VAEGA 40

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

********************************

Ua le mautonu ia si teine o Naomi i le faapea atu o lona tuagane, e la te o e ave o ia i le mea o lo o fia alu iai, ona o le mea lea o lo o fia alu iai Naomi, o le la feiloaiga ma le tamaitai o Salome.

Na fai sina umi o tui a Naomi ma tau mafaufau sana tali e fai atu i si ona tuagane.  Ae oso mai loa le alii fomai o Taki ma faapea mai ia Naomi, “E ta te o pe leai?”

Ua te’i Iakopo ma faapea mai, “Oi, aua e te popole lau susuga i le fomai.  A lea la’a ma o ma Naomi.”

Ae faapea mai Naomi, “Leai Iakopo, lea la’a ma o ma Taki leaga o le mataupu lea e fa’atatau i la’u galuega i le falema’i.”

Ma oso atu lava Naomi toso mai le lima o le alii fomai ma faatopetope atu i fafo o le faitoto’a.

Ua tu Iakpo ma tilotilo atu i le tapuni mai e Naomi o le faitoto’a ma fa’amimigi ona tau’au ma savali agai i lona potu.

“O le a le mea lea e tupu?” o le fesili lea a le alii fomai ia Naomi.

“E te malamalama pe a ta taunu’u i le nofoaga lea,” o le tali mai lea a Naomi.

Ua alu gugu le ta’avale a le to’alua lea.  I le taimi atoa lava, o fa’ataupupula lava i fafo ia Naomi mai ma tau mafaufau ana faamatalaga o le a fai ia Salome.

Ua taunu’u le to’alua lea i le nofoaga lea sa faatonu e Naomi ia Salome e la te fetaui ai.

Ua oso i fafo ia Naomi mai i le ta’avale ae ua faatonu le fomai e faatali atu i totonu o le ta’avale, e le umi lava lana feau.

E savali ese atu Naomi, ae ua oso i fafo ia le alii fomai ma mulimuli atu ia Naomi e vaai po o fea lea e alu ai le tamaitai.  Na iloa mamao atu lava e Taki ia le saofa’i mai o Salome ma o lea na ia fa’atafatafa ane ai i se nofoa latalata i le mea o lo o talanoa mai ai Naomi ma Salome, ma saofa’i ai ma fa’atalitali le toe fo’i atu o Naomi.

Ua saofa’i atu nei Naomi ma fesaga’i ma Salome.  Ua va’aia e Naomi le popole o foliga a Salome.

“Naomi, ou te faamalie…” o le tau amata mai lea a Salome.  

Ae oso atu Naomi, “Salome, ou te le i sau e te fa’ato’ese mai ia te a’u.  O a’u, ou te alofa tele i lo’u tuagane.  Ma ou te le mana’o e fai se mea e tiga ai o ia.  Ma ou  te iloa, afai ae iloa e Iakopo le mea na tupu, e matua’i mafatia ai lava o ia.  O le mea lea ua ou sau ai e fai atu ia te oe, ou te le ta’uina ia Iakopo le mea na tupu.  Ona ou te puipui i lo’u tuagane.  Ae afai e te faia se tulaga e tiga ai lo’u tuagane, ona e va’ai lea i la’u mea e fai ia te oe.”

Na ona uma lava o le faamatalaga lea a Naomi, ma tu a’e i luga ma toe savali ese.

[E FAIA PEA]