VAEGA 80

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 80.

*****************************************

Ua usu nei le tamaitai o Naomi ma si ona tama, le tamaloa o Alesana, i le falemai lea e galulue faatasi ai Naomi ma le alii fomai o Taki.  

E alu lava le faigamalaga a Naomi ma si ona tama, ae ua le mafai e si teine ona taofiofi le tatavale o lona fatu ona o lona le mautonu i se tali o le a tali mai ai le alii fomai o Taki, pe a va’ai mai i lona tama.

Na iloa lelei e le tamaloa o Alesana le popole o si ona afafine, o lea na ia a’apa atu ai ma u’u mai le lima o si ona afafine ma ia faapea atu iai, “Naomi, aua e te popole mai ia te a’u.  Alu oe e fai fa’alelei lau galuega.  Ua ou malie lava e talia po o le a lava le tali o le a tali mai ai Taki ia te a’u.  Ae ou te tatalo pea, o le a maua so’u avanoa e mafai ona ou talosagaina ai lana faamagaloga.  Ma ou te faamoemoe lava, o le a iai se taimi i le lumana’i o le a mafai ona o ma nonofo faatasi ai i lalo ma mafai ona ou fa’asoa atu ia te ia, e uiga i si ona tua’a.”

Ua tilotilo ese le tamaitai o Naomi mai i lona tama, ina ia aua ne’i iloa mai e Alesana le maligi o ona loimata, ona o le alofa tele o si teine i lenei mea faigata o lo’o aga’i atu iai lona tama.

Ua taunu’u le ta’avale a le tamaloa o Alesana ma si ona afafine i le falemai.  Ma o la savavali fa’atasi atu i totonu.  Ua le mafai ona fa’ama’amulu e le teine o Naomi le lima o si ona tama, ua mau ai, e pei ua toe fo’i i lona olaga laititi i le taimi e ave ai o ia e lona tama i le a’oga, e mau lava le u’u a le teine i le lima o lona tama.

Ina ua o la taunu’u i totonu o le potu fa’atalitali a le falemai, sa faapea ona tago atu Alesana ma ave’ese lemu atu le lima a si ona afafine ma ia musumusu atu iai, “Alu e faigaluega.  Aua e te popole.  E leai se mea e tupu ia te a’u.”

Na faliu le teine o Naomi ma le maligi o ona loimata ma savali atu aga’i i le ofisa a Tausima’i, ae o le taimi lena ua savali atu ai le tamaloa o Alesana i le ‘elevator’ e ave ai o ia i fogafale pito i luga o le falemai, i le mea o iai le ofisa a le alii fomai o Taki.

Ina ua taunu’u ia le tamaloa o Alesana i le fogafale o iai le ofisa a Taki, sa ia savali atu i le laulau o lo’o nofo mai ai le leoleo po o le sikulaki ma ia talosagaina sona avanoa e mafai ai ona alu atu e feiloai ma le alii fomai.

Na faapea mai le sikulaki e fa’atali se’i vala’au muamua i totonu o le ofisa a le alii fomai pe finagalo e la te talanoa.

“Faamolemole lau susuga i le fomai, o lo’o iai se tama i fafo i’i o lo’o fia maua sona avanoa ma oe,” o le tala lea a le alii sikulaki i totonu o le telefoni.

“O ai lou suafa?” o le fesili mai lea a le sikulaki ia Alesana.

“O Alesana,” o le tali atu lea a le sikulaki i totonu o le telefoni.

E le’i umi ae tu’u i lalo e le sikulaki ia le telefoni ma ia faapea mai ia Alesana, “E faamalie atu o lo’o pisi le alii fomai.”

Sa punou le ulu o le tamaloa o Alesana ma moeiini ona mata ona ia toe ea a’e lea i luga ma ia faapea atu i le sikulaki.  “Faamolemole lava lau susuga i le malu o le malo, e le o se fia faigata, ae faamolemole lava pe mafai ona fesiligia le susuga i le alii fomai, po o le a se taimi lelei e mafai ona maua ai so’u avanoa? E mafai ona ou toe sau ai.”

Ua faapea ona toe si’i i luga e le sikulaki ia le telefoni ma toe o’omi le numera o le ofisa a le alii fomai ma ia faapea atu, “Faamalie atu i lau susuga, ae o lo’o fesili mai si tama, po o le a se taimi lelei e mafai ai ona toe fo’i mai ai.”

Sa le’i umi ae toe tu’u i lalo e le sikulaki le telefoni ma ia faapea atu ia Alesana, “E faamalie atu lava tama, ae o lo’o fai mai le alii foma’i, e le maua sona avanoa nei.”

Ua fa’afetai atu iai ia le tamaloa o Alesana i le sikulaki ma ia toe savali agai i le ‘elevator’.  E matala le ‘elevator’ ae toe liliu mai Alesana ma toe savali mai i le sikulaki ma ia faapea atu iai ma si ona leo filemu, “Faamolemole lava lau susuga, pe mafai ona ou nofo i’i, ona e fai sina mamao o le mea ou te malaga mai ai, ae pe mafai ona ou nofonofo i’i, a iai lava sina avanoa e tasi a le alii foma’i, e mafai ona maua mo a’u.”

Ma ua faapena ona talia e le sikulaki ia le mana’oga a le tamaloa o Alesana.  

Ua savali atu nei Alesana ma saofa’i ifo i le nofoa ma faatalitali ai sona avanoa ma le alii fomai o Taki.

Ua ta le 12 i le aoauli, ae e leai lava se tali mai ia Taki.  Ua savalivali atu le vae o le uati i le 1:00 i le aoauli.  Ae o lo’o fa’atalitali pea ia Alesana.  Ua latalata i le ta o le 2 i le aoauli, ona faapea mai lea o le sikulaki i le tamaloa o Alesana, “Tama, ae a pe a e alu e fai sau taumafataga o le aoauli ona e toe fo’i mai ai lea taeao, ua alu le aso.”

Ae na tali atu Alesana, “Leai, o lea ou te seki lava.  Ae a mafai mai sina au ipu vai e fa’asusu ai lo’u fa’i, faamolemole lava.”

Na savali atu le alii sikulaki aga’i i ofisa pito i tua ma toe fo’i mai ma le ipu vai ma tu’u atu ia Alesana.

Ua fa’afetai atu iai Alesana ma fa’aauau pea ona fa’atalitali.  Ua lata i le ta o le 4 i le afiafi, o le taimi e manava ai tagata faigaluega, ae e le’i maua lava se avanoa e feiloai ai Alesana ma Taki.

[E FAIA PEA]