O OE O LO’U TAMA?
VAEGA 59
E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa. E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.
Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?
************************************************
Na gata le tatou Fagogo i le vaiaso ua mavae ina ua fa’aauau e le fafine o Eseta ia le tala sa faamatalaina e lona to’alua o Tanielu, i le la fanau, e uiga i le so’otaga a Tanielu ma le tama a le alii foma’i o Taki.
Ma ua o’o le faamatalaga a Eseta i le taimi na mu ai le falekalapu lea sa tafafao ai Tanielu ma le tama a Taki, ae o la sa alu ia le tama a Taki i totonu o le faleta’ele, ae o lo’o fa’atali mai i fafo ia Tanielu.
I le faaiuga o le faamatalaga a Eseta na faapea mai ai le tala a Tanielu, ana le o’o atu le vaega tinemu, e le maua se avanoa e lavea’i mai ai ia le tama a Taki.
“E le’i maliu?” o le fesili lea a Naomi.
Sa tali mai Tanielu, “Na fa’ato’a maliu i le aso na soso’o ai”.
Na fai sina umi o saofafa’i le aiga, ua leai se tasi e toe pisa, ae ua na o loimata maligi.
Ae na fa’ate’ia le aiga ma toe tatalaina ai le fale o Sio, ina ua oso atu le teine o Naomi ma faapea atu, “Ae aisea na lua le faamatalaina ai lenei mea ia Taki ma lona tina?”
Ua punonou uma i lalo ia le ulugalii o Tanielu ma Eseta, ua le tali mai seisi.
“Ma aisea na masalosalo ai Taki, o oe o lona tama?” o le fesili fa’aopoopo lea a Ruta.
Ua tau fai ea a’e i luga ia le ulugalii, ae leai lava se tasi e tautala. Ae ua na o le tilotilo atu o leisi ia leisi, ua leiloa po o fea a amata mai ai le la faamatalaga.
O le fafine o Eseta na muamua gagana ma ia faapea mai, “O ma’ua o ni tagata faamanuiaina tele, e le gata o le avea ma matua i se fanau sili ona pele ia I ma’ua, ae o se fanau sili ona lelei”.
Ua fetilofa’i le fanau a Tanielu ma Eseta, ua le mautonu i le mea o agai iai le talanoaga a o latou matua.
Ae ua faapea atu Eseta i lana fanau, “Ae e le’i faamatalaina atu le vaega lenei, ou te mana’o ia te outou la’u fanau, ina ia aua ne’i outou faamasinoina mai i ma’ua. O fa’ai’uga sa o ma faia, sa faia ona o lo ma alolofa ia te outou, ina ia outou ola ma fiafia ma ia maua so outou lumana’i manuia”.
Ua atili ona nunumi muaulu o Ruta, Iakopo ma Naomi, i le faamatalaga a lo latou tina.
“Ina o taoto le tama a Taki i le falema’I,” o le talanoa tau musumusu mai lea a le tamaloa o Tanielu. “Sa ia iloa e le aulia e ia le aso e soso’o ai ona o le tuga o ona manu’a.”
E FAIA PEA