Pago Pago - AMERIKA SAMOA

O le vaveao o le Aso Gafua o le vaiaso lenei na toe fa’afoeina ai se tasi o osofaiga a le vaega o le Vice and Narcotics a le Matagaluega o le Puipuiga o le Saogalemu Lautele i nofoaga eseese e lua - o le tasi i le nu’u o Petesa ma le afioaga o Fagaima.

E lata i le $5,000 le tinoitupe sa maua ai, faatasi ai ma le pauta fa’asaina o le aisa (methamphetamine - meth), mariuana, ma paipa tioata, i lona tauaofa’i pe a fa’atauina i le lautele e $10,000 na maua mai i nofoaga e lua.

Sa fa’a’auupegaina leoleo i le taimi o osofaiga o fualaau faasaina.

Na fa’afesoota’i e le Samoa News le sui komesina o leoleo ia Foifua Jr Vaipuna ma Terry Letuli mo se fa’amatalaga i lenei mataupu ae peitai e le’i manuia le taumafaiga i le afiafi o le Aso Gafua. 

Ae peita’i na taua e se ali’i Leoleo Sinia i le Samoa News e fa’apea, e to’a 4 le aofa’i o tagata na taofia e Leoleo i le taimi o le osofaiga.

Na fa’atinoina e Leoleo se poloaiga mai le fa’amasinoga e su’e ai le fale mautotogi i Petesa ma se fale o se aiga i Fagaima i le taimi lava e tasi, ma e silia i le to’a 10 Leoleo na auai. 

Faaalia e le alii leoleo sinia i le Samoa News o le osofaiga o se taunuuga o vaiaso o vaavaaia ina ua maua e leoleo ni telefoni mai le mamalu o le atunuu ma ta‘u mai ai o loo faagasolo le faatau atu o fualaau faasaina i nuu e pei ona fa’ailoa mai. 

E toatasi le alii na taofia mai Petesa ae toatolu mai Fagaima - e aofia ai ni alii se toalua ma se tamaitai.

I le osofaiga i Fagaima, o le tamaitai e toatasi lea na taofia i lalo o le vaavaaiga a leoleo sa i ai se paipa tioata o lo o tu’u ai ona itutinosa ma na fa’ailoa e leoleo i le taimi o le osofaiga. Sa faatumulia le paipa tioata i le meth.

O nei osofaiga e lua ua faaopoopo i le lisi o osofaiga a leoleo i nei vaitau. 

O le osofaiga muamua sa faia ia Novema 11 ina ua fa’ataunu’u e le Vice and Narcotics se poloaiga e su’e ai le fale o Semi Aiava i Pago Pago ma ave ai i latou e to’avalu, o lo o taua i totonu o le poloaiga e su’e ai.

Na maua e Leoleo le laau fa’asaina, mariuana ma vaega o fualaau fa’asaina i le taimi o le osofa’iga fa’atasi ai ma le ta’avale lea na taofia ai loa. O nisi o leoleo sa faaauupegaina i le taimi o osofaiga i Pago Pago.

O Novema fo’i, e to’atolu ni ali’i na pu’e fa’apagota ina ua mae’a se osofa’iga fa’aa’upegaina fualaau fa’asaina i Mesepa. Na fa’atinoina e le Ofisa o le Vice and Narcotics se poloaiga e su’e ai i totonu o le fale i Mesepa lea na latou maua ai le fualaau faasaina o le aisa, vaega o fualaau fa’asaina atoa ai ma se tinoitupe.

O isi mea na faoa faamalosi e leoleo, o paipa sa faaaoga e fai ai paipa tioata e ula ai le meth, o se faamatalaga lea a se alii ofisa leoleo sinia e le o faatagaina ona talanoa i le au faasalalau.