Pago Pago - AMERIKA SAMOA

O le taeao o le aso Gafua na pasia ai e le Senate, i lona faitauga lona tolu, ia pili e lua sa fa’aulufaleina e le afioga i le Senatoa ia Togiola T.A. Tulafono. 

O le pili muamua, e suia ai le aso o le fa’atautoga o se Kovana ma le Lutena Kovana o Amerika Samoa, mai i le aso 3 o Ianuari, i le aso 10.

Ae o le pili lona lua, o lo’o ma’oti mai ai mafuaaga e mafai ai ona fa’atula’i ‘ese ia se kovana ma se lutena kovana, mai o la tofiga fa’aleta’ita’i.

O le aso Faraile o le vaiaso ua tuanai, sa fa’ataunu’uina ai se iloiloga fa’alauaitele mo le pili lona lua, lea na mafai ona auai atu ai nisi e to’afa, ma molimau i luma o le Komiti a le Senate, mo le Faagaioiga o le Malo.

O le ulua’i molimau i lea iloiloga, o le susuga ia Barry Fundt, le loia a le kovana ma se ia fa’ailoa atu i le taitaifono a le komiti, le le fa’atu’iese o le kovana i le agaga o le pili.  Ae peitai, o lo’o iai ni ona popolega e tusa ai ma le gagana o le fa’atula’i ‘ese i totonu o le pili, ona o lo’o tutusa ma upu i totonu o le Fa’avae.

Ma e ono avea lea tulaga ma fa’afaigata i le fa’aliliuga a le faamasinoga.  Sa fautuaina ai e Fundt ia le suia o le gagana o le fa’atula’i Ina ia mafai ai ona faalauteleine lona manino i le faaliliuga o le faaopoopoga i le faavae.

O lea fa’aopoopoga, e pei ona ta’ua i le faatomuaga o le pili, o lo’o ma’oti mai ai mafuaaga mo le fa’atula’i ese o se kovana po o se lutena kovana.  E aofia ai le faia o ni ‘faiga sese ma le le talafeagai, po o ni amioga mataga ma le fa’aaoga sese o le pule i le tauavea o le tofi’ ma ‘faiga le talafeagai i le tauavea o le ofisa e faauigaina o se faatinoga e faia ma le iloa o se solitulafono, o ni amio sese po o ni faiga le faamaoni’.

Ma o le fa’agosologa o le fa’atula’iese, e pei ona ta’ua i totonu o le pili, e tali tutusa ma le fa’agasologa e pei ona fa’atinoina e le Malo Feterale.

Aemaise ai lava le patino i le Maota o Sui le malosiaga e mafai ai ona ‘faatulagaina ni mea ua iloa ua tatau ai ona fa’atulaiese’ se taitai, e ala ‘i s epalota ia le itiiti i le 2/3 o le totino atoa o le Maota’.

Ae o le ‘Maota Maualuga e iai le malosi e suesue ai le faatula’iese e ta’ita’ia e le Faamasino Sili, ma e le mafai ona ta’usalaina vagana ua malilie faatasi iai le 2/3 o totino o le Maota.’

Sa finagalo le afioga i le Senatoa ia Utu Sila Poasa, i se faamalamalamaga po o auiliili mai i totonu o le Faavae ia le fa’agasologa o le fa’atula’I’ese.  Lea sa faamanino mai e Fundt, e na’o na tu’uina mai e le Faavae se ‘oto’otoga o le aia tatau e fa’atula’i ai se taitai, ae o le tiute a le Fono ia le fa’atulagaina o tulafono e taitaiina ai lea fa’agasologa.

Na fa’aopoopo atu ia le peresetene o le senate, le afioga i le Senatoa ia Tuaolo Manaia Fruean, i le fa’amalamalamaga a Fundt ma fa’amamafaina i afioga Senatoa, fa’asaoina o le aia tatau e faatula’iese ai, i totonu o le Faavae.  Ma o le o lo’o latou iloiloina, o lo’o faamanino mai ai tulafono ma aiaiga e puleaina le faatinoga o lenei mataupu.

O le molimau lona lua le aso, o se alii a’oga mai i le vasega sefululua a le aoga maualuga a Tafuna, o Apelu Mann, lea na malaga fa’atasi atu ma ana faiaoga, susuga ia Taveuveu Kolose Ili ma Tolu Sanitoa.

Na molimau Mann i lona talitonu i le avea o lenei mataupu ma se vaega taua o le faavae.  Ma ua tu’ufa’atasia lenei pili ina ia mafai ai ona tali le kovana ma le lutena kovana i a latou faaiuga e faia.  Sa saunoa lenei atalii, i le ono fa’aaoga sese, lu’itau ma le limiti e o fa’atasi ma lenei fuafuaga o le fa’atula’iese, ae ua iai sona talitonuga, ua matua’i manaomia tele lenei vaega, i totonu o se temokarasi faamaoni.

