VAEGA 91

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

***************************************************

Na gata mai le tatou Fagogo i le vaiaso ua mavae, ina ua alu atu le teine o Naomi ma ta’u i ona matua le faamavae o le alii fomai o Taki mai i lana galuega i le falemai.

Sa fa’ate’ia ia le tamaloa o Alesana ma le fafine o Eseta ona o lenei tala, ma sa o la lagona le agaga fa’anoanoa ona o lo’o la malamalama lelei i le mafua’aga ua fa’amavae ai Taki mai lana galuega.

Ua faapea atu ia Alesana i lona afafine, “Atonu o le a sau se taimi, o le a mafai ona ia talia le tatou fa’ato’esega.”

Na toe savali atu i fafo ia le teine o Naomi mai i le potu falema’a  lona tama, ma lona agaga fa’anoanoa tele ona o le tala ua maua e uiga ia Taki.  O le itu na fa’anoanoa ai tele ia Naomi, ona o lo’o ia iloa, o le latou aiga lea ua mafua ai ona fa’amavae ia le alii fomai.

Na alu le mafaufau o Naomi i le taimi mulimuli na o la fesaga’i ai ma le alii fomai o Taki, i luga o lona ofisa, i le aso na tupu ai le fa’alavelave i lona tama.  Sa lagona e Naomi lona fa’anoanoa tele, ona i lona ita tele, sa le tulaga lelei ai fa’amatalaga sa ia lafoina ia Taki i lena aso.

Sa matua’i lagona e Naomi lona agaga salamo e tusa ai ma lana mea sa ia faia, e ui lava i lona va’ai alofa i si ona tama, sa iloa lelei lava e Naomi, le le sa’o o ana faamatalaga sa lafo ia Taki.

Na tele le fia alu o Naomi e fa’ato’ese i le alii fomai, ae peitai, sa ia mafaufau i le fa’atonuga a lona tama sa fai atu ia i latou ma ona tei matutua, ina ia aua ne’i toe fa’alavelave seisi ia Taki, ae ia tu’u o ia, atonu o le a iai se taimi i luma o le a mafai ona fa’aofi atu ai se fa’amatalaga po o se fa’ato’esega i le alii fomai.

Na alu lena aso o fai lava galuega a Naomi (manatua o Naomi lea e galue i le falemai lava lea e tasi e iai Taki), ae peitai, sa le’i lelei lava lona mafaufau ona o lo’o alu lava ia Taki.

Ua lata i le taimi o le a manava ai Naomi ma ua tonu i lona mafaufau, o le a alu e va’ai ia Taki ina ia fa’ato’ese iai ae e le’i alu ese atu.

Ua savali atu nei ia Naomi ma oso i le ‘elevator’ ma agai loa i le fogafale o lo’o iai le ofisa a Taki.  E alu lava le ‘elevator’ ae o le taimi lena ua le motu le tatalo a Naomi ina ia mafai ona le tuli’esea o ia e Taki.

E fetaui le matala o le ‘elevator’ i le fogafale o iai le ofisa a Taki, ma savali mai i fafo ia Naomi, ae savali mai loa le alii fomai o Taki mai totonu o lona ofisa.

Ua na o le tu o le teine o Naomi ma pupula to’a atu ia Taki, ua leai sana tala e mafai ona fai atu iai.

[E FAIA PEA]