VAEGA 44

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 44

*********************************

Ua fai nei le malologa a le tamaloa o Tanielu ma le fafine o Eseta, ae o le taimi lea o lo o faapotopoto ai le la fanau i le potu a le teine o Ruta, ua mae’a ona sui o latou lavalava e o ai e ti’eti’e solofanua ma le alii fomai o Taki.

“Oka se manaia o lou ofu,” o le tala lea a Naomi i lona uso matua.  

“Ioe, ou te sau o lea e taatia atu i luga o lo’u moega.  Na fai mai le teine faigaluega a Taki, o ofu na faatau mo tatou,” o le tali mai lea a Ruta.

“Ae a a’u?  E sili atu lo’u aulelei ia oulua,” o le tausua mai lea a le alii o Iakopo i ona tuafafine.

“Po o a ofu fou e te faia, e te auleaga lava,” o le ula lea a le teine matua o Ruta.

Ua alu le talie a le to’atolu ma amata ona talatalanoa i le mau’oa o le alii fomai.

Ua faapea le tala a Ruta ma ata, “Ana ou iloa e faapea le mau’oa o Taki, ua leva ona ‘ou tapaina le vae.”

“Ia fa’aeteete au faamatalaga e,” o le ote atu lea a lona tuagane.  “E leai se suiga o le tatou mafutaga ma Taki.  O ia o lo’u uso, ae o le lua tuagane.  Vaai se teineititi i po fo’i.”

Ua ata leotele ia Naomi i le faamatalaga a lona tuagane.  Ae tu’itu’i mai loa le faitoto’a o le potu.

Ua savali atu Iakopo ma tatala le faitoto’a, o lo o tu mai ai le teine faigaluega lea sa faasino potu.

“Ua talosaga mai Taki e tou te susu atu i lalo i le potu malolo,” o le tala lea a le teine faigaluega.

Ua savavali atu nei le toatolu lea i lalo i le mea o iai le potu malolo, o lo o nofo mai ai Taki.  Ua ata mai Taki i le savavali atu o le to’atolu lea, ma faapea mai, “E aulelei sa’o lava nai o’u tuafafine ma si o’u uso fou.”

Ua taufai talie uma le vaega lea ma saofafa’i ifo i lalo.  Ona faapea mai lea o le alii fomai, “O lea ua mae’a ona tapena le tatou mea’ai.  E tou te fia a’ai tatou o ai e ti’eti’e, pe ti’eti’e muamua?”

O Iakpo lava na muamua oso i luga ma fai mai, “A’ai muamua.” Ua talie Ruta ma Naomi ma mulimuli atu i le latou tuagane i le laulau ‘ai, ae folo atu i tua le alii fomai.

A’o fai le taumafataga a le to’atolu lea, ua fesili atu Naomi ia Taki, “E toe taliu mai afea lou tina?”

Ua ea a’e i luga Taki ma faapea atu, “E toe sau i le Aso Sa, le tatou aso mulimuli iinei.  E tatou te fai’aiga i le po ae tatou te le i toe fo’i atu i le taeao o le aso Gafua.”

[E FAIA PEA]