VAEGA 115

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

****************************************************

Na gata mai le tatou Fagogo i le vaiaso ua tuanai, ina ua alu le po atoa o talatalanoa fiafia ia le aiga o le tamaloa o Alesana ma le fafine o Eseta ma le la fanau to’atolu o Ruta, Iakopo ma Naomi ma le alii fomai o Taki, lea ua toe fo’i mai e toe soso’o le latou mafutaga.

Ma na fa’ailoa atu foi iai e le teine o Ruta ni vaega se lua ua tutupu e tusa ai ma le mataupu e faatatau i le tamaloa o Alesana.

Muamua, o lea ua tu’uina mai e le faamasinoga ia le fa’atagana ma ua mae’a foi ona faatonuina le ofisa a leoleo, ina ia toe faia su’esu’ega e uiga i le faalavelave lea na tupu ia Alesana ma le tua’a o le alii fomai o Taki, a’o talavou i la’ua, lea na mafua ai ona loka ia Alesana.

Ma le vaega lona lua, o le taeao e soso’o ai, o le a aga’i atu ai Alesana ma lona afafine o Ruta, lea ua avea ma ana loia, I le Ofisa a Leoleo, e fa’ailoa iai e Alesana le la mea sa fai ma le tua’a a le alii fomai o Taki, lea na fesuia’i ai o la igoa, ae e le’i maliu le tamaloa o Tanielu.

Sa fa’aalia le agaga fiafia o le aiga i le fa’aaliga muamua a le teine o Ruta, ae peitai ane, sa toe liua vave lava lea fiafia i le agaga faanoanoa ona o le fa’aaliga lona lua a Ruta, lea e tatau ai ona la o ma lona tama i le Ofisa a Leoleo i le aso e soso’o ai.

Aua ua iloa e le aiga, e o lua lava le leai o se faatinoga a leoleo e faia ia Alesana, ma le lokaina o Alesana i le taimi lava lea.

Ae ui i lea, sa taumafai lava le tamaitai o Ruta e fa’alototele atu i lona aiga ma faapea atu iai, o le tele lava o mataupu faapenei, e na’o na sala tupe ai lava o le tagata, ae seasea lokaina ai seisi.

Ua faapea atu loa le tamaloa o Alesana i si ana fanau, “Ua manaia tele le tatou mafutaga i lenei afiafi, ae ua leva le po.  E tele ni fuafuaga taua e fai i le aso a taeao.  Ua sili ona tatou o e fai se tatou malologa aua le aso a taeao.”

Sa ioe uma le aiga, ua tatau ona ta’ape e fai se malologa, aua e pisi foi le aso a soso’o ai.  

“E te moe iinei pe o iai sau faletalimalo?” o le fesili mai lea a le fafine o Eseta i le alii fomai o Taki.  “O la e le’i tago lava seisi i lou potu.  O le mea lava lea na alu o iai, o lena lava o lo’o iai.”

Ua fa’afetai atu Taki  i le fafine o Eseta ae oso mai le tamaloa o Alesana ma faapea mai, “Alu e malolo i lou potu, ua leva le po.  Se’i o’o taeao, na e toe alu lea e tapena mai au mea mai le faletalimalo.”

Ua faapena loa ona fai ma ua ta’itasi ma agai atu le tagata ia i lona potu, e malolo ai, e faatalitali ai le aso a taeao ma mea o le a tutupu ai.

[E FAIA PEA]