VAEGA 47

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*********************************************************** 

Na gata mai le tatou Fagogo i le vaiaso ua mavae, ina ua o’o i le afiafi mulimuli o le tafaoga a le ulugalii o Tanielu ma Eseta ma le la fanau, ma le alii fomai o Taki.  Ma o le afiafi foi lea ua fuafua e fa’atasi mai ai le tina a le alii fomai, mo le latou tamafataga mulimuli, ae e le i toe foi atu le ulugalii ma le la fanau, i lo latou nu’u, ae toe fo’i le alii foma’i i lana galuega.

O lea afiafi, na saofafai ane ai i le laulau ‘ai ia Tanielu ma lona toalua o Eseta, ma le la fanau toatolu, o Ruta, Iakopo ma Naomi.  Ae o le ulu o le laulau o lo o saofa’i mai ai le alii fomai o Taki.

Ua laulau mai le mea’ai ae toe tula’i ese atu Taki mai i le laulau ‘ai.  Na fai si umi o alu Taki, ua amata ona le mautonu le ulugalii o Tanielu ma Eseta ma le la fanau, pe ua iai se faalavelave ua tupu.  Na toeititi lava a tula’i le alii o Iakopo e alu e saili mai le alii fomai, ae toe savavali mai loa Taki, o lo o ia ta’ita’i maia le lima o se fafine aulelei lava.

Ua tau fai tutu uma i luga ia Tanielu ma Iakopo e fa’aali le fa’aaloalo i le savavali mai a Taki ma le fafine.  Ma ina ua taunu’u mai i le laulau, na faapea atu loa ia Taki i ana malo fa’aaloalogia, “O si o’u tina lea o Amelia.”

Ua tau fai faatalofa mai le tamaloa o Tanielu ma le fafine o Eseta ma le la fanau, i le fafine o Amelia.  Ua faapena foi le fafine o Amelia i malo a si ana tama.

“Ua ou fiafia lava ua mafai ona ou sau tatou te faiaiga i lenei afiafi ae tou te le i toe taliu atu i le tou nu’u,” o le tala lea a le fafine o Amelia ma saofa’i ane i le ulu o le laulau ‘ai.

“Fa’afetai atu lava ia outou ua mafai ona outou aumaia se ai’u tama e asi mai a’u, ua leva na alu ese atu, lea fa’ato’a toe sau e asi a’u,” o le tala lea a Amelia.

“E leai, o matou e tatau ona faafetai atu ia te oe le tina ma si au tama, i le talia lelei o i matou, e le gata i totonu o lou fale ae faapea foi lou laufanua,” o le tali atu lea a le fafine o Eseta.

“Ai ua outou taliga,” o le tala mai lea a le fafine o Amelia.  “Ia fai loa le tatou mea’ai, tatou toe talatalanoa ai”.

Ua fa’asaga atu nei loa le vaega lea ua fai le latou mea’ai ma talatalanoa.

Ae o le taimi atoa lava, o lo o mata’i mai e Naomi ia le alii fomai o Taki, ae o le taimi lea i le fomai, e le malolo le fetogia’i solo o lona ulu, mai lona tina ma le tamaloa o Tanielu.

Ua lamalama fa’ai’u le meaai ma ua faapea atu loa Amelia i ana malo fa’aloalogia ma si ana tama, “Ia tatou se’e atu i totonu o le potu malolo e toe fa’aauau ai a tatou talanoaga.”

Ua faapea loa ona agai atu le vaega lenei i le potu malolo, ae o le taimi lea ua tago atu ai ia le alii fomai o Taki ma toso mai le lima o lona tina, ma faatali se’i ulufafo uma atu le aiga a Tanielu ma Eseta mai le potu ‘ai, ona liliu atu lea i lona tina ma fesili atu iai, “Mama, e te le masani ia Tanielu?”

Ua faanunumi mai mata o le fafine o Amelia i le fesili a lana tama, ma faapea mai, “Ou te le masani ia Tanielu, o lea fa’ato’a ma feiloa’i.  Aisea?”

Na vaaia e Amelia le liua o foliga o lana tama i le faanoanoa, ma le ita.  E toe tau fesili atu Amelia i le alii fomai, pe iai se mea ua tupu, ae ua u mai le papatua o Taki ma savali faatopetope atu i le potu malolo, i le mea o iai ana malo fa’aaloalogia.

Na matua’I fa’ate’ia le tamaloa o Tanielu ma le fafine o Eseta ina ua o’o atu Taki, tu i luma o Tanielu ma fesili atu iai, “O ai moni lou igoa?”

[E FAIA PEA]