Ads by Google Ads by Google

O OE O LO’U TAMA?


[ata: SN]

VAEGA 7

E toe faatalofa atu i a tatou paaga o lo o afifio ma papa aao, e le gata i totonu o Amerika Samoa nei, ae faapea foi so’o se vaega o le kelope, o lo o maua mai ai lenei faasalalauga.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, i le alii fomai o Taki ma le aiga o si ulugalii o Tanielu ma Eseta, ma si a la fanau toatolu o Iakopo, Ruta ma Naomi.

*************************

Na gata mai le tatou Fagogo i le vaiaso ua mavae, i le sauni atu o Iakopo, Ruta ma Naomi, le fanau a Tanielu ma Eseta, mo galuega ma aoaoga i le taeao fou.

Ae e le i o ese atu Ruta ma Naomi mai i le fale, sa tu’uina atu e le tamaloa o Tanielu ia la’ua ni pepa ma faatonuina la’ua e faapipi’i i a la fale faigaluega.

O le tamaitai matua o Ruta o se tasi o loia atamai ma le ta’uta’ua i lo latou a’ai.  Ae o le teine laititi o Naomi, o lo o galue o se Tausimai i le falema’i autu o le latou a’ai.

O le fasipepa lea na tu’u iai e lo la tama o Tanielu, o se fa’asalalauga o le afeafe pito a luga o le latou fale, o lo o tau saili seisi e nofo totogi ai.

NAOMI

Ua agai atu nei Naomi i le falemai e aunoa ma sona manatu o le a iai se mea o le a tupu i lena aso.  E taunuu atu Naomi i le falemai, o lo o gugulu le falemai atoa i le alii fomai fou.  Ua leai se tausimai, e o’o foi i ma’i o lo o taofia i le falemai, e le talanoa i le aulelei o le alii fomai fou.  Ma ua fia vaai foi le teine o Naomi i lea tagata o lo o vevesi ai ma’i ma tausima’i.

Ua lata i le aoauli, ae logo mai loa e le pulega o le falema’i ia fomai ma tausimai, ma tagata faigaluega uma o le falemai mo se fonotaga faatopetope i le potu fono a le fomai.  Ua faanatinati atu nei le aufaigaluega atoa ona ua latou iloa lelei lava, o lea o le a latou feiloai ma le fomai fou.

Na pei e taia le muaulu o le teine o Naomi i se laupapa malo ina ua ulu atu i totonu o le potu fono a le falemai, ma ona vaaia le alii o Taki.  Ae manatua foi, o le tamaitai lenei o Naomi, e fai lava sina ona matamuli e feiloai atu i tagata fou talu mai lava le ulagia o ia e tamaiti a’o aoga, ona o lona lapo’a.

Na tu mamao mai lava i le pito i tua o le potu ia le tamaitai o Naomi, ma faamata tasi mai i le alii fomai o Taki.  Ae peitai, na toeititi lava matapogia si teine o Naomi, ina ua fa’alauiloa mai foi ma le supavaisa vou a tausimai o le falemai, ae tu mai i luga le tagata…oka! oka! o le teine o Salome!  O le fili numera tasi a Naomi, a o la a’o’oga faatasi i aoga tulaga lua a le latou nu’u.

Na vave ona liliu ese mai Naomi ma toe faatopetope mai i fafo o le potu, ma tau to lana manava ina ua toe fo’i uma mai i lona mafaufau mea leaga uma sa faia e Salome ia te ia, a’o la talavou.

Na uma lelei lava le aso faigaluega a Naomi, e pei lava o la e ese le lalolagi o iai, i le atuatuvale o lona loto ona o lea ua avea Salome ma ana supavaisa.

O le le mautonu o Naomi, na uma leleli ai lava le aso, ae galo ia te ia ona faapipi’I le pepa lea sa tu’uina atu e lona tama, e saili ai seisi e nofo totogi i le pito i luga o le latou fale.

E FAIA PEA!