VAEGA 50

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 50.

*************************************************************

Ua saofafa’i le aiga a le tamaloa o Tanielu ma le fafine o Eseta i luga o le va’alele, ua faamau fusipa’u o le a o latou tu’ua le nu’u a le alii fomai o Taki ae toe taliu atu i lo latou nu’u.

E le o toe fo’i faatasi Taki ma le aiga a Tanielu ma Eseta, ona o lea ua nofo e tafafao ma si ona tina, ae le’i toe taliu i galuega.

Ina e le’i savali ese atu le ulugalii o Tanielu ma Eseta ma le la fanau, mai i le mea na tu’u ai latou e le alii fomai o Taki, sa faapea ona lilium ai ia le tamaloa o Tanielu ma fusi mau atu ia Taki ma faapea atu ia te ia, ‘Afai e te mana’o iai, e mafai ona avea a’u ma ou tama.”

E savavali lava la le ulugalii ma le la fanau, ma tilotilo mai i le mea o lo o tu atu ai Taki, sa faapea ona maligi loimata o lenei aiga, i le momomo o loto i le alolofa mai ia Taki ma le tulaga na tupu i le latou tafaoga.

Ua saofafai nei le ulugalii i luga o le vaalele, ae a’apa atu le fafine o Eseta ma u’u mau mai le lima o Tanielu.  O le pito i luma o la’ua sa nonofo ai le la fanau.  E le’i masi’i i luga le va’alele, ae fesili atu le fafine o Eseta ia Tanielu, “O le a le ta mea o le a fai?”

Ua o’omi mau mai e Tanielu ia le lima o Eseta ma faapea mai iai, “Aua le pisa, se’i tatou o’o i le fale ona ta talanoa lea.”

Na le’i iloa atu e Tanielu ma Eseta ia le lagona mai e le teine o Naomi o le la talanoaga.  Ua nofo Naomi, ua tau mafaufau po o le a le uiga o le femusua’i a ona matua lea e fai.

Ua taunu’u le faigamalaga, ona alu a lea o le tagata i lona potu.  Ae ua o ia le ulugalii i le la potu ma la nonofo ifo i lalo.  Na fai sina umi o fesagai le ulugalii, e aunoa ma se faamatalaga.  

Ae vaaia loa le amata ona tagi o le fafine o Eseta.  Ua a’apa atu Tanielu ma tau faamafanafana atu i si ona toalua.

“Ua leva na ta iloa, e o’o mai le aso lenei.  E leai se mea e mafai ona ta faia,” o le tala lea a le tamaloa o Tanielu.  “E le i tupu fua le maua o tatou e Taki.”

“Ou te le i iloa na iai se atalii a Tanielu,” o le tagi tautalatala lea a Eseta.  “Ou te le mana’o e loka oe.  O Tanielu lava e ana le fuafuaga lenei, na ta mulimuli ai.”

E fai le talanoaga lea a le ulugalii o Tanielu ma Eseta, ae o le taimi lea o lo o tau tu’itu’I mai ai le teine o Naomi i le faitoto’a o le la potu.  Ae na toe me’ia le tu’itu’I a le teine, ina ua faalogo mai i le faamatalaga a lona tina.

[E FAIA PEA]