Ads by Google Ads by Google

O OE O LO’U TAMA?


[ata: SN]

VAEGA 49

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*********************************************

Sa gata mai le tatou Fagogo i le vaiaso ua mavae, ina ua fofola uma e le alii fomai o Taki le mafuaaga tonu sa ia aveina ai le tamaloa o Tanielu ma lona to’alua o Eseta ma le la fanau i lona aiga, ina ia mafai ona feiloai atu Tanielu i lona tina o Amelia, ona sa iai se manatu maualuga i le alii fomai, o Tanielu o lona tama moni lea.

Ae peitai, ua le taulau le moomooga o si alii fomai, ona e malamalama ifo le mataupu, e matua’i le masani lona tina ma le tamaloa o Tanielu.

Na momomo le loto o Tanielu i lona alofa i le alii fomai ma lona naunau ina ia saili lona tama, aemaise ai o lea ua faamatala e le fafine o Amelia, le tina a Taki, o lona tama na maliu i se afi i Lonetona, i sana faigamalaga.  Ma e maliu le tuaa a Taki, e na te le i iloa o lo o ma’itaga le fafine o Amelia.

O le tama moni a Taki, o se alii mau’oa ma na le fiafia lona aiga i si fafine o Amelia.  Ae ina ua maliu o ia i Lonetona, na iloa mulimuli ifo i lona falelauasiga, le uili uma e le tua’a a Taki, ia ana mea uma, o lona fale, fanua, tamaoaiga, pisinisi, i le fafine o Amelia.  Lea ua saogalemu ma lelei ai le soifuaga o Taki ma si ona tina.

Ua mae’a atu le talanoaga a le aumalaga ma le fafine o Amelia, ma ua ta’ape atu loa mo se malologa o le afiafi, ma tapenaga aua le toe fo’i atu i le nu’u e o mai ai Tanielu ma lona aiga, ia ma le mea ua faamautu ai nei Taki ma galue ai.

Ua fai nei le tonu, o le a le fo’i Taki ma le aiga o Tanielu, ae o le a nofo se’i fa’aalu sina taimi e la te mafuta ai ma lona tina ona toe fo’i atu lea i lana galuega.

Ua malama le taeao na soso’o ai, ua alu atu nei Taki ma momoli le tamaloa o Tanielu ma lona aiga i le malae vaalele, aua le malaga e toe fo’i atu ai.

Ae e le i savali ese atu Tanielu, ua ia a’apa mai ma fusi mau atu le alii fomai o Taki ma ia musumusu atu iai, “E mafai ona avea a’u ma ou tama.”

Sa leai seisi o le fafine o Eseta ma lana fanau to’atolu, faapea le alii fomai, sa le’i maligi loimata i le taga a le tamaloa o Tanielu.

Ua faapea ona fusi mau atu e le alii fomai ia le tamaloa o Tanielu ma ia faapea atu ai foi, “Ana soifua lo’u tama, ou te mana’o ia pei lava o oe.”

Ona savavali ese atu lea o Tanielu ma lona aiga, agai atu i le malae vaalele, a’o tu pea le alii fomai o Taki ma tilotilo atu i le mou malie ese atu o le aiga, ona liliu lea ma oso i lana taavale.

Ina ua saofafa’i ia le aiga i luga o le vaalele, sa liliu atu le fafine o Eseta i lona toalua ma musumusu atu iai, “O le a le ta mea a fai?”  

Na pupula mai Tanielu i le fafine o Eseta ma ia geno mai iai, e aua le leotele, ae ua ia musumusu atu iai, “Se’i tatou o’o i le fale, ona ta toe talanoa lea.”

[E FAIA PEA]