Pago Pago - AMERIKA SAMOA

Na faamae’aina iloiloga a le Maota o le Senate i le aso Faraile ua mavae, i le pasiaina o ni sui Faatonu se to’alua ua filifilia e le Afioga i le Kovana Pulaalii N. Pula e avea ma Faatonu o le Ofisa o Feso’ota’iga ma le Faatonu mo le Ofisa o le Enetia.

E toaititi lava Senatoa na fesiligiaina susuga ia Aaron Hall lea ua filifilia e avea ma Faatonu mo le Ofisa o Feso’otaiga ma le susuga ia Sione Kava, lea ua filifilia e avea ma Faatonu o le Ofisa o Enetia. 

AARON HALL

I lana saunoaga amata, sa ta’ua ai e le susuga ia Hall le le maua e le KVZK-TV ia risosi e manaomia e fa’ataunuu ai ona tiute.  Sa ta’ua e Hall ia sini autu e ao ona ausia i leisi fa tausaga o soso’o, e fa’aauau ai ona auaunaina le mamalu lautele.

Na fa’aleoina e Hall lona agaga fa’afetai i lona toalua ma le la fanau, faapea ona aiga, e aofia ma lona tama, le sui Loia Sili ia Roy Hall faapea ma le aufaigaluega a le KVZK-TV, sa auai atu i lea taeao, e lagolagoina lana iloiloga.

Sa fa’aalia e le sui Peresetene o le Senate, le Afioga Magalei Logovii, o Hall o se atalii mai i lona itumalo i Tualauta.  Ma sa ia fa’aalia lona fa’atuatuaga atoatoa i le agava’a fa’aleta’ita’i o Hall ae le gata i lea, o le tele o suiga i tulaga o fa’asalalauga a le KVZK-TV, a’o ia tu i le foe.

Na faapea foi ona saunoa Magalei i le ta’ua i taimi uma, e vaega fa’asalalau i taimi o fa’asalalauga o ta’aloga a aoga maualuga ma isi polokalama, ia le auai atu o Hall. Ae e latou te le ta’ua isi lava pule tuai a le KVZK-TV, ona e le masani ona toe asiasi atu.

O se fa’ailoga lea, e pei ona ta’ua e Magalei, o lou alofa, ma le lagolagoina o oe e lau aufaigaluega. 

Sa ia faamamafaina ia uiga o se taitai moni, o le feutagai vavalalata ma lana aufaigaluega, ae le o le tu mamao mai.  Na fa’aleoina e Magalei lona agaga fa’afetai ia Hall ma ia fautuaina o ia, ina ia fa’aauau pea ona fa’aali lona agaga alofa ma le fai tutusa uma o tagata, pe afai ae pasia o ia e avea ma Faatonu.

Na fa’aalia e le Afioga i le Senatoa ia Togiola T.A. Tulafono, ia lona lagolagoina o le saunoaga a Magalei ma sa ia ta’ua le umia e Hall o se agava’a e mataituina ai lenei galuega ma sa ia saunoa maualuga foi i le agava’a fa’aletaitai a Hall.

Ae e pei ona sa ta’ua foi e Togiola, o le vaega e ‘ese’ese ai Hall ma isi sa tu i le foe, o lona atamai i tekonolosi fa’aonaponei.  Sa ia fa’aleoina sona atugaluga ua leva i le tele o fa’amaumauga o polokalama taua mai tausaga ua tuanai, sa pu’eina e le KVZK-TV, talu mai ona faavaeina i le 1964, atonu ua le toe maua.

Na saunoa Togiola i le le toe iai o ni masini sa masani ona pu’e ai polokalama i tausaga ua tuanai.  Ma sa ia fa’amatala aso sa ia asiasi atu ai i ofisa tuai a le KVZK-TV i Utulei, sa ia molimauina ai le tele o ‘tapes’ tuai i luga o fata, po o taatitia solo.  

Ma sa ia fesiligia le mafuaaga ua le teuina ai i ni masini fa’aneionapo.  Ae o le tali lava e tasi sa ia maua mai i le aufaigaluega a le fale TV, o lo’o latou taumafai e saili ni masini faaneionapo e mafai ona si’i iai ata mai i lipine tuai.

Sa ia ta’ua foi le taimi na o’o mai ai Aoelua (lea na Faatonu i le Faigamalo tuai), i luma o le Senate mo lona iloiloga i le tausaga ua mavae, na fesiligia ai foi o ia i le fesili lava lea e tasi.  Ae na tali Aoelua, o lo’o latou taumafai e sili se masini e si’i mai ai ata mai i lipine tuai.

