loa i luga! E leai se mea aoga e maua i le moe umi! Gaomi, ua uma ga auli ou ofu falema’i?”  o le fa’aauau lea o le fafagu a Eseta.  “Kope o e saugi ae o mai e igu se kou ki oga kou o ai lea!”

E FAIA PEA!