O OE O LO’U TAMA?
VAEGA 88
E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa. E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.
Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?
******************************************
Sa gata mai le tatou Fagogo i le vaiaso ua mavae, ina ua toe te’i ifo i luga le tamaloa o Alesana lea na atoa le aso o matapogia i le le ‘ai i luga o le ofisa a le alii foma’i o Taki.
E tusa o le leva o le po na te’i mai ai le tamaloa o Alesana ma o lo’o fa’atalitali le taunu’u atu o lana foma’i e siaki o ia. Ma o lo’o nofonofo si ona to’alua, le fafine o Eseta, i ona tafatafa ma o la fa’atalitali le taunu’u atu o le foma’i, ae matala loa le faitoto’a o le potu.
Na matua’i fa’ate’ia Eseta ina ua va’ai mai, faapea o ia o le foma’i a lona to’alua, ae savali atu i totonu le alii fomai o Taki.
Sa leai lava se tala a Taki na faia ia Eseta, ae ua ia savali atu lava i le moega o lo’o taoto mai ai le tamaloa o Alesana, ma amata ona siaki o ia.
O le tago atu la a Taki i le lima a Alesana, na toe tatala mai ai mata o le tamaloa ma te’i ai i lona tilotilo mai, o Taki lea e tu i ona luga.
Sa taumafai Alesana e saofa’i mai i luga, ae faapea atu iai le alii fomai o Taki, “Aua e te minoi. Taoto pea oe ia, ina ne’i te’i ua toe tupu seisi fa’aletonu.”
Ua toe taoto ifo i lalo le tamaloa o Alesana, ae ua le ‘emo ona mata mai i foliga a le alii fomai o Taki.
Ua mae’a suesuega a le alii fomai, o le a toe savali ese, ae ona liliu mai ma faapea mai i le ulugalii o Alesana ma Eseta. “Ia gata i le aso ona o tatou toe feiloai. Tu’u mai se taimi se’i o’u mafaufau ai.”
Ona ulufafo atu loa lea o Taki mai i le potu, ae ua na o le sa o o le ulugalii ma fa’ataupupula mai i le faitoto’a lea na ulufafo atu ai ia le alii fomai o Taki.
Ua fai sina leva e leai seisi e toe tautala ona faapea mai lea o le tamaloa o Alesana, “Ia o tatou faia e pei ona mana’o ai Taki. Ia aua ne’i toe fa’alavelave iai seisi o le tatou aiga.”
Ua le tautala ia Eseta ae ua na o le lue o lona ulu ma ona punou. Ae o le taimi lea i le tamaloa o Alesana, ua moeiini ona mata, ma toe moe.
O le vaveao o le aso na soso’o ai, na usupo mai ai lava le fanau to’atolu a le ulugalii i le falemai.
O se feiloaiga fiafia sa fa’alogoina i totonu o le potu a le tamaloa o Alesana i lena taeao, ma si ana fanau o Ruta, Iakopo ma Naomi.
Ana le ote atu ai lava le fafine o Eseta i le latou talie leotetele, e le tu’utu’u i lalo leo a le tamaloa ma lana fanau, ona o le fiafia tele i le toe ala manuia mai o si o latou tama.
Ua faapea atu nei ia Alesana i lana fanau, “E iai le mea lea ou te fia talanoa atu ai ia te outou, fa’alogo fa’alelei mai si a’u fanau.”
Ua vave tu’u le talie a le fanau to’atolu a Alesana ma Eseta, ae ua fa’alogologo toto’a mai i upu a le latou tama.
“Amata atu i le aso, ia aua lava ne’i o tatou toe fa’alavelave i si tama o Taki. Ou te iloa o tatou lea o lo’o tele lo tatou sese ia te ia. Ae iai se faamoemoega o le a sau se taimi, o le a mafai ona ia fa’amagalo mai i ma’ua ma le tou tina. Ae fa’alogo faalelei mai si a’u fanau, aemaise lava oe lea Ruta. Aua ne’i outou toe faia se tala pe taumafai e saili ia Taki.”
Ua ioe uma atu le fanau to’atolu a le tamaloa o Alesana i lana faatonuga. Ona faapea mai lea o Eseta, “O mai loa e o la’a tou tuai. Ua uma ona fai se tou meaai o le taeao?”
Ua tutu nei i luga ia Ruta, Iakopo ma Naomi o le a tu’ua o latou matua, ae toe fesili mai le tamaloa o Alesana ia Ruta, “Ua a mai le ta mataupu?”
“Se’i o’o i le aoauli ona ou sau lea i la’u taimi malolo e ta te talanoa ai. Ae malolo faalelei, ne’i te’i ua toe oso lou ma’i,” o le tala lea a le teine o Ruta ma savali atu agai i le faitoto’a ma faapea mai i lona tina, “Mom, a te’a nei Dad ona valaau atu lea ou te vave sau e momoli oulua i le fale.”
Ua faamavae nei le fanau ma tu’ua le potu a o latou matua.
[E FAIA PEA]