VAEGA 74

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 74.

***************************************************

Ua mae’a le talanoaga a le tamaloa o Tanielu/Alesana ma si ana fanau.  Ma e ui ina le auai le tina o Eseta i le faaiuga ua faia e si ona to’alua, ae peitai, sa lagolago malosi ia le fanau, o Ruta, Iakopo ma Naomi, i le mea ua mana’o iai si o latou tama, o le toe liliuina lea o lona igoa mai i le igoa a si ana uo o Tanielu, i lona igoa moni, o Alesana Penaia.

E ui ina iloa e le tamaloa o Tanielu/Alesana, e ono loka ai o ia i lana faaiuga lea, ae e pei ona sa ia fa’asoa mai i si ana fanau, ua o’o i le taimi e tatau ai ona faia lea tulaga, ona ua leva ona ia amoina lenei avega mamafa, o le ola ma se igoa, e le o sona igoa.

Ua sauni atu nei le tamaitai o Naomi e alu e faigaluega, ae manatua foi, o Naomi, e faigaluega faatasi ma le alii fomai o Taki, le atalii o le uo faapelepele a le tamaloa o Tanielu/Alesana, lea ua maliiu.

Ma ana le seanoa le augani a le tama a le alii fomai, semanu e le faia e le tamaloa o Tanielu/Alesana ia lea faaiuga, o le suia o lona igoa.

E alu lava la Naomi e faigaluega, ae fa’atu lava ina ne’i fetaui ma le alii fomai, e na te le iloa po o le a sana tala e fai i le alii fomai.  Aua ua silafia lelei e Naomi, le to’atama’i o le alii fomai o Taki, ina ua na iloa le mea lea e uiga i le igoa o lona tama, lea ua maliu.

Ma ua uma foi ona fai Taki i lona tina, o le a ia fa’auluina se tagi e fa’asaga ia Tanielu/Alesana, ona o lana mea lea ua fai.  E ui ina taumafai le fafine o Elena e faamanino atu ia Taki, o le mana’o lea a lona tama ma e le mafai ona tu’ua’i fua toatasi ia le tamaloa o Alesana, ae ua le toe fia fa’alogo mai Taki i lona tina.

Ina ua malaga ese uma atu le fanau a Alesana mai i le fale, mo galuega, ma le alii o Iakopo lea ua alu atu i ana aoaoga, na savali atu le tamaloa o Alesana i le la potu moe, lea o lo’o nofonofo ai si ona to’alua o Eseta ma le fa’anoanoa tele.

Ua saofa’i ifo Alesana ma ona taumafai e fa’aoleole le fafine o Eseta ina ia malamalama i le mafuaaga ua ia faia ai lenei faaiuga.

A’o faia le talanoaga a le ulugalii i totonu o le la potu, ae tatagi le la telefoni ma e tali atu e le tamaloa o Alesana, ae talanoa mai se tasi o a la tuaoi ma faapea mai, “Tanielu, e iai le fafine lea e i luma o le lua fale, ua fiu e tu’itu’i atu le lua faitoto’a.”

Ua tu nei i luga ia le tamaloa o Alesana ma fa’atopetope atu i le faitoto’a ma tatala mai.  Na toeititi lava a pa’u aga’i i tua ia le tamaloa o Alesana, ina ua tatala mai le faitoto’a, o lo’o tu atu ai le fafine o Elena, le tina a le alii fomai o Taki.

“Talofa Alesana,” o le fa’afeiloa’i atu lea a Elena i le tamaloa o Alesana, na toeititi ai lava matapogia.

[E FAIA PEA]