Ads by Google Ads by Google

O OE O LO’U TAMA?


[ata: SN]

VAEGA 76

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 76.

********************************************

Na matua’i fa’ate’ia le ulugalii o Alesa ma Eseta, i le talatalanoa atu a le fafine o Elena ma ‘ai’oi atu ia i la’ua, ina ia manatu alofa i si ana tama, le alii fomai o Taki.

Ua faapea mai Elena e faapea, “Ou te iloa, o a’u e mafai ona tu’ua’ia ai le mafua’aga o lagona le fiafia a si a’u tama.  Ona e le’i lava so’u talanoa atu ia te ia, e uiga i lona tama.”

Ua na o le fetilofa’i o Alesana ma Eseta, ua leiloa se la tala o le a fai.  Na o la fa’apea o le a masua atu le le fiafia o le fafine o Elena ia laua, ona o le mea ua tupu.  Ae peitai, o lea e fa’amaualalo atu le fafine ia la’ua ona o uiga o si ana tama.

“O a’u lea e fai sina o’u le malamalama i le mea lea o lo’o tupu,” o le tala lea a le tamaloa o Alesana.  “O lona uiga e te le o ita ia ma’ua?”

Ua ata le fafine o Elena ma fesili mai, “O le a le mea o le a ou ita ai ia oulua?”

“Ou te iloa lelei lava ma ou masani lelei i uiga o Tanielu a’o ma mafuta,” o le tala lea a Elena.  “Ma ou te malamalama lelei i lona alofa faaleuso ia te oe, a’o lua talavou.”

“Ina ua tupu le faalavelave lea sa maliu ai le alii talavou lea na agaleaga ia oulua, ma e fa’asaoina mai ai le ola o Tanielu, e le uma le talanoa o Tanielu i se auala e mafai ona totogi atu ai lou alofa fa’amaoni ia te ia,” o le fa’aauauina lea o le faamatalaga a Elena.

“Ma o le tulaga lena, sa pa’u ia te a’u ona faamatala i si a’u tama o Taki.  Atonu ana ou faamatalaina lea tulaga ia Taki, semanu e le ita faapenei, ae ona malamalama ma ona talitonuina le mea ua tupu.”

Ua va’aia le maligi o loimata o le tamaloa o Alesana ma ia tago atu opo mai le fafine o Elena.

Ua fafa leisi fa’afetai i luga o leisi fa’afetai, a le tamaloa o Alesana.

“O le a le mea e tau fa’afetai mai ai? Ana latalata mai Tanielu i le taimi nei, ua ta le ulu i se laupapa.  Ua mafatia le toatele o tagata ona o ana tonu faavalevalea,” o le tala lea a Elena ma ata.

E maligi lava loimata o Alesana ma ata ma faapea atu ia Elena, “O lea ua uma ona ou fai i lo’u afafine, o ia o le loia, e tapena mea uma faaletulafono, e mafai ona toe liliu lo’u igoa i lo’u igoa sa’o.  Ou te iloa, ua o’o mai le taimi e faia ai lea tulaga.”

Ua te’i le fafine o Elena ma faapea atu, “E le tatau ona e faia lea tulaga, e ono faafalepuipui ai oe.”

Ae peitai, sa faapea atu Alesana, “E ui i lo’u agaga fa’afetai i si a’u uo o Tanielu mo lona agaga alofa ia te a’u, ae peitai, ou te iloa, ua o’o mai le taimi e tatau ona ou toe fo’i ai i lo’u lava igoa.  O le mea moni, na talu lava ona ou tauaveina le igoa o Tanielu, e le’i lelei lava sa’u malologa i le ao ma le po, ona o le popolega ina ne’i o mai le malo loka atu a’u.”

Ua lue le ulu o le fafine o Elena ma faapea, ua na malamalama lelei i le faaiuga a Alesana lea ua fai.  Ma ia faapea mai ai, “O le a lava se mea e te mana’omia mai ia te a’u, pe mafai foi ona avea a’u ma molimau, e mafai lava ona ou fesoasoani atu.”

[E FAIA PEA]