Pago Pago - AMERIKA SAMOA

Na pasia e afioga i Senatoa, i lona faitauga mulimuli (faitauga lona tolu) ia se pili e ‘suia ai le inivesi o tupe faaleoleo e sili at unai lo mana’oga o lo’o iai, ina ia faataga ai le Tupe o le Litaea (ASGERF) e inivesi tupe i totonu o le lotoifale e aunoa ma le mau tapula’a e le talafeagai e fa’asa sa ai.”

I le iloiloga a le Komiti o le Litaea a le Senate, i le vaiaso ua tuanai, lea sa fa’atautaia e le Taitaifono, le Afioga i le Senatoa ia Tuialu’ulu’u V. Tuialu’ulu’u, sa molimau ai le Peresetene o le Senate, le afioga i le Senatoa ia Tuaolo Manaia Fruean, i lona lagolagoina o lenei pili taufa’aofi.

Sa ia faamalamalama mai le finagalo o le komiti fa’afoe a le Tupe o le Litaea (ASGERF), ina ia inivesi tupe i totonu o le lotoifale e aunoa ma le mau tapula’a e le talafeagai e fa’asa sa ai, ma mafai ona saogalemu ma aoga i totonu o le teritori.

Na saunoa foi Togiola, afai e iai nisi ofisa po o matagaluega tetele a le malo, e pei o le ASTCA, ASPA, po o le falemai (LBJ), e manaomia ni nonogatupe tetele, o le a pa’u i luga o le Komiti Faafoe ia le faaiuga, i le aofaiga ua alagatatau ona nonoina, e fuafua lava i manaoga ma tulaga a ofisa ta’itasi o lo’o fa’atalosaga.

Sa ia faamamafaina mai foi le tatau ona talitonuina e le komiti faafoe, le saogalemu o nei nonogatupe, e ui lava i le tetele o aofaiga tupe o lo’o a’afia, ona o ofisa a le malo lea o lo’o latou nonoina nei tupe.

Na saunoa foi Tuaolo i le taua o le tiute o inivesi i Tupe o le Litaea, aemaise lava i le nonoina, e lagolagoina ai le faagaioiga o vaega eseese o le malo, pe afai ua le mafai ona maua mai se tupe i isi lisosi.

Sa ia fa’amanatu atu foi i afioga i Senatoa ia le tupe tele ($17 miliona) lea sa nonoina mai i le tupe o le Litaeao, e faatupeina ai le Hawaiki Cable – lea na feso’ota’i ai ia Ausetalia, Niu Sila, Amerika Samoa, Niu Kaletonia ma Tonga, ma o’o atu lava i Hawaii, Oregon ma setete i sisifo o Amerika.

E le o ma’oti mai totonu o le pili taufa’aofi ia limiti mo nonogatupe mai i le teugatupe, mo ofisa po o matagaluega a le malo.  Sa faapea foi ona aofia i felafolafoa’iga a Senatoa, ia le leai o ni aiaiga e taofia ai le apalai mai o kamupani tua mo nonogatupe i lenei teugatupe mo tagata faigaluega a le malo. 

Na fesiligia e le afioga i le Senatoa ia Magalei Logovii pe ua tagai le komiti faafoe i le tapaina o ni ‘collateral’ mo nonogatupe mai i kamupani tua, e puipuia ai le teugatupe, ina ne’i le mafai ona totogi atoa le aitalafu.

Sa tali mai Tuaolo ma faamanino mai i le komiti le mua’i iloiloina e le komiti faafoe o aseti a kamupani, e avea ma ‘collateral’ mo so’o se aitalafu.  Ma sa ia faamamafaina mai foi le taga’i toto’a o le komiti i talosaga mo aitalafu, ma iloilo auiliili ia aseti a so’o se kamupani e fia mana’o e nono se tupe.

Na fautuaina e Magalei ia le faatulagaina o se inisiua e kava ai aitalafu ia e i’u ina le mafai ona totogia, e mafai ai ona malu puipuia o le teugatupe.

Sa faaleoina e le afioga i le loia ia Togiola T.A. Tulafono, ia lona lagolagoina o le misiona a lenei pili, ia ave’esea ai le mau tapula’a mo inivesi, e mafai ona faia e le teugatupe i le lotoifale.

Ae peitai, o sona popolega e pei ona sa ia faaleoina, o le a ave’esea ai e lenei tulafono taufa’aofi, ia tulafono o iai nei, lea e na te talitonu, e taua tele i le leoleoina o le teugatupe, aua taimi o e tula’i mai ai ni faalavelave faafuase’i.  Ma ia fautuaina ai le fa’amautuina pei o nei vaega, o lo’o puipuia ai le teugatupe a le litaea.

E patino lea i le vaega o lo’o ta’ua mai e faapea, “E le mafai ona faia o se inivesi pe afai, e mae’a le inivesi, e umia e le faaputugatupe:”

• So’o se tu’ufaatasiga o ni aitalafu a so’o se soavaega faapolokiki, kamupani po o se isi lava vaega e tu’uina mai e sili atu i le 5% o aseta a le Litaea; po o 

3) O aitalafu ma isi inivesi e tuuina atu pe faamaonia foi e le malo i luga atu o le 17.5% o aseta a le Litaea i se tau; ae ui i lea, o lenei tapulaa e le fa’aaoga i atalafu po o isi inivesi, o lo’o fa’amaonia e leai se tapulaa o le tupe amata ma le tupe tului, pe lagolagoina foi i se lisi mai se tasi vaega e faia le latou pisinisi i fafo atu o Amerika Samoa.

Sa faaleoina e le afioga i le Senatoa ia Gaoteote Palaie Tofau, lona lagolagoina o le saunoaga a Togiola e tusa ai ma le fa’atumauina o aiaiga po o vaega o le tulafono o iai nei, ma ia faamamafaina le taua tele o le puipuia o le Teugatupe.

Ma na fa’atula’i ai e le afioga i le Senatoa ia Leatualevao Asifoa ia se manatu, afai ua tatalaina le Teugatupe e aitalafu mai ai pisinisi tua, e tatau ona tatalaina le avanoa e ulufale mai ai ma pisinisi tua.

Ua fa’aalia mai i se ripoti a le Malo o Amerika Samoa ia le maualuga o le fuainumera, o aitalafu e le’i mae’a ona totogia i le Teugatupe a le Litaea.

E ui ina o lea ua mae’a ona totogia e le malo ia le na’o le $1.2 miliona i tupe tipi mai i totogi a tagata faigaluega a le malo, ae peitai, talu mai le masina o Aukuso o le tausaga na se’i mavae atu, se’ia o’o mai ia Fepuari o le tausaga nei, ua va’aia ai le agai i luga o le aofaiga e le’i totogia.

O tupe tipi mai i totogi o tagata faigaluega a le malo, e ta’i $210,293 i vaiaso totogi, ae e $505,133 ia pule o galuega.  Ae o le aitalafu a le malo lea o lo’o iai nei, i le teugatupe a le Litaea, e $9.4 miliona.

Na faamamafaina e Togiola ia le ono faaletonu o le fa’atuatuaina o le Teugatupe, ma ia lapataia ai le manaomia ona totogi vave o lenei aitalafu.