Ae na ta’ua e Togiola le vaitaimi na tula’i mai ai Hall i le tofiga, sa amata ona fa’asalalauina ata tuai mai i le faaiuga o le 1960, i luga o le alaata 2.  Sa faapea ona toe faaleoina e Togiola le taua tele o le tausia o nei ata tuai aua fanau o le lumanai, e latou te molimau ma aoao mai ai.

Na faapea foi ona toe faamanatu mai e Togiola, o Amerika Samoa, o le ulua’i motu o le Pasefika ma le lalolagi, sa fa’aaogaina televise e fa’ao’o atu ai a’oa’oga mo fanau i nu’u mao tua.

Sa faapea ona ia fesiligia ia Hall pe mafai ona ia mataituina le fa’asaoina o ata tuai mo fanau o le lumanai.  Na saunoa Hall, o lo’o ua amataina nei se poloketi e mafai ai ona fa’ataunu’uina lea tulaga.

Na fa’alauiloa mai foi e Hall le iai o se fuafuaga pe a mae’a lenei poloketi, ina ia tatalaina nei ata tuai i le mamalu lautele ma fa’aaogaina foi mo nisi fuafuaga a le ofisa TV.

Sa talosagaina e Togiola ia Hall ina ia tu’ufa’atasia se fuafuaga aloaia mo lenei polokalama, e fa’amautuina ai o ata tuai.  Ma ia fa’ao’oina atu se kopi o lenei fuafuaga, ina ia mafai ona fesoasoani mai ai le Senate i le fa’asaoina o tala faasolopito a le atunu’u.

I saunoaga a Afioga i Senatoa ia Muagututi’a Tauoa ma Gaoteote Palaie Tofau, sa faapea ona o la faaleoina ai o la agaga fa’afetai i galuega a Hall, e mafai ai e le mamalu o le atunu’u ona tagataga’i ata tuai o tala faasolopito ia o le atunu’u.

Ae e tasi lava sina fa’aletonu na saunoa iai Senatoa, o le le mafai lea e le Faatonu fou ona tautala i le Gagana Samoa, ona o le tele o lona soifuaga sa ola ai i atunu’u i fafo.   Na faapea ona fautuaina e afioga i Senatoa ia Hall ina ia taumafai e a’o le Gagana Samoa faapea ma le aganu’u.

I le saunoaga a le Afioga i le Senatoa ia Levu Iosia, e ui i le tele o mea lelei ua ia fa’alogo ai e uiga ia Hall, ae o le ulua’i taimi lenei ua ia va’ai tino ai i le sui Faatonu ma sa ia momoli le agaga fa’afetai i le taitai fa’aolioli, ona o ana metotia mo le fa’aleleia o le kavaina e le KVZK-TV o tu’uga fautasi i tausaga taitasi.

Sa ta’ua e Levu le suia o le maimoa a le atunu’u ona o le fa’aaogaina e Hall o meapu’eata faalele (drones) lea ua mafai ai ona fa’aopoopo seisi auala e mafai ai ona maimoaina e le atunu’u ia le tu’uga va’a.

Na tu’uina atu e le afioga i le Senatoa lana faamanuiaga i le sui Faatonu ma le u’una’ia o ia e fa’aauau ona saili nisi auala e fa’aleleia atili ai le pu’eina o le tu’uga fautasi.

I se fautuaga mai i le Afioga i le Senatoa ia Ma’o Gogo, na ia fa’atonuina ai le sui Faatonu ina ia aua ne’i gugu le tautua a le KVZK-TV i le ripotia o tulaga fa’aletonu i totonu o le Faigamalo.  Na saunoa Ma’o, ana leai iloiloga ma fetufaa’iga i totonu o le Maota o le Senate, semanu e le nofo malamalama le mamalu o le atunu’u i mea o tutupu.

I le faai’uga o tauaofiaga a le Maota o le Senate, sa faapea ona pasia ai le tofiga Faatonu a Hall, i le palota 13 ioe, 0 leai.

Ae peitai, i totonu o le Maota o Sui, sa le’i ausia e Hall ia palota e mafai ai ona pasia lona tofiga.  E 11 palota ioe, sa ia manaomia, ae peitai, sa na’o le 10 palota na ia maua, ae 7 leai.

