VAEGA 45

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

************************************************

Sa gata mai le tatou Fagogo i le vaiaso ua mavae, ina ua alu le tafaoga a le alii fomai o Taki ma le ulugalii o Tanielu ma Eseta ma le la fanau o Ruta, Iakopo ma Naomi.

Na matua’i ofo le aiga lenei ina ua va’ai i le mea e nofo ai lenei alii fomai, le fanua e le iloa atu leisi itu, le lautele, ae o le fale sa ola a’e ai le alii fomai, oka, oka, o fale a tagata mau’oa ma maualuluga.

Na tau matamuli si ulugalii o Tanielu ma Eseta pe a mafaufau atu i si o la fale faatauva’a lea o lo o faamautu ai nei le alii fomai ma tau savali i lana galuega i le falemai tele a le latou nu’u, ae lea ua o mai vaai i le fale a le alii fomai, e faatoluina le latou fale, fa’ato’a maua le tele o le fale a le alii fomai.

Ua alu le faaiuga o le vaiaso o fai tafaoga ma fiafia ia le alii fomai ma nai ana malo fa’aaloalogia.  O le ti’eti’e taavale solo ma fai taumafataga i so’o se fale’aiga, o le alu o le tietiega solofanua, o ta’aloga a tagata mau’oa, o le matamata tifaga ma isi lava fa’afiafiaga na alo atu iai le alii fomai o Taki, e fa’afiafia ai ana malo fa’aaloalogia.

Ua lamalama faai’u le tafaoga a le vaega lea.  Ma o le po o le aso Sa ua saunia ai e Taki se latou aiga fa’amavae lea o le a auai mai ai si ona tina.

A’o talatalanoa le alii fomai o Taki ma ana malo i le taeao o le aso Toonai ma fa’amalamalama atu iai e Taki ia fuafuaga o lea aso aemaise le latou aiga faatasi ma lona tina i le po o le aso Sa, na savali atu Taki ua tu i tafatafa o se ata tele o lo o tautau ma i luga o le ‘wall’ o le fale ma faapea mai, “O le ata lea a lo’u tina.  E na o ma’ua lava lo ma aiga.  Talu mai lava ona ou laitiiti, ou te fiu e fesili i lo’u tina po o ai so’u tama, ae musu lava lo’u tina e talanoa mai e uiga i lo’u tama.”

Ua nonofo le ulugalii o Tanielu ma Eseta ua le gagana ae ua na o le pulapula alofa atu i le alii fomai o Taki.  E faapena foi si a la fanau.  Ua tu i luga le alii o Iakpo ma savali atu i le opo mai le alii fomai ma faapea atu, “O lea ua iai lou tama.”

Sa fa’ate’ia Taki i le tala a Iakopo ae ua liliu mai Iakopo i ona matua ma faapea atu ia Taki, “O ou matua ia.”  Ma faasino i ona matua.  Ona toe faapea atu lea o Iakopo i le alii fomai, “O ou tuafafine ia ma o a’u o lou uso.  O mea uma sa e faia mo i matou talu ona o tatou mai i totonu o lou fale, o tulaga uma ia e fai e se tagata o se aiga.  O oe o le matou aiga.”

Na leai se tasi i totonu o le potu malolo i lena afiafi, e le i maligi loimata i le faamatalaga a Iakopo.  Ua na o le tau fai luelue o ulu o le aiga atoa.

Ae o le taimi lea ia Taki, ua le gata ina tagi i le faamatalaga alofa a Iakopo, ae ua ia tilotilo atu i le ulugalii o Tanielu ma Eseta ma taumate o la’ua lagona e tusa ai ma le la’ua vaai mai i le ata o lona tina.

Na iloa mamao mai lava e Naomi, le sui o foliga o le alii fomai i foliga o se tagata e pei o iai se mea e le o malamalama ai, a’o ia tilotilo toto’a atu i le mea o nonofo mai ai ona matua.

[E FAIA PEA]