Ads by Google Ads by Google

O OE O LO’U TAMA?


[ata: foa'i]

VAEGA 82

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 82.

*******************************************

Ina ua toe palasi atu i lalo ia le tamaloa o Alesana, ina ua tau tu mai i luga, sa alaga atu le teine o Naomi, “Dad!”

Na tamo’e mai le alii foma’i o Taki ma taumafai e fa’alogo le fatu o le tamaloa o Alesana ma ia fa’atonuina le sikulaki e si’i atu Alesana i totonu o le potu togafiti.

Ua galo le ita o le tamaitai o Naomi i le alii fomai o Taki, ae ua o la galulue faatasi nei e taumafai e lavea’i mai ia le tamaloa o Alesana lea ua matapogia.

Sa faapea atu le alii sikulaki a’o galulue lava Naomi ma Taki, “E le’i faia sana taumafataga i lenei aso atoa, seia vagana ai lana ipu vai lea na inu analela.”

Ua atili ai ona maligi loimata o Naomi ma fa’amalo atu lana pupula ita ia Taki.  Ae na matua’i le ano mai ai lava o le alii fomai, a’o topetope lana gaioi.

Ua tui nei le IV o le tamaloa o Alesana ma ua nonofo a’e nei i lalo ia le alii fomai ma le teine o Naomi e to a la sela.

Ua matua’i leai o se toe fia talanoa mai o le teine o Naomi i le alii fomai o Taki, ua na ona nofonofo lava i tafatafa o si ona tama ma u’u lona lima.

“E te mana’o e vala’au lou tina ai o popole mai i lou tama,” o le tala lea a Taki.

Na tago le teine o Naomi, e aunoa ma se faamatalaga mai ia Taki, ma ava’e i fafo lana telefoni ona ia valaau loa lea o lona uso matua ma fa’ailoa iai le mea lea o lo’o tupu ina ia aua ne’i popole lona tina.

Ua mae’a lea ona toe u mai lea o le papatua o Naomi i le alii fomai ae fa’aauau lava ona u’u le lima o si ona tama.

“Naomi…” o le tau fai atu lea a Taki, ae fa’asaga mai le teine o Naomi ma faapea mai, “Ou te le fia fa’alogo i sau faamatalaga i le taimi nei.  Se’i malosi mai si o’u tama ona ta toe talanoa lea.”  Ma toe liliu atu i le u’u le lima o lona tama.

Sa tula’i loa i luga le alii fomai ma ia savali ese atu.

E pe a ma le 20 minute, ae tamomo’e atu loa le fafine o Eseta ma si ana fanau o Ruta ma Iakopo.

“O le a le mea ua tupu?” o le fesili atu lea a Eseta ia Naomi.

“Aua e te popole Mom,” o le faamalosi’au mai lea o Naomi.  “O lo’o malosi lona fatu, ae o lena e fafaga lana IV ona ua alu le aso atoa e le’i ai.”

“Auoi, ae aisea?” o le toe fesili atu lea a Eseta ma ua savali atu nei saofa’i i tafatafa o lona to’alua ma u’u mai lona lima.

Ua le gagana Naomi ua na’o na pupula atu i nai ona tei matutua ma geno atu iai.  Ona o latou savavali ese lea ina ia aua ne’i lagona mai le latou talanoaga.

“O fea sa iai Dad ua ma’i ai?” o le fesili lea a Ruta.

“Na usu mai ananei e va’ai ia Taki, ae na alu le aso atoa o faatali ae e le i maua se avanoa o Taki.  Ae ua le ‘ai atu ai lava.”

E le’i uma lelei atu le faamatalaga a Naomi, ae liliu lona uso matua o Ruta ma savali atu agai i le ‘elevator’ ma fesili mai, “O fea o iai le ofisa a le alii lena?”

[E FAIA PEA]