VAEGA 83

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***********************************************

Sa gata mai le tatou fagogo i le vaiaso ua mavae, ina ua savali le teine o Ruta e su’e le ofisa a le alii fomai o Taki, ona o lona ita tele, i le faataotolia o si ona tama, le tamaloa o Alesana, i le falemai, ona ua alu le aso atoa, o saofa’i i luma o le ofisa a Taki, e faatali sona avanoa e la te talanoa ai, ae peitai, sa le’i taliaina e Taki le mana’o o le tamaloa o Alesana.

O le nofonofo ai a Alesana i luma o le ofisa a Taki, ua le ‘ai ai lava ma i’u ai ina matapogia.  Ma o lea ua tautau ai lona IV i le falemai, ae e le’i te’I mai lava i luga.

O le to’atama’i tele o le teine matua, o Ruta, na savali faatopetope atu ai i le ‘elevator’ e alu i luga e su’e le ofisa o le alii fomai, se’i fai iai sana tala.

Ua tamo’e mai si ona tuagane o Iakopo ma taofi atu o ia ma faapea atu iai, “E te mana’o e valaau e le falemai ia leoleo?”

Ae ua matua’i pogisa lava e mafaufau o le teine o Ruta ma faapea atu i lona tuagane, “O ai lava ia e mafua ai ona ia faia le tatou tama faapea?  Faakali mo’i pe a ou o’o atu i luga o loga ofisa, ou ke po fa’aleleia lava foliga.”

Ua matala le ‘elevator’ ma oso iai totonu le teine o Ruta ae mulimuli atu ai ma lona tuagane e taumafai e fa’ato’ato’a mai lona tuafafine.  Ae ua le mafai lava.

E fa’afetai na taunu’u atu le to’alua lea i le mea o iai le ofisa a Taki, ae faapea mai le sikulaki, “O le susuga i le alii fomai, ua malaga atu i lona fale, ua manava ana galuega.”

Ua toe fo’i mai i lalo ia Iakopo ma Ruta, ae e le’i uma lava le ita o Ruta.

“Ua laki le alii le la ua vave magava, semagu e uma ona o’u sasa i le uaea o laga kelefogi, ae fa’apulou i lana lapisi,” o le tala ita lea a le teine o Ruta.

Ua savavali atu nei ia Ruta ma Iakopo ma nonofo atu i tafatafa o le la tina, lea lava o lo’o saofa’i i tafatafa o le moega a le falema’i, lea o lo’o ta’oto ai le tamaloa o Alesana.

Ua faliu mai le fafine o Eseta ma faapea atu i lana fanau, “O i le fale e vaai faalelei le fale.  O a’u lea o le a ou moe iinei ma le tou tama.  Iakopo vaai le fale’aiga e tapena e oe le mea’ai mo tagata faigaluega i le vaveao, ona toe tapuni lea.  Se’i va’ai pe ma te tete’e atu ma le tou tama taeao.”

E tau fai atu le finau a Iakopo ae toe faapea mai lona tina ia i latou, “O i le fale.  Ruta ma Naomi, fesoasoani i le lua tuagane.  A iai seisi mea e tupu nanei, o le a ou valaau atu.  Ae o lea e fai mai le foma’i o lo’o lelei mea uma, tau lava o le vaivai o lona tino i lona le ‘ai.”

O le a savali ese atu le fanau toatolu lenei, ae toe faapea atu Eseta i lana fanau, “Ou te le mana’o e tou te toe o e va’ai ia Taki.  Tu’u pea o ia, aua ne’i toe fa’alavelave iai seisi.  Ua outou malamalama?”

[E FAIA PEA]