Sa faapea foi ona fa’aleoina e Mann ni malosiaga ma limiti o lenei pili taufa’aofi, ma faamamafaina le taua o le fa’amautuina le malamalama lelei o tagata uma o Amerika Samoa, i le agaga o lenei pili.

O ni vaega ma’oti e lima sa ta’ua e Mann mataupu faavae taua e manaomia ai lenei tulafono, o le fa’amautuina o le ‘rule of law’.  Ua talitonu Mann, o le ma’a ‘au’au o so’o se malo faatemokarasi, o le mataupu faavae lea – e leai seisi, pe kovana pe lutena kovana, pe sui faitulafono po o se sitiseni – ona i luga atu o le tulafono.

Sa ta’ua e Mann ni fa’ata’ita’iga o lea finauga, lea e pei o le fa’atula’i’ese o Bill Clinton, a’o avea o ia ma Peresetene o Amerika, i le molimau pepelo ma le fa’alavelave i su’esu’ega sa faia, faapea ai ma le fa’atula’i ese lata mai nei, o Peresetene Donald Trump, i lona fa’aaoga ma le le fa’amaoni o le malosiaga fa’aletaitai ma le fa’alavelave i le faatinoga o tiute faaletulafono a le Konekeresi. 

Ae sa ta’ua foi e Mann e faapea, e ui i le taua tele o lenei tulaga i le fa’amautuina o le usitaia o tulafono, ae o lo’o iai pea ni tulaga e manaomia ona iloilo lelei.  E pei o le fa’aaogaina o lenei tulafono ma a’upega, ae le o le fa’ataunu’uina o faamasinoga tonu.

Ma e iai foi nisi o sui faitulafono, e pei ona saunoa Mann, e mafai ona fa’aaogaina lenei tulafono e faatino ai o latou lava manaoga ae le mo se lelei lautele.  O ia gaioiga, e mafai ai ona ave’esea ai le loto o le Fono mai i manaoga moni a tagata o le atunu’u.

Na finau foi Mann, afai ae fa’aaoga so’o lenei tulafono, o le a faapea ona tele se taimi e fa’aalu ai, ma ave’ese mai ai le vaai a le Fono mai nisi mataupu taua o lo’o a’afia ai le Teritori.

E le gata i lea, ua talitonu Mann, o le a avea ma fa’alavelave i le fa’agaioiga o le malo, faaitiitia ai lona agava’a e tali atu i manaoga a le teritori.  Ae le gata i lea, o le a faapea ona avea ma faapopolega i le mamalu lautele, o le lotogatasi o se malo, ma fa’ateleina ai le va faapolokiki ma atili ai ona fevaevaea’i le atunu’u.

Ae peitai, e ui lava i nei popolega, ae sa fa’aalia e Mann, lona lagolagoina o lenei pili, aua o se tulafono ua manaomia i totonu o le malo.

Ina ua mae’a le folasaga a le alii talavou, sa faapea ona fa’aleoina e Togiola lona agaga fa’afetai mo ona manatu fa’aalia ma ia saunoa fa’alauaitele ai i le upu peretania o le ‘malfeasance’, o sona faataitaiga, e pei ona ta’ua e le afioga i le Senatoa, o le le ta’usalaina o se kovana i se solitulafono, ae ua na ona ia faia ni tulaga ua le talafeagai, e pei o le fa’afaigaluegaina o tagata o lona aiga i ni tofiga maualuluga i totonu o le malo.

Na saunoa Togiola, i totonu o lenei pili, afai e ta’usalaina ia se kovana i ni soligatulafono e 34, e pei o Trump, o le faavae lea o le fa’atula’ieseina.  Ma e amata mai i le Maota o Sui, lea o le a iloiloina ia tu’ua’iga ma afai ae faamaonia ia nei solitulafono, ona o latou tu’ufa’atasia lea o se ‘Articles of Impeachment’ ma fa’ao’oina atu i le Senate.  

O le Senate, i lalo o le fa’amalumaluga a le Faamasino Sili, o le a fa’ataunu’uina le faamasinoga ma ia ‘autasi ai senatoa e to’a 18, i se fa’ai’uga.

Sa momoli atu le agaga fa’afetai o le afioga ia Togiola i le alii talavou mai i le aoga maualuga a Tafuna mol ana molimau ma ia u’una’ia o ia ma i latou o lo’o latou a’o’oga faatasi, ina ia fa’aauau pea ona a’oa’o ma fa’amasni i le faagaioiga o le malo.

Na faamamafaina e Togiola le taua tele o lo latou nofo malamalama, ina ia mafai ona o latou nofo saunia ma atamamai i le fa’agaioiga o se malo, aua lo latou sauni atu e avea i latou ma taitai i le lumanai.

Sa faapea foi ona ia momoli le agaga fa’afetai i faiaoga, i lo latou tu’uto i le fa’afaileleina ma le aoaoina o taitai o le lumanai a le Teritori.