VAEGA 113

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

**************************************************************

Na gata mai le tatou Fagogo i le vaiaso ua mavae, ina ua toe fo’i atu le alii o Taki i le aiga o le tamaloa o Alesana ma le fafine o Eseta ma le la fanau o Ruta, Iakopo ma Naomi mo le faia o se latou fa’aleleiga.

O se afiafi o loimata maligi, o le toe soso’oina o aiga, o se afiafi o faamagaloga ma le fa’aalia o le alofa i le va o le alii fomai o Taki ma le aiga a le uo a si ona tama, lea ua maliu.

A’o talatalanoa ma ‘a’ai fiafia ia le aiga o Alesana ma le alii fomai o Taki, na fesili atu ia Naomi ia Taki, “E moni lau faamatalaga, o lena ua e toe fia sau e nofo iinei?  Ae faafefea lau galuega?”

Na tali mai le alii fomai, “Ou te le’i faamavae mai i la’u galuega ina ua ou alu ese.  Sa fai o’u aso livi ma na ou toe fo’i atu i le ma fale ma lo’u tina.  O iina lea sa ou iai e mafaufau leisi la’asaga o lo’u olaga.”

Ua ataata le tamaloa o Alesana ma faapea atu ia Taki, “Fa’afetai lava Taki, i lou agaga malamalama.  Ua ou va’aia uiga o si ou tama ia te oe.  Ma faamolemole, e momoli atu le matou agaga fa’afetai i si ou tina, pe a lua toe talanoa.”

Na luelue mai le ulu o le alii fomai ma fa’aauau lava ona ‘ai.

“Eseta, ua leva ona ou misia lau kuka,” o le tala ‘ata lea a Taki.

Ua ata leotele ia Eseta ma faapea mai, “Tu’u loa au tala taufa’ase’e a.  O lena e te silafia lelei lava o Alesana le kuka o le tatou aiga”.

Ua toeititi lava a mae’a le taumafataga o le afiafi a le aiga, ae fa’ato’a taunu’u atu loa le alii o Iakopo.

Na talie leotele ia le aiga ina ua va’aia foliga le mautonu o Iakopo, ina ua vaai atu o saofa’i mai ia Taki i le laulau ‘ai.  Ua tu mai i luga Taki ma opo atu Iakopo ma ia faapea atu, “Sa ou misia lava oe si o’u uso.”

[E FAIA PEA]