Pago Pago - AMERIKA SAMOA

O le aso Tofi o le vaiaso ua mavae, Fepuari 1, 2024, na pasia ai e le maota o le Senate le avea o le afioga Asaua Falaniko Fuimaono ma Loia mo tagata lautele, i se palota 14-0.

I sana tusi sa tusia i le aso 5 o Ianuari, 2024, i le Peresetene o le Senate, le afioga Tuaolo Manaia Fruean, sa ta’ua ai e le afioga i le kovana ia Lemanu P. S. Mauga e faapea, o le afioga i le Loia ia Fuimaono, o se loia ua lauiloa i totonu o Amerika ona o lana tautua, ua silia ma le 40 tausaga.

E le gata i lea, na ta’ua e le afioga Lemanu le avea o Fuimaono ma sui Loia mo tagata lautele, talu mai Setema 2023 ma na avea foi ma loia i totonu o le ofisa o le loia sili i lana faigamalo.  Sa faapea foi ona galue le afioga Fuimaono i le ofisa loia mo le mamalu lautele (U’una’i Legal Services & American Samoa Legal Aid).

Aemaise ai le loa o lana tautua ma lona tofa ma le faautaga loloto, i le faatinoina o tiute i totonu o faamasinoga ma ua agava’a ai o ia e avea ma Loia mo tagata lautele.

I le taimi o lona iloiloga i luma o le Senate, sa fa’afeiloai ai e le Taitaifono o le Komiti o Faamasinoga, le afioga i le Senatoa ia Soliai Tuipine Fuimaono ia le afioga i le alii Loia ma ia faaleoina le agaga fa’afetai ona o lo o tulai mai e faafoeina le galuega, i totonu o le Ofisa Loia mo tagata lautele, aemaise i lenei vaitaimi o feagai ma faafitauli i le tau sailiga mai o ni loia.

Sa tu’uina atu e Soliai ia le avanoa i le afioga i le Peresetene o le Senate, lea sa saunoa i le agava’a o le Loia fou mo le faatinoina o lenei tiute, ma o le a faapea ona pasia e le Senate lona tofiga fou.

Ae peitai, ae e le i pasiaina Fuimaono, e tasi se fesili na fesiligia ai o ia e le Peresetene o le Senate, o le tulaga lea i le tau leai o ni loia o lo o galulue i totonu o le Ofisa Loia mo tagata lautele, faapea ai ma le faafitauli i le tau aumaia o ni loia fou mai i fafo.  Na fia malamalama Tuaolo pe o le a aumai e Fuimaono ia le alii loia ia Fa’aolesa Katopau Ainu’u lea foi na avea ma loia i totonu o le teritori, ae le’i malaga atu ma fa’amautu i Samoa i le 2008.

O le afioga ia Ainu’u na avea ma loia i Amerika Samoa nei faapea Samoa tuaoi ma sa pulea foi e ia le nusipepa o le Samoa Post.

I le 2008 na molia ai Ainu’u i le gaoi ma le faia o tulaga taufa’asese, ina ua masalomia o ia i lona aveina o se tinoitupe e $5,000 mai i se tagata, ae na te le i faatinoina ona tiute faaloia mo lea tagata.  Sa iai se tusi saisai mo Ainu’u, ae peitai, e le i fa’ao’oina atu ia te ia, ma i le tausaga e 2016, na toe fa’aleaogaina ai lenei mataupu.

O le 2016 lava lea na filifilia ai o ia e avea ma Minisita o Faamaisnoga, i totonu o le Palemene a Samoa, ae i le 2021 na faoa ai lona nofoa.

Sa ta’ua e Tuaolo, o lea ua le o toe avea Fa’aolesa ma Minisita i totonu o le Palemene  a Samoa, atonu e mafai ona u’unaia e toe foi mai i le teritori, e fesoasoani i le faafitauli o tulai mai nei i totonu o le Ofisa Loia mo tagata lautele.

Na tali mai Fuimaono, e manaomia ona soalaupuleina lenei mataupu ma le afioga i le Faamasino Sili.

I le masina o Setema, 2023 na avea ai Fuimaono ma sui Loia mo tagata lautele, ina ua maliu le susuga ia Dave Vargas lea na fa’auluulu iai lea ofisa, ia Setema 12, 2023.  Mo sina taimi puupuu, sa na o Fuimaono na galue i totonu o lea ofisa, ae e pei ona ta’ua i totonu o le lipoti Auiliili a le Faigamalo mo le 2024, e tolu nisi loia sa tagataga’i iai lea ofisa loia, e faaopoopo atu i le amataga o lenei tausaga.

I le pasiaina o Fuimaono, ua avea nei o ia ma Loia o le Ofisa Loia mo tagata lautele, faatasi ai ma ni ana loia fesoasoani e toalua.  Ae ua ta’ua i le lipoti auiliili a le Faigamalo, o lo o tau saili mai ni isi loia, ina ia atoa ai loia e ono (6) mo lenei ofisa, faapea ma ni tagata su’esu’e/faaliliu upu, se to’alua (2).