O OE O LO’U TAMA?
VAEGA 64
Taeao Manuia, Taeao Toto’a i le mamalu o le tatou aufaitau nusipepa i lenei taeao fou. Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou. E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.
Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 64.
***********************************************
“O le a le uiga o lau faamatalaga?” o le fesili mai lea a le alii fomai o Taki ia Naomi.
“O lena sa e maua tau o sina vaega o le mea na tupu, ae le o le mea atoa,” o le tala lea a Naomi.
“O lona uiga e le i pepelo mai lou tama ia te a’u?” o le toe oso mai lea a le alii fomai o Taki. “O lona uiga e valea a’u ma ou le malamalama i faamatalaga a lout ama, i lona fa’aaogaina o le igoa ma faamaumauga a lo’u tama, ina ia maua ai sana galuega lelei, ona o lea sa loka i le falepuipui? Na sese la’u faalogo?”
Ua atili ai ona maligi loimata a le tamaitai o Naomi, i le si’isi’i o le leo a le alii fomai.
“E sa’o lou le fiafia, ae ua na o sina tu’ualalo, i lau susuga i le foma’i, ae e te le i a’apa atu i tulaga o le tulafono, pe mafai ona e tu’uina mai sina taimi e te lua talanoa muamua ai ma si o’u tama? E mafai ona ia fa’amalamalama atu ia te oe le mea moni na tupu?” o le ‘ai’oi atu lea a Naomi i le alii fomai.
Na umi se taimi o fa’ataupupula mai ia Taki ia Naomi, ma ona foliga o le le talitonu i le mea o lo’o talosaga atu ai Naomi.
“E te mana’o ou te toe alu e talanoa i lou tama?” o le fesili mai lea a le alii fomai ia Naomi. “Aisea? E toe fai mai ai nisi pepelo?”
“O le mafuaaga na faia ai e lo’u tama lenei tulaga, ona o le toe mana’o lea a lou tama ae e le’i maliu!” o le oso atu lea a Naomi.
Na va’aia le matuai mumu o foliga o le alii fomai ma ia fesili mai ma lona leotele ia Naomi, “O le a lau tala? O le mea na mana’o ai lo’u tama? O le tala lena a lou tama na fai atu ia outou?”
Ua liliu le alii fomai ma na matua’i fa’ate’ia Naomi ina ua tu’i e le alii fomai ia le pa sima o le fale. Ona liliu lemu mai lava lea i le mea o lo’o tu atu ai Naomi ma ia faapea mai.
“E sili ona e alu loa ae ou te le’i faia se faamatalaga po o se gaioiga, e ono tupu mai ai se faalavelave sili atu,” o le tala leo lemu lea a le alii fomai ma moeiini ona mata.
Ua solomuli lemu atu lava ia Naomi ma tatala le faitotoa ma agai atu ai lava i fafo o le potu a le alii fomai o Taki, ma toe tapuni filemu mai le faitoto’a.
Ua le iloa e Naomi po o le a seisi ana taga e fai. Ua na o le savalivali lemu ese atu ia Naomi ma le maligi o ona loimata.
Ae o le taimi lena i le alii fomai o Taki, ua nofo lemu ane lava i lona nofoa ma le gatete o lona tino, i lona ita tele pe a mafaufau atu i le faamatalaga a Naomi.
I ni nai minute na soso’o ai, sa ia a’apa atu loa i le telefoni ma vili se numera.
E le’i umi lava ae tali mai le tagata i leisi itu. Ua tali le alii fomai, “Mom? E iai se mea ou te fia talanoa atu ai ia te oe”.
[E FAIA PEA]