VAEGA 43

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

****************************

Na gata mai le tatou Fagogo i le vaiaso ua tuanai ina ua taunuu le tamaloa o Tanielu ma lona to’alua o Eseta ma le la fanau, o Ruta, Iakopo ma Naomi i le fale o le aiga o le alii fomai o Taki.

Na matuai maofa le ulugalii ma le la fanau, e fai o le tele o le fanua e tu ai le fale a le alii fomai, ae o le fale latou ia, ua pei o se faletalimalo tele.

Ua faapea atu le fafine o Eseta i le alii fomai, “E talofa e ia te oe, i lou tau fa’aofiofi i totonu o le la tama’i potu, ae se’i va’ai i le tele ma le manaia o lou fale.”

Ua ata le alii fomai ma faapea mai, “Aua e te popole, o le la e manaia lava lo’u potu ma e faigofie foi ona tapena.  O le mea foi lena ua ou fiafia ai i lo’u faigaluega i o, ona e le tau popole i se fale tele ma le aufaigaluega.  E tu’u a mea uma na i lo’u tina.”

Ua fesili atu ia le tamaloa o Tanielu, “O silafia e lou tina o lea ua e aumaia i matou iinei.  Te’i ua le fiafia lou tina.”

Na atili ona ata le alii fomai ma faapea mai, “O lo’u tina, o lona olaga atoa o le tausiga o a’u ma o so’o se mea lava out e mana’o ai, e tago lava fai.  La ua uma ona ou fai iai, o lea ou te aumaia outou iinei.  Aua le popole.”

Ua liliu le alii fomai ia Ruta, Iakopo ma Naomi ma faapea atu, “O le a lava se mea tout e manaomia, na o le fai lava i so’o se tasi o le aufaigaluega.  O la foi ua uma ona fai ia i latou, o outou o a’u malo fa’aloalogia mo aso e tolu ia o le a soso’o.  O le latou tiute moa so na e tolu, o le faamalieina o so’o se mea tout e mananao iai.”

Ua talie le fanau a Tanielu i le tala a le alii fomai.

Ua faapea atu loa le alii fomai i ana malo, “Ou te iloa na mamao le mea na tatou malaga mai ai.  Tanielu ma Eseta, afai o fia fai se malologa, o le a ave oulua i le lua potu, la ua uma ona avatu iai lua atopa’u, e faamalu ma fai se malologa.  O la foi ua avatu ai ma sina taumafataga ma se vai malum o le lua fofoga taumafa.  Se’ia o’o i le aoauli na tatou toe faapotopoto mai lea i lalo i’i mo se fuafuaga e faia ananei.”

Ona ia toe liliu atu lea ia Ruta, Iakopo ma Naomi ma faapea atu, “Ae o outou, o e sui outou lavalava na o mai lea tatou o e tietie solofanua.”

Ua geno atu loa le alii fomai i se tasi o lana aufaigaluega ma faatonu e ave an malo i a latou potu, ona savali ese atu lea agai i leisi itu o le fale.

Ae ua savali atu le ulugalii o Tanielu ma Eseta ma le la fanau, i le fasitepu e agai i le fogafale lua o le fale, e mulimuli atu i le tamaitai faigaluega a Taki.

E savavali lava le aiga ma fetilofa’i solo i totonu o le fale, e le uma le maofa i le tele o le fale.

“A iai seisi mea e manaomia, na o le toso lava o le manoa lea,” o le faatonuga lea a le tamaitai faigaluega o le fale.

Ua saofafa’i ifo ia le tamaloa o Tanielu ma le fafine o Eseta i luga o le la moega, ina ua alu ese atu le teine faigaluega a le foma’i.  Ua fai sina umi o la nonofo e aunoa ma se tala.  Ona ata lea o Tanielu ma faapea atu, “Se va’ai iai, e tatou te le iloa lava ituaiga tagata e tatou te fetaui ai.  O lea na ou faapea, o si tama o Taki, o se foma’i e sau mai se aiga mativa, ma o le mafua’aga lea e galue malosi ai ona o le tausiga o lona aiga.  Ae lea, se’i vaai iai.”

Ua tali atu Eseta, “O la’u tala foi lena sa tau fai atu.  Ae faafetai i lona alofa ma le aumaia o tatou i lona fale.  Ou te fia feiloai atu foi i lona tina ae tatou te le’i toe fo’i.”

Ua luelue le ulu a Tanielu ma toe tu ma faapea atu i lona toalua, “O a’u lea la’a fai sa’u malologa, ae fafagu a’u pe a latalata i le taimi lea na fai mai ai Taki e tatou te feiloa’i ai i lalo.”

[E FAIA PEA]