VAEGA 6

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 6.

********************************

Ua amata ona tau pulapula ifo mata o le fanau a le loomatua o Eseta.  “E le lelei se moe a seisi se i le leokele o le la loomakua!” o le tomumu lea a le tamaitai matua o Ruta.  E tomumu lava ma tu i luga, ma tau lana kiki i si teine o Naomi la lava e pulou lona ie afu.

E savali atu Ruta i le fale taele o le latou fale, ae tapuni mai e le alii o Iakopo.  “Iakopo faakope! Ou ke le iloa po o fea ke fia aulelei ai, e leai se keige e fia alu ia oe, e le o pasi au suega!” o le e’e atu lea a Ruta ia Iakopo ma tatu’i le faitotoa o le fale taea.

“Ailoga se iai se kaeao filemu o le kakou aiga!” o ote mai lea a Eseta.

“Taeao manuia Tina!” o le faafeiloai atu lea a le teine laititi o Naomi i si ona tina.

“Ua uma na auli lou toniga tausimai?” o le fesili mai lea a Eseta i si ana tama.

“Ioe na out ago auli anapo,” o le tali mai lea a Naomi ma savali atua gai i le fale taele.  Na ona tatala mai lava e Iakopo o le fale taele, puna ma Naomi i totonu ae la e tau tamo’e mai ia Ruta.  Ua atili ai le leotele o le faataitai o a Ruta.  Ae ua alu i le atoa Iakopo ma ula mai iai ma lau lona loomatua.

Sa tu Eseta ma matamata atu i si ana fanau ma ona foliga fiafia.  E ui i le malomalo a o lana fanau i taeao uma, ma le tiga o ona taliga i le tau upu, ae peitai, ua talitonu Eseta, e leai ni tupe po o auro e sili atu ona taua, i lo si ana fanau e sili ona pele i o la loto ma si ona toalua o Tanielu.

Ua toe savali atu nei Eseta i le faleaiga ma ataata i lana fanau.  Na iloa mai e le tamaloa o Tanielu le laufofoga fiafia o si ona toalua ma fesili mai pe iai se me aua tupu.  Na tali Eseta, “O lau fagau ua fai ma faakiga ulu i kaeao uma.”  Ae fai lava le tala a Eseta ma ata.  Ma na avea lea ma tulaga ua o’o ai foi le loto fiafia i le tamaloa o Tanielu.

Na muamua mai lava i lalo i le faleaiga le tamaitai o Naomi, e pei o lana masani i taeao uma, e usu mai lava e fesoasoani i ona matua i le pisi o le ti o le taeao, mo tagata faatau lea e usu i galuega ma fanau aoga, ona fa’ato’a agai ai loa lea o ia i le falemai.  Aua, e le mamao tele le falemai mai i le mea o iai le fale o lenei aiga.

E fetaui lava le taunuu mai i lalo o Ruta ma le alii o Iakopo, ua mou atu le pisi o le taeao ma ua nonofo nei i lalo le aiga ua fai le latou lotu o le taeao e fa’afetaia ai le alofa o le Silisili Ese i totonu o si o latou aiga, ma talosia ai lo latou agai atu i galuega ma aoaoga ae famuli atu nai matua.

A o faia le ti o le taeao a le aiga, na faapea mai le tala a Naomi, “O nei lea e amata ai le matou supavaisa fou.  Talosia o se tagata lelei.”  Ae tali atu lona tama, “Aua e te popole, e tasi lava le masani mai o lau supavaisa i ou uiga alofa ma le tausaafia, ou te iloa lava e fai oe ma ana fesoasoani.”  Ua ata si teine o Naomi, ae ua iloa atu lava e ona matua le popole o lona loto.

Ua tago atu nei Tanielu ma u’u mai ni pepa sa i luga o le laulau ma faapea atu ia Ruta ma Naomi, “Ave pepa ia e faapipii i lua fale faigaluega.”

“O le a lea mea?” o le fesili lea a le Ruta.  “Na e te silafia Papa, e le so’ona tu’u ni mea i luga o le matou ofisa, ina ne’i afaina ai loia o le matou aufaigaluega.”

“E tou te manatua le potu lea e i le afeafe pito i luga o le tatou fale?” o le tali mai lea a Tanielu.  “Ia la ua mae’a ona toe faalelei.  Ae o lea e tau saili seisi e nofo totogi ai.  Manaia foi sin a seleni faaopoopo e fesoasoani i si o tatou aiga.”

Ua fetagofi atu nei Ruta ma Naomi ma u’u mai a la pepa ma gaugau ae tu’u i totonu o a la ato, ma ua faamavae loa le fanau i a latou matua, ma savavali atu loa e pu’e le pasi mo galuega ma le aoga a le alii o Iakopo.

E FAIA PEA!