Pago Pago - AMERIKA SAMOA

Sa soalaupuleina i le vaiaso ua mavae, a’o feagai ai le Komiti o le Puipuiga o le Saogalemu a le Maota o le Senate, ma le iloiloga o le susuga ia Vaetagaloa Gleen Lefiti e avea ma Faatonusili o le Matagaluega mo le puipuiga lotoifale (Dept. of Homeland Security), ia se fuafuaga mo le si’itia atu o le Ofisa o Tiute i lalo o le va’ava’aiga a le Homeland Security.

O le iloiloga a le komiti o le Maota o le Senate, sa fa’afoeina e le Taitafono, le Afioga i le Senatoa ia Olo Uluao Letuli.  Ae o le Afioga i le Senatoa ia Togiola T.A.Tulafono sa fa’atula’ia le mataupu.  Sa aofia i le saunoaga a Togiola le loa o le tautua a le susuga ia Vaotagaloa i totonu o le Ofisa o Tiute, e aofia ai ma le avea o ia ma sui Taitai o le ofisa mo le tolu tausaga, faapea ae valu tausaga na avea o ia ma Taitai o lea ofisa.

Na fesiligia e Togiola ia Vaotagaloa pe fia nofo i le Ofisa o Tiute, lea e mafai ona aoga iai lona agava’a.  Sa faaleoina e Vaetagaloa lona agaga fa’afetai ma le fa’agae’etia, i le filifiliga o ia e le kovana, e avea ma fa’auluuluga o le DHS, ae o le a avanoa lava o ia, e fesoasoani i le kovana, i so’o se mataupu e faatatau i le Ofisa a Tiute, pe a manaomia ai o ia.

Sa toe fesiligia e Togiola ia le sui tofia, pe iai se tulaga e tutusa ai ma tiute ma matafaioi a le Ulu o le ofisa o Tiute ma le Faatonusili a le DHS.  Na faamanino mai e Vaetagaloa ia itu e tutusa ai tiute a tofiga e lua, mo le puipuiga o tuaoi a le Teritori, ma le fa’amautuina o le malu puipuia o le mamalu lautele.

Na faapea ona toe saunoa le Afioga i le Senatoa mai i le itumalo o Sua, i le suiga o faatulagaga a le malo feterale, ma ofisa ua faatulagaina e le Faigamalo a Trump, lea ua avea ai nei le Ofisa o Tiute ma se vaega o le Homeland Security.  Ma na fia malamalama Togiola, pe le tatau ona faia foi e Amerika lea tulaga, e fa’amalosia atili ai le puipuiga o ona tuaoi ma le puipuiga o le mamalu lautele.

Sa fa’aalia e le sui Faatonu lona lagolagoina o se fuafuaga faapea, ae sa ia faamamafa mai le pa’u o lea fa’ai’uga i luga o le Kovana.

Na saunoa Togiola i ona atugaluga e tusa ai ma le tilotilo o le ofisa a le DHS i na’o fa’afitauli e a’afia ai vaega o fualaau faasaina, aemaise o le galulue faatasi ma vaega su’esu’e faavaomalo, e pei o le Interpol ma SPICIN (South Pacific Island Criminal Intelligence Network), e faamalosia ai puipuiga faavaomalo.  

Sa tapaina e Togiola se manatu a le sui Faatonu, lea na saunoa ai Vaetagaloa, o lo’o iai se ofisa a le DHS e ta’ua o le ‘Fusion Center’, e gafa ma le a’apa atu i ofisa leoleo eseese, e aofia ai le Interpol ma le FBI, faapea ma isi vaega su’esu’e.  Ma sa saunoa Vaetagaloa, e le’i iai sona avanoa e Iloilo auiliili ai tulaga o feso’ota’iga ma le faagasologa o tiute a ia ofisa. 

Ae sa ta’ua e Vaetagaloa o lo’o ua agava’a lo latou ofisa, e faatinoina ia tiute.

Sa ia fa’ailoa atu foi i Afioga i Senatoa, o le a ia fa’amuamua lea itu e pei ona sa faaleoina, ma ia faamautuina lona aoga i totonu o Amerika Samoa, talu ai ona e na o le  pau lenei o le teritori a le Iunaite Setete i le itu i saute.

Na saunoa Togiola i se fuafuaga a Trump ina ia fa’aitiitia tagata faigaluega a ofisa leoleo feterale, e pei o le FBI ma ia fesiligia ai le sui Faatonu pe ua saunia mo lea tulaga, ma po o fea o le a maua mai ai fesoasoani masani a le DHS.

Sa ta’ua e Vaetagaloa, o le masina o le a ia malaga atu ai i Honolulu e fono ma le DHS i Honolulu, e talanoaina ai auala  o le a mafai ona fesoasoani mai ai a latou pa’aga, pe afai ae tupu lea tulaga.

Na fesiligia e le Afioga i  le Senatoa ia Tuanaitau Malaki Togiola ia le sui Faatonu i le aofaiga o vaega o fualaau faasaina sa mafai ona aoina e le Ofisa o Tiute, a’o i lalo o lana taitaiga.  Na tali le sui Faatonu, e pe a ma le fa’asefulu ona aoina e le latou ofisa ia vaega o fualaau faasaina, tauala mai i le polokalama o taifau faapitoa, faapea ma le meli.

Sa faatula’i e le Afioga i le Senatoa ia Levu Iosia ia tulaga i osofaiga i  le Ofisa o Tiute i Tafuna, lea sa gaoia ai ni a’upega.  Na ta’ua e le Afioga i  le Senatoa, i sona malamalama’aga, a ao e le Ofisa o Tiute ia a’upega, e tatau ona fa’ao’oina atu nei a’upega i  le ofisa a leoleo.

Na saunoa Vaetagaloa, e na te le o mautinoa le fa’agasologa o lea tulaga i le taimi nei.  Ae peitai, i lona vaitaimi, o le tulafono lea sa iai, o le tau’a’aoina o a’upega i le Ofisa o Leoleo, ae le’i atoa aso e lima talu ona taulimaina e le Ofisa o Tiute.

Na talosagaina e le Afioga i le Senatoa ia Ma’o Faauma Gogo ia le faatinoina vave o su’esu’ega o tala’aga a tagata faigaluega, ona o le faatuai mo tagata saili galuega.

Sa fa’aalia e Afioga i Senatoa lo latou ‘aufa’atasi i le fuafuaga mo le tu’uina atu o le Ofisa o Tiute, lea o lo’o i lalo o le Ofisa o Tupe i le taimi nei,  i lalo o le va’ava’aiga a le DHS.  Na saunoa nisi o Afioga i Senatoa, i nisi o tagata faigaluega o le Ofisa o Tiute ua faapea ona talia tupe e fa’ataga ai le ulufale mai o fualaau faasaina i totonu o le teritori.

Sa saunoa le Peresetene o le Senate, le Afioga Tuaolo Manaia Fruean, o Vaetagaloa o se alo e faasino i le Afioga ia Lefiti Fa’afetai lea ua fa’ilagi le folauga, ma sa avea ma Peresetene o le Senate mo sina taimi le tumau.

Ma na faaleoina e le afioga i le Peresetene lona fiafia tele i le va’ava’ai atu i alo ma fanau o le atunu’u ua filifilia e avea ma taitai i totonu o le malo.  Sa faapea ona fa’aluaina e le Afioga i le Senatoa ia Muagututia M.T. Tauoa, ia le saunoaga a Tuaolo.

I se taimi mulimuli ane, na pasia ai e le Senate ia le tofiga a VAetagaloa, i se palota 16-0.