VAEGA 97

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou fagogo O OE O LO’U TAMA?

**********************************************

Na gata mai le tatou Fagogo i le vaiaso ua mavae ina ua valaau mai le fafine o Eseta i lana fanau teine o Ruta ma Naomi, e o atu e fa’amavae i le uo teine a le la tuagane o Iakopo, lea o le a alu.

Ae manatua foi, o le tamaitai lea ua fa’auo ma Iakopo, o le tamaitai o Salome lea sa fai ma sasa o si teine o Naomi a’o la a’o’oga fa’atasi.  Taimi lena o la e lapo’a si teine o Naomi ona o le fiafia o si ona tama, le tamaloa o Alesana, e fafaga.  Ae na avea ma tulaga na fai ai ma mea ula a le toatele o tamaiti ma teineiti a’oga, ia si teine o Naomi, i le lapo’a.  Ae o le maula lea o Salome sa fai ma ta’ita’I o i latou na taufaifai ma ula ia Naomi.  O nisi o taimi, sa o’o lava a latou tausuaga i le sauaina o si teine o Naomi.

E le’i iloa la e Salome, o le tuagane lea a le teine sa ona fa’atigaina a’o la a’o’oga, le alii o Iakopo.  Le alii ua gagau iai lona loto.  Ae sa fa’ate’ia o ia ina ua na va’aia ata o le teine lapo’a lea sa masani ona fai ma ana mea sasa i le vaitaimi na a’oga ai, o tautau i totonu o le potu malolo a le aiga o Iakopo.

Toe oso ma lona afu malulu ina ua ia malamalama ifo, o le tuafafine lea a Iakopo sa fai ma ana mea sasa i totonu o le a’oga.

E talatalanoa lava la ia Salome ma matua o Iakopo i lea afiafi, ae ua matua’i leai se tala o ona lagonaina ma e pei o se fafine ma’itaga le tau fa’asuati o le tamaitai ona ua ese lava lana fa’alogo i lea taimi.

Ua o fa’atasi le popole ma le pala’ai o Salome, ina ne’i sau Salome fa’atupu se misa i luma o ona matua ma iloa ai e Iakopo lana mea sa fai i lona tuafafine, a’o la a’o’oga.

Na matua’i li li vale ia Salome ina ua valaau le fafine o Eseta ia Naomi ma Ruta, e o mai e fa’atofa atu ia te ia, ina ua o’o i le taimi o le a malaga ese atu ai i lea afiafi.

Sa tu malie ifo i luga ia Salome, ae o le taimi lea ua sisina lona afu, e pei o la e tu i fafo i le la, ae le o totonu o le potu AC.  Ma li li vale solo, ua na leiloa po o le a lana taga o le a fai.

“Salome, faafetai lava asiasi mai i si o matou aiga fa’atauva’a,” o le tala lea a le teine o Ruta ma savali mai i le tu tonu lava i luma o Salome.  “Ua leva ona ou fa’atalitali mo oe.”  

Ina ua fai atu le tala lea a Ruta ia Salome, sa ia pupula to’a lelei i mata o Salome.

Ua fesili mai Iakopo, “O le a le uiga o lau faamatalaga?”

Na ata le teine o Ruta ma ia tago u’u lima o Salome ma o’omi malosi lava.  Sa lagona e Salome le tiga o ona lima, ae ua le suia ai lana laumata ataata lea e fa’aali mai ia Ruta.

“Oi, o lea ou te fai atu ia Salome, ua leva tele ae lea fa’ato’a e aumaia se teine i le tatou fale.  Fa’apea ailoga e te fiafia i teine,” o le tala lea a Ruta ma liliu atu i lona tuagane ma ata leotele.

“Salome, toe asiasi mai i seisi taimi, e tele lava ni a’u fesili lea e fia atu ia te oe,” o le tala lea a Ruta ma ona toe pupulato’a atu ia Salome.

Ona ia valaau atu lea ia Naomi, “Suga, sau e fa’atofa ia Salome.  A laki ta’ua, o le a maua seisi a ta uso.”

[E FAIA PEA]