VAEGA 51

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***********************************************

Sa fai o le fa’ate’ia o le teine o Naomi i le talanoaga a ona matua lea o lo o ia faalogologo iai, ae ua faapea foi ona ia le mautonu, po o le a le uiga tonu o lenei mea o lo o talanoa ai ona matua.

A’o tu Naomi i fafo o le faitoto’a i le potu a ona matua, sa ia le mautonu po o ai le Tanielu lea o lo o talanoa ai ona matua, ae po o le a foi le uiga o le faamatalaga a lona tina, o Tanielu lea sa u’unaia la’ua e faia se faaiuga, lea e foliga mai ua loto mafatia ai nai ona matua.  Sa lagona atu foi e Naomi, le tagi a lona tina ma lona leo ua tumu i le popole.

Ua toe savali lemu ese mai ia Naomi mai i le faitoto’a o le potu a ona matua.  Ae ua alu atu sa’o lava i le mea o iai lona uso matua o Ruta ma faapea atu iai, “E iai le mea la e tupu ia Mom ma Dad”.  Ua ea a’e i luga ia Ruta mail ana tusi la sa faitau ma faapea atu, “O le a?”.  Na faamimigi tau’au a Naomi ma faapea atu, “Ou te le iloa.  Ae o la e tagi Mom.” 

Ua tilotilo atu nei ia Ruta i le mea o iai le potu a ona matua ma ia tu i luga ma savali atu, ma tu’u lona taliga i le faitoto’a.  Ina ua le lagona atu e Ruta ni leo po o le pa’o mai o seisi i totonu o le potu, sa ia tago loa ua tu’itu’i le potu a ona matua.

Na valaau mai lona tama, “O ai lea?”  

Ua tali atu le teine o Ruta, “Dad, o a’u.  O okay oulua ma Mom?” 

“Ioe, lea la’a ma momoe, o loa e fai se tou malologa, taeao fo’i e toe usu e faigaluega,” o le valaau mai lea a le tamaloa o Tanielu.

“Ia ua lelei.  Good Night!” o le valaau atu lea a Ruta i ona matua.

Ua savali atu nei Ruta i le mea o tu mai ai Naomi ma tu’i le lima a Naomi.

“Ouch! Mo le a?” o le ‘ava’avau mai lea a Naomi ma mili lona lima.

“Ku’u lou fai kala pepelo.  Ma ku’u lou faikakala.  Alu loa e moe,” o le ‘ote atu lea a lona uso matua.

Ua savali fa’ali’i atu Naomi i lona potu ma togi mai lana faitoto’a.

Ae o le taimi lea, o lo o fa’alogologo mai ai le ulugalii o Tanielu ma le fafine o Eseta i le la potu, i le tau upu a le la fanau teine.

Ua liliu atu nei le tamaloa o Tanielu ma ona foliga faanoanoa ma faapea atu ia Eseta, “Ua tatau ona ta talanoa i tamaiti”.

Ae o le taimi lea ia Eseta, ua matua’i leai ma se tala, ae ua na o le maligi o ona loimata.

“E leai se mea e faamatala ai fua i tamaiti.  O la ua uma na faamatala e Amelia ia Taki, na oti lona tama i Lonetona,” o le tauanau atu lea a Eseta.  “O le a le aoga o le toe tatala uma ai o na mea mai la tausaga ua leva.  Ma leisi mea, afai ae alia’e le mataupu lea, e falepuipui mo’i ai lava oe.”

[E FAIA PEA]