Ads by Google Ads by Google

Pasia e Faipule le i’ugafono lagolago ai le mataupu i le Sitiseni


[ata: foa'i]
ausage@samoanews.com

Pago Pago, AMERIKA SAMOA

 

Ua pasia e le Maota o Sui i le aso Faraile na te’a nei le Iugafono Maliliefaatasi a le Maota o Sui, e lagolagosua ai i le Fono Faitulafono ma fai ai foi i latou ma sui o tagatanu’u o le teritori o Amerika Samoa, i le faaiuga a le Fa’amasinoga Apili a le malo tele e faatatau i le aia o tagata Amerika Samoa e taofi ai pea lo latou tulaga o Nesionale o le Iuniate Setete e ala i le mea na fanau ai, atoa fo’i ma le aia i luga o le faitalia o le tagata lava ia e toe fatulaga ai Nesionale o le Iunaite Setete e avea ma sitiseni o Amerika.

 

Na fulisia uma finagalo o afioga i Faipule e pasia ma lagolagoina la latou i’ugafono malilie faatasi. Na pasia faatasi atu ai fo’i ma le iugafono malilie faatasi a le Maota Maualuga a le Senate, lea e tutusa lelei lona faaupuga ma le iugafono malilie faatasi a le maota o sui.

 

O le afioga i le ali’i Sui Fofoga Fetalai ia Fetu Fetui Jr na faaulufaleina lenei iugafono malilie faatsi.

 

I le faaiuga e pasia lenei iugafono malilie faatasi a le maota o sui, na faia lea ina ua mae’a se iloiloga na faatautaia e le Komiti o Mataupu Tau Faamasinoga a le Maota o Sui, lea na fesiligia ai le afioga i le Loia Sili, susuga Fainu’ulelei Falefatu Ala’ilima-Utu, e tusa ai o sona finagalo e faatatau i lenei mataupu. O le afioga i le taitaifono ia Vaetasi Tuumolimoli Saena Moliga na taitaia le iloiloga.

 

Ina ua fesiligia e le Komiti le Loia Sili, sa ia saunoa ai e faapea, e tutusa lava gagana o iugafono a maota e lua, o le mafua’aga fo’i lea e le toe tele ai sana molimau i le mataupu a le Maota o Sui, ona olea ua mae’a ona faasoa atu sona finagalo i le taimi o le iloiloga a le Maota Maualuga i le vaiaso na te’a nei.

 

I lona talitonuga e pei ona malamalama ai i le aano o le iugafono, e mana’omia e Amerika Samoa le faatumauina pea o lona tulaga o loo i ai i lalo talu ona osia mai le la feagaiga ma le Iunaite Setete, o le taua lea o soo se tasi e fanau i le teritori o Nesionale o le Iunaite Setete.

 

I lona taofi, o le mea sili lea ma taua mo Amerika Samoa i le taimi nei, se’i vagana ua manatu le atunu’u e fai se suiga, ona mafai lea ona fesiligia se finagalo o tagatanu’u o Amerika Samoa.

 

I le gagana o le iugafono o loo taua ai e faapea, i le aso 5 o Iuni 2021, na suia ai e le Faamasinoga Apili a le Feterale mo le Faamasinoga lona 10, se faaiuga sa fefaloa’i ai le Faamasino o le Faamasinoga Faaitumalo a le Feterale i le mataupu a Fitisemanu faasaga i le Iunaite Setete, ma ua faamaonia ai le talafeagai lelei ole tuuina atu e le Konekeresi a le Iunia te Setete ole aia faatulafonoina o le nesionale mo latou sa soifua mai i Amerika Samoa.

 

O le faaiuga foi lenei a le Fa’amasinoga Apili a le Feterale ua toe suia ai nei le faaiuga a le faamasinoga faamaualalo i le mataupu a Fitisemanu faasaga i le Iunaite Setete sa faapea mai ai, ia faamuta le faaaoga o le tulaga Nesionale, a o lea la ua toe fa’aauau ai pea i le faaiuga lenei le tulafono faateritori a le malo tele e faaaloalogia ai le aia o tagata Amerika Samoa e faatumau pea le aia o lo o i ai mo Nesionale.

 

E le gata i taualumaga e uia mo i latou na fananau i Amerika Samoa e mafai ona toe faavasega ai e avea ma sitiseni o le Iunaite Setete, pe afai e mana’o ai i le lumana’i o loo i ai fo’i ma le aia e talosaga ai i le Konekeresi e ala i le faigamalo iinei ma se finagalo foi mo se suiga i lo tatou tulaga faaletulafono ma mea tau upufai o malo  mo se aia faaletulafono e faapea na soifua (fanau) i le Iunaite Setete e pei ona faauigaina ai e le Konekeresi i tulafono a le Feterale mo sitiseni.

