VAEGA 114

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 114.

***************************************************

Ua savali lava le vae o le uati i lea afiafi, ae na leai seisi o le aiga a le tamaloa o Alesana ma le fafine o Eseta na vaaia le vaivai po o le fia moe, ona ua leai lava seisi o fia faamotu le talanoaga fiafia po o le feiloaiga fiafia, ma le alii fomai o Taki.

Sa o’o le talatalanoa a le aiga i le folasaga a le teine o Ruta, lea sa ia fa’ailoa atu ai i si ona tama le tulaga o le la o’o atu i le Ofisa o Leoleo i le taeao e soso’o ai, ina ia mafai ona fa’agasolo ia le mataupu, e mafai ai ona toe suia lona igoa ma ona pepa faamaumau.

O iina fa’ato’a va’aia ai le liua o le fiafia i le fa’anoanoa, aua o le mea moni lava, o lo’o iai se avanoa tele, e ono toe loka ai le tamaloa o Alesana pe afai e o’o atu e fa’ailoa atu i le Ofisa o Leoleo le mea sa o la faia ma Tanielu.

Ae peitai, e pei ona fa’alototele mai le teine o Ruta i si ona tama faapea ma lona aiga, o se puniala e tatau ona o latou sopoia ina ia mafai ai ona toe fa’afo’i lo latou aiga i se tulaga lelei.

Na fa’ailoa atu foi e le teine o Ruta, o ia lea ua tu’uina mai se fa’atagana a lana pule, e malolo ai mo sina masina, ina ia mafai ona fa’aalu uma lona taimi ma lona malosi, i le mataupu a lona tama pe a o’o atu i le faamasinoga.

Ma na fa’ai’u le folasaga a le teine o Ruta, i lona faapea atu i si ona tama, le tamaloa o Alesana, o lea ua talia e le faamasinoga ia le talosaga ina ia fa’atonuina le ofisa a leoleo, e toe faia su’esu’ega i le mataupu lea na a’afia ma lokaina ai Alesana a’o talavou o ia.

Na ta’ua e Ruta, o leisi lea la’asaga o le latou taumafaiga, o le saili mai lea o le molimau lea na tu mo le aiga o le tamaititi mau’oa lea na maliu, ina ia taumafai e u’una’i o ia, e fa’amaonia le totogi o ia e le ulugalii mau’oa, po o matua o le alii lea na maliu, ina ia ona fa’asino le lima ia Alesana.

Sa faapea atu le alii fomai o Taki i le teine o Ruta, “O le a lava se mea e te mana’omia ai la’u fesoasoani, aua ne’i e fa’avaivai i lou fesili mai.  Ua ou saunia e fesoasoani i so’o se tulaga tau tupe, po o le fa’aaogaina o o’u so’otaga, ina ia mafai ai ona tatalaina faitoto’a.”

Ua toe amata ona maligi loimata o le aiga, ma ua faapea mai le tamaloa o Alesana, “Faafetai Taki i lou alofa ma lou agaga loto maualalo.  Ou te iloa, ana soifua mai Tanielu, e matua’i mimita lava i lou tuputupu a’e o se tagata fa’amaoni ma le alofa.”

Ae ua faapea mai Taki, “E leai se mea e te tau fa’afetai mai ai.  Ou te iloa, ana soifua mai lo’u tama, e te le o’o i se mafatiaga e tasi.”

E faia lava le talanoaga a le aiga, i lea afiafi, ae na va’aia lava e le teine o Ruta, e le o atoatoa le fiafia o si ona tuagane o Iakopo.

[E FAIA PEA]