VAEGA 39

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

**************************************

Na gata mai le tatou Fagogo i le vaiaso ua mavae, i le sauniuni o le aiga a le ulugalii o Tanielu ma Eseta i le latou tafaoga i le nu’u o le alii fomai o Taki.

Na amata ifo le tapenaga o lenei tafaoga, o fa’au’u le alii o Iakopo ona o lana teine o Salome, lea ua le mailoga se mea e oso oso solo ai, ina ua malamalama ifo Salome, o le teine lea sa ia agaleagaina a’o latou a’o’oga fa’atasi, o le tuafafine lena a Iakopo.

Ae e o’o i le po ae malama le taeao e alu ai le tafaoga, na vaaia e Naomi le suia o uiga a lona tuagane, ua fiafia lava.  Ma ua iloa ai e Naomi, ua toe soso’o le faigauo a lona tuagane ma Salome.

O le afiafi lava lena na fa’ate’ia ai Salome a’o nofonofo i lona potu, i le valaau atu o Naomi e fia feiloai ia te ia i le po lava lena.

Sa ta’u iai e Naomi ia le nofoaga e la te fetaui ai.  Ua le iloga se mea e osooso solo ai mafaufauga o Salome ina ua maua le telefoni a Naomi.

Ua manatu Salome po o le mea o le a fai atu Naomi e sili ona alu e su’e seisi ae tu’u lona tuagane.  Pe o le a fa’afefe e Naomi o ia, i le ta’uina ia Iakopo ia mea a Salome na faia ia te ia a’o la laiti.

Ua le manofo Salome, ma ia fa’atopetope atu loa i le nofoaga lea na fa’asino mai e Naomi e la te fetaui ai.

Ae o Naomi, ina ua tu’u i lalo le telefoni, ua savali atu i le potu a Taki ma tu’itu’i I le faitoto’a.

Ua tatala mai e le alii fomai le faitotoa o lona potu ma ia iloa mai Naomi ma ia faapea mai, “E iai se mea ua tupu?”

Ua faapea atu Naomi, “E te mafai na e sau se’i ta o i la’u feau pu’upu’u lea faamolemole”.

Na tu Taki ma tilotilo mai i foliga o Naomi ona faapea mai lea, “Ia se’i aumai la’u ki ma lo’u ofu mafanafana”.

Ua savali atu nei Naomi agai i fafo o le fale, ae fetaui ma si ona tuagane o Iakopo.  Ua fesili mai Iakopo, “O fea a e toe alu ai ua po le mea?”

“E leai sau feau.  Alu e faauma na tapena lau atopa’u,” o le tali atu lea a Naomi.

Ua ata Iakopo ma faapea atu ia Naomi.  “Ia lea o le a ou alu atu ta te o.  E le mafai na alu na’o oe, ua po le mea.”

[E FAIA PEA]