Na fa’atula’i e le Taitaifono o le Komiti o Feso’otaiga a le Maota o Sui, le Afioga i le Faipule ia Luaitaua Gene Pan, ia se mau ina ia faia se palota lona lua ma na mafai ona pasia lea mau.  Ae le o iloa i le taimi nei, le aso e toe faia ai lea tulaga.

SIONE L. KAVA

I lana tautalaga amata, sa fa’alauiloa ai e le susuga ia Sione Kava le fa’afeso’ota’i o ia e le ofisa o le kovana ia Ianuari 20, e tusa ai ma le filifilia o ia e le Afioga i le Kovana, e avea ma Faatonusili o le Ofisa o le Enetia.

Na saunoa Kava, ina ua mae’a ona ia maua lea valaau, sa ia asiasi atu ai loa i le ofisa a le Enetia ma feiloai ai ma le aufaigaluega ma tu’ufa’atasia se fa’amaumauga o aseti uma a le malo, faapea ai ma le iloiloga o le faatulagaga o le ofisa.

Sa ia ta’ua lona aoaoina o tiute a lenei ofisa, i tagata o Amerika Samoa ma o latou matafaioi i le Ofisa o le Kovana ma isi ofisa o le malo, aemaise ai le faia ma matafaioi  ile Ofisa o le Enetia ale Iunaite Setete.

Na saunoa foi Kava, ua mae’a ona ia fa’alauiloa atu lona tagata i le aufaigaluega, ina ia mafai ona o latou fa’amasani.  Sa saunoa Kava, i lona fia malamalama i le ituaiga taitai o iai o ia, ma tulaga e mana’omia e le aufaigaluega mai ia te ia.  

Sa ta’ua foi e Kava e faapea, sa iai sona talitonuga, o le mea muamua lava e na te manaomia, o se fa’amaoniga mai i le aufaigaluega a le TEO, pe latou te taliaina o ia e avea ma a latou taitai.  Ma ua fa’ailoa mai i lo latou auai uma atu i lona iloiloga, i lea taeao, lona mauaina o le latou fa’amaoniga.

O le Afioga i le Senatoa ia Magalei Logovii na mua’i saunoa ina ua maea le tautalaga a Kava ma sa ia fa’alauiloa le tele o tausaga na tautua ai Kava i totonu o le malo, e ala i le ta’ita’iina o le ofisa e mataituina le Suau’u (OPM), i lalo o le Faigamalo a Tauese ma Togiola.  Ma sa ia fesiligia pe ua litaea Kava, lea sa faamaonia e Kava lea tulaga, ae peitai, sa ta’ua e le sui Faatonu lona fiafia tele ina ua toe tapaina lana auaunaga e le malo.

Na aloaia e Magalei le tele o tausaga o le auaunaga a Kava ma ia u’una’ia le sui Faatonu e fa’aauau pea ana galuega lelei, pe afai ae pasia lona tofiga fou.

Na faapea foi ona fa’aopoopo atu le Afioga i le Senatoa ia Muagututi’a Tauoa, i lana fo’i fa’amalo i le sui Faatonu ona o le umi o lana tautua, ma fautuaina ai Kava ina ia taumafai e fa’aititia le tau o le suau’u.

Ae peitai, sa faamanino mai e Kava, o lea mataupu sa feagai ma ia a’o ia galue i le OPM, lea sa i lalo o le TEO, ae peitai, o le taimi nei, ua tu’u’ese’esea le OPM ma le TEO.

I le saunoaga a le Afioga i le Senatoa ia Utu Sila Poasa le pulea  le ASPA o le tau o enetia e  gaosia mai le la ma le savili, ae i sona talitonuga, e tatau ona mataituina lea tulaga e le TEO.  Ma ia u’una’ia Kava ina ia galulue faatasi ma le ASPA e feutagai seisi tau e talafeagai ma le mamalu o le atunu’u.

Na fa’aleoina e Kava lona agaga fa’afetai i Afioga i Senatoa ona o le fa’atuatuaga ua tu’uina atu ia te ia, faapea ai ma fautuaga ua ia mauaina.  Sa ia fa’ailoa atu i Senatoa, o le a ia tu’uina lona malosi atoa i le tautuaina o tagata ma le malo o Amerika Samoa pe afai ae pasiaina lona tofiga.

I le palota na mulimuli ane, sa pasia ai Sione Kava i le 12 ioe, ae 1 le leai.