VAEGA 90

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 90.

***************************************************

A’o faia le taumafataga a le tamaloa o Alesana ma lona to’alua o Eseta i totonu o lona potu i le falemai, o le taimi lea o lo’o pisi ai le teine o Naomi i ona tiute fa’aletausima’i i totonu o le falemai lea o lo’o taofia ai lona tama, ae sa ia maua le taimi e afea ai le potu a si ona tama, e latou te talatalanoa.

E taunu’u atu le teine matua o Ruta, o lo’o talatalanoa fiafia mai ona matua ma lona uso laititi o Naomi ma sa faamavae loa Naomi, e toe fo’i i lana galuega.

“Ou te toe afe mai pe a ou manava ae ou te le’i alu i le fale,” o le tala lea a Naomi ma savali atu i fafo o le potu.

Ua saofa’i ifo le teine o Ruta ma ia fesili i lona tama po o a mai lana fa’alogo.  

Na faapea atu le tamaloa o Alesana, “Ua tuai na kilia mai a’u e le foma’i, ae se’i o’u alu i le fale e va’ai la’u fale’aiga.  Na o le maimau o le taimi ma tupe i le nofonofo i lenei falema’i.”

Ua talie le teine o Ruta ma si ona tina o Eseta.  Ona faapea atu lea o Ruta, “E faafetai o lea ua e maua sina taimi e te malolo mai ai.  Anusa foi le le lava o le i’ila o lau fale’aiga i le fufulu so’o ma tapena so’o.”

“Talosia o lelei le faiga e Iakopo o le fale’aiga,” o le tala lea a le tamaloa o Alesana.

“Ia o le mea lena, aua e te popole ai, e pei uma lava o la ua maua se paga fesoasoani a Iakopo, e fesoasoani ia te ia i le fale’aiga,” o le tala lea le teine o Ruta ma ata.

“O le a le uiga o lau tala?  O ai na e fai iai lau tala?” o le oso atu lea o le fafine o Eseta.  “Ia e magamaga lava guku a Iakopo ae o’u alaku ua avaku se keige i le fale ae ma ke le o iai.”

Ua ata leotele le teine o Ruta ma faapea mai, “Ia se’i lua te’a atu i tua na lua fesili lea ia Iakopo.  Ou te le i va’ai i se teine, ae e iai lava o’u masalosaloga…”

“Fefe ia Iakopo ga kuli aku e alu fai aga a’oga ae…e faakali mai gei,” o le tomumu lea a Eseta a’o tau fa’ato’ato’a mai e le tamaloa o Alesana.

Ua liliu atu nei ia Ruta i lona tama ma faapea atu iai, “O lea ua fa’atulaga uma ia mea uma ina ia mafai ona sui lou igoa ma ia toe maua ou fa’amaumauga.  Ia ma o lea foi ua sauni le matou ofisa loia e tauave lau mataupu pe a faapea e toe ola mai ou tu’ua’iga mai le taimi o lou talavou.”

Ua fetilofa’i ia Alesana ma le fafine o Eseta ma sa va’aia foliga popole ia Eseta.  Ae sa po po mai lona lima fa’amafanafana e Alesana.

“O lea matou te taumafai e saili le alii lea sa avea ma molimau a matua o le tamaititi lea na maliu.  O ia lava lena o le ki ma le loka o lau mataupu lea.  A mafai ona ia fa’amaonia e le sa’o lana molimau lea sa fai, o le a fa’afaigofie ai loa le tatou mataupu,” o le tala lea a Ruta

“Fa’afetai lava Ruta,” o le tala lea a Alesana.  “Faamoemoe ia o le a sologa lelei mea uma o lenei mataupu.”

E le’i uma lelei atu le fa’amatalaga a Alesana, ae toe matala mai le faitoto’a o le potu ma toe savali mai i totonu ia Naomi, ma ona foliga, e pei sa tagi.

“Dad, o lea ua fa’amavae ia Taki mai i lana galuega.  O taeao lea e fai ai le fa’amavaega ma le falema’i, ma o lea ou te fa’alogo atu, ua maua sona avanoa e galue ai i se falemai tele i atunu’u i fafo.”

[E FAIA PEA]