Pago Pago - AMERIKA SAMOA

O le aso Gafua, Fepuari 2, 2025, na pasia ai e le Maota o Sui ia Maefau Dr. Mary Taufete’e, i se palota 16-1, e avea ma Faatonusili o A’oga.

I lana saunoaga amata, na fa’aleoina ai e Maefau lona agaga fa’afetai i le Afioga i le Kovana, mo le filifiliga o ia ma ia fa’asoaina lona agaga i tulaga tau aoaoga ma lana tu’uto i aoaoga, aemaise o lona naunautai e auauna i fanau talavou a Amerika Samoa.

E tele ni mataupu sa faapea ona fesiligia ai e Afioga i Faipule ia le Faatonu fou, na aofia ai le mataupu i le tau leai o ni faiaoga, o le ausia e fanau aoga o tulaga feterale, o fanau fa’afitauli, o polokalama mo faiaoga ‘substitute’, o su’esu’ega o tupe ma polokalama feterale faapea ma le su’esu’eina o le aufaigaluega mo fualaau faasaina.

Na fesiligia e le Afioga i le Faipule ia Vailoata Amituanai le tulaga i le tau leai o faiaoga i totonu o le teritori, ma le auala o le a fofoina ai e le Faatonusili fou ia lenei mataupu.

Sa tali mai Maefau, o lea fa’afitauli, e le o se fa’afitauli fou, ma i le tolu vaiaso talu ona filifilia o ia i lona tofiga fou, ua ia molimauina nisi o fa’afitauli o feagai ma a’oga ona o lenei faafitauli i faiaoga.

Ma sa ia ta’ua lona taga’i toto’a i lenei mataupu ma ia fautuaina ai le toe fa’atula’i mai o le polokalama lea e malaga mai ai faiaoga mai fafo (World Teach Program) lea sa fa’afoeina e le Ofisa o A’oga ma le taitaifono o le Komiti o Sikolasipi, ia Fiu John Saelua, ma atonu o le a mafai ona fesoasoani lea i le fa’afitauli i faiaoga.

Na fesiligia e le Afioga i le Faipule ia Trude Ledoux-Sunia ia se fuafuaga a le Faatonusili fou, ina ia mafai ai ona ausia e le Ofisa o Aoga ia tulaga feterale, aemaise ai le tulaga o lo’o tausinio iai le Ofisa o Aoga ia Iulai 2025.

O le tali pu’upu’u a Maefau, mulimuli i le tulafono ona le sese ai lea.  Sa ta’ua e le Faatonusili, o le a ia su’esu’eina le mafua’aga ma fofoina, ina ia le sala a’oga.  Ma sa ia ta’ua e faapea, e ui ina e le’i avea o ia ma faiaoga i totonu o le Ofisa o Aoga, ae sa avea o ia ma faiaoga i le Kolisi (ASCC).  Ma o le ia galue malosi e mataituina lenei mataupu ina ia le tula’i mai ni faafitauli.

Na toe fesiligia Maefau i ana tulafono ua fa’atulagaina e faatatau i le faafitauli i fualaau faasaina i totonu o aoga ma po o a ni polokalama ua faatulagaina e mafai ona faufautuaina ai ma fofoina lenei faafitauli.

Sa ta’ua e Maefau lona su’esu’eina o lenei mataupu ma faamamafaina le taua o le galuega a faufautua o iai nei ma o le a faapea ona ia tagai i le faafitauli i fanau tia’i a’oga.

I le tulaga o polokalama mo faiaoga ‘substitute’, na fesiligia ai le Afioga i le Faipule ia Dr. Va’asa Simanu ia lea tulaga ona o nisi o faiaoga, e malaga so’o i fafo.  Ma na ia fia malamalama po o iai pea le Komiti Faafoe o A’oga.

Sa talosagaina e Dr. Simanu ia le Faatonusili pe mafai ona toe aumai le ‘Uila o le Sami’ e fesoasoani i fanau aoga mai Aunu’u, lea e a’o’oga i le aoga maualuga a Fagaitua, ona o le tuai so’o mai.  Faapea ai ma se pasi mo fanau aoga i Alofau, ona o le mamao o le mea e tau savali mai ai i Fagaitua.  Faapea ai ma ni ‘ea malulu mo potu aoga i Aunu’u.

Ina ua saunoa le Afioga i le Faipule ia Larry Sanitoa, sa ia ta’ua e faapea, atonu e le’i galue ia Maefau i totonu o le Ofisa o Aoga, ae peitai, atonu e iai le mafuaaga o mea uma ma atonu ua mana’omia ni manatu fou.

Sa faapupulaina e Sanitoa le mataupu i le tausiga o faleaoga, e ui i le tele o tupe ma risosi ua fa’aalu e le Faigamalo ua te’a atu, i falea’oga, e aofia ai ma faleaoga fou.

Ae na ia faaleoina lona agaga faanoanoa i le maualuga o fanau aoga ua fa’au’u mai i aoga maualuluga, ae toe o atu, ave vasega amata i le kolisi.  Ma na fesiligia ai e Sanitoa le tulaga o matuapu o lo’o a’oa’oina i totonu o a’oga maualuluga, pe le o ausia ai tulaga o kolisi.  Ma ia fautuaina ai le toe saili o seisi fofo, i fafo atu.

O le fautuaga mai i le Afioga i le Faipule ia Avagafono Tuavao Vaimaga Maiava, o le maualuga o le fuainumera o tagata fagaluega i totonu o ofisa, ma ia fautuaina ai le toe fa’afo’i o nisi i le potu aoga e fesoasoani i le faafitauli o le tau leai o ni faiaoga.

I le saunoaga a le Afioga i le Fofoga Fetalai, ia Savali Talavou Ale, sa ia fesiligia ai po o faamalosia pea su’esu’ega tau i fualaau faasaina faapea ma tala’aga o tagata faigaluega, sa tali Maefau, o lo’o fa’aauauina pea lea tulaga.

Na toe faatepa e Savali ia le leai o se taimi na faiaoga ai Maefau i totonu o le Ofisa o Aoga, ae pe ua ia lava tapena e tauaveina lenei tofiga faaletaitai.

Sa saunoa le Faatonusili fou, e ui na te le’i galue i totonu o se potu aoga, ae o lo’o ia te ia se naunautaiga mo aoaoga ma le auauna i lenei matagaluega ma fanau o Amerika Samoa.   Ma sa ia ta’ua e faapea, i le faatasi mai o le Atua, ua ia saunia mo lenei valaauga.

Na pasia e le Maota o Sui ia Masefau, i le mae’a ai o le iloiloga a le komiti.  E to’afa ni Faipule sa le’i mafai ona auai, faatasi ai ma e le’i auai foi le sui mai Swains i le palotaga.