Ads by Google Ads by Google

O OE O LO’U TAMA?


[ata: SN]

VAEGA 81

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*************************************************

Sa gata mai le tatou Fagogo i le vaiaso ua mavae, i le taimi na usu ai le tamaloa o Alesana e saili se avanoa e talatalanoa ai ma le alii fomai o Taki.

Ae e ta ifo lava le 4 i le aoauli, o le taimi e manava ai galuega, o la lava e nofonofo si tamaloa o Alesana i le potu fa’atalitali a le ofisa foma’i lea e galue ai Taki.

E fetaui lava le tu mai i luga o le sikulaki e toe savali mai i si tamaloa o Alesana, ae taunu’u loa foi ma le teine o Naomi, le afafine o Alesana, i luga o le ofisa a foma’i.

Ua savali atu nei Naomi atu i lona tama ma le loto popole ma le loto momomo i lona vaai atu, o lo’o saofa’i mai pea lona tama i le nofoa e faatalitali ai mo se avanoa i le foma’i.

Ua faatopetope atu Naomi i si ona tama ma fesili atu iai, “O a mai oe?”  Na ea ifo i luga le ulu o le tamaloa o Alesana ma ata mai i si ona afafine ma faapea mai, “O lea ou te okay.  Ae ai o pisi lava si foma’i.”

Ua tilotilo atu nei ia Naomi i le sikulaki ma fesili atu iai, “O lona uiga e le i maua lava se avanoa o lo’u tama i le tou foma’i?”

Ua le mautonu si sikulaki i le osofa’iga o ia e lenei tamaitai ma sa tilotilo mai iai le sikulaki ma ona maitauina la’ei a tausimai o le latou falema’i lea e la’ei e le teine o Naomi.  Ua malamalama le sikulaki, o se tasi nei o a latou tausima’i.

“E faamalie atu ia te oe, ae sa matua’i pisi lava le fomai i fonotaga i lenei aso,” o le tau faamalamalama mai lea a si sikulaki.

Ua si’isi’i nei le leo a le teine o Naomi, “O ai na e fa’aali iai le fia tagata o le tou foma’i?  E le mafai lava ona se’i sau tasi i fafo e fai mai sana faamatalaga i le taliga o le mamalu o le atunu’u?”

O le taimi lea, na amata ai loa ona matalatala faitoto’a o ofisa a leoleo ma savavali mai i fafo e vaai po o le a le mea ua tupu ona o le leotele ma le ita o le teine o Naomi.

Sa taumafai atu si tamaloa o Alesana e fa’ato’ato’a lona afafine, ae ua le mafai le ita o le teine o Naomi ona o le tiga o lona loto i lana va’aiga ina ua savali mai, o lo’o saofa’i punou atu lava si ona tama, ae o lo’o silafia e Naomi, na o la usu fa’atasi mai ma lona tama i lena taeao.

“Vaai, e le o outou ni Atua.  O outou o tagata ola.  E tou te sasi foi.  A fa so tou manatu, ae o tou matua ia e fai iai uiga le alofa o tagata faapenei?” ua atili ai le ‘ava’avau a le teine o Naomi.

“Faamolemole tamaitai, e sili ona o lua tu’umuli loa ma si ou tama, ae ou te le’i valaauina ia leoleo,” o le faatonuga lea a leoleo na atili ai ona le lelei le pupula a Naomi.

“Valaau, faapea ou te popole iai.  Valaau! Se’i iloa ai foi e tagata ia ituaiga uiga e iai tou fomai,” o le leotele mai lea a Naomi.

O le taimi lea na va’aia ai loa le savali mai o le alii fomai o Taki ma faapea mai i fomai lea ua faatumulia ai le potu faatali a le latou ofisa, “E faamalie atu lava ia te outou ona o lenei fa’alavelave, ae susu atu i totonu o tou ofisa e fa’aauau a tou galuega, faitalia a’u ma le faafitauli lenei.”

Ua amata loa ona toe taitasi ma fo’i atu le foma’i i lona potu ma tapuni mai a latou faitoto’a.  Ae o le taimi lea na geno atu ai le alii fomai o Taki i le sikulaki e toe fo’i o ia i lana laulau.

Ae ua savali mai Taki ma tu i luma o Naomi.  Ma o le taimi lena na tau tula’i atu ai ma le tamaloa o Alesana mai lona nofoa.  Ae peitai, sa fa’ate’ia Taki ma Naomi ina ua toe palasi i lalo Alesana i luga o le nofoa, ua leiloa se mea.

[E FAIA PEA]