 

O lo o taua foi i le iugafono e faapea, o le Nesionale o le Iunaite Setete ua taua ai na o tatou tagata, e mafua mai ona sa fanau i Amerika Samoa, ma o lena e muamua lava i le faauigaina o le tulaga tau upu fai o tatou motu, o se teritori o lo o pulea lava e ia lona malo e pei ona faailoaina i lalo o le pule ma le tulafono a le Iunaite Setete.

 

O le teena e le Faamasinoga Apili o le tagi a Fitisemanu ua fa’aalia ai o le fesiligia pe faamata o le sitiseni e pei ona faatulafono e le Iunaite Setete i lalo o le Suiga 14 mo tagata a soifua (fananau) i Amerika Samoa e manaomia pe faatagaian i le faavae, e le aafia ai ni faaupuga le manuia ma faailoga lanu na faia e Faamasino o le Faamasinoga Aupito Maualuga ua silia i le 120 tausaga ua mavae i se mataupu tau lafoga a teritori.

 

O mataupu o le pulea e tatou o lo tatou lava malo i totonu, o le tulafono, o tu ma aganu’u o loo i totonu o le li’o ol e ta’u lea nai o le talafeagai ai ma faiga faa le faamasinoga a le Feterale i le tagi a Fitisemanu, e aofia ai mataupu  i le faaauau o le tulafono ma aganuu e faatatau i fanua, o le pulega a matai, tuu eseina o fanua ma eleele i Amerika Samoa, filifilia o Senatoa i le Fono Faitulafono, pulea o le tiute ma femalagaaiga, ma le tala faasolopito i le tau faatuina o matuapu tau sitiseni ina ua mavae le Feagaiga o le tuuina atu ma le maua ai o le tulaga faamalo.

 

O le Feagaiga ole tuuina atu, na aloaia ia Aperila 17, 1900, o loo aiaia ai e faapea, “o le a faaaloalogia ma puipuia e le malo o le Iunaite Setete aia o tagata taitoatasi uma e mau i Tutuila ma o latou fanua ma isi meatotino.

 

O lo o taua foi i le Feagaiga lava lea, “o le faagaoioia o tulafono ma le pulega aoao tetele o le a tumau lea i le Iunaite Setete o Amerika.

 

O le faaiuga i le tagi a Fitisemanu i le faamasinoga ma le toe suia ai o le faaiuga e le Faamasinoga Apili, e le o faauigaina ai na o lena, aumai se faatonuga pe suia ai foi le tulafono o tagata Amerika ma isi teritori i le feagai ai ma aia faaletulafono o Nesionale o le Iunaite Setete ma sitiseni ua uma ona i ai i lalo o tulafono tau faateritori a le malo tele. 

 

O le malosi e fai ai aiaiga ma tulafono galue mote teritori e aofia ai ma Amerika Samoa, e aofia ai fesili tau upufai, o lo o faapito lava lena mo le konekeresi, ona o le lala faitulafono lena a le malo.

 

E pei ona taua i le Faavae o Malo Aufaatasi e faapea, “O tagata ma lava e i ai le aia e pulea ai i latou lava ma e ala mai foi i le aia lava lena, e saoloto foi latou e faia lo latou lava tulaga tau upu fai, ma saoloto foi e tuliloaina peal o latou atina’e tau le tamaoaiga, manuia lautele, ma ana tu masani”.

 

E oo mai nei lava, e le i faaaogaina e tagata Amerika Samoa, o lo latou lava finagalo malie, lo latou aia mo le tu maoti, i le fesili o le tutoatasi o lona tulaga faaupufai i le lumana’i.

 

O le aso 26 o Iuni, 2021 na teena ai e le Faamasinoga Faaitumalo a Teritori i le itumalo o Columbia, le faaeeina o le aia o le sitiseni o teritori i Nesionale o teritori na fananau i Amerika Samoa ile mataupu ile tagi a Tuaua faasaga i Vaega o Teritori. Sa faamausaili atili ai lea faaiuga e le Faamasinoga Apili i Uosigitone i se palota fulisia i le 5 o Iuni.

 

O lo o taua e le vaega o aia faapitoa e taua ol e “Amerika Tutusa”, i le latou itulau o upega tafailagi e faapea, “o le aumaia faatasi o leo o le lata il e 4 miliona o tagata Amerika o lo o nonofo i teritori e aofia ai Puerto Rico, Guam, Virgin Islands, Atu Mariana ma Amerika Samoa, o smea sese matilatila i le mataupu a Amerika Samoa, o lo o matua tete’e i ai ona vaega tau upu fai e ala i faiga faavae ina ia tete’e i tagi ma taumafaiga o loo faia e le “Amerika Tutusa”, ina ia tutusa le faiga o teritori uma o se tino faapolokiki e tasi, ma o lo osese foi le faauigaina e faapea, na pau lea o le vaega o tagata o lo o faafitia ai faiga uma e aafia i tu ma agafaaleaganu’u.