Pago Pago - AMERIKA SAMOA

Ona o le tele o faafitauli ua maitaulia e afioga i Senatoa, i le so’ona fa’aaluina e le Faigamalo o tupe e le i fa’asoasoaina pe e le i paketiina, ua mafua ai ona faaulufaleina e afioga i Senatoa ia se i’ugafono, ‘e suia ai matafaioi a le kovana o Amerika Samoa i le fa’agasologa o paketi, e manaomia ai le faasoaina e le Fonofaitulafono o so’o se tupemaua sa le’i faamoemoeina’.

I le mae’a ai o se iloiloga a le Senate, i le $40 miliona lea sa fa’aalu e le malo i le tausaga faaletupe o le 2023, na sili atu ma le tupe sa paketiina, na toe o’o atu ai le Teutupe a le Malo, le susuga Malemo Tausaga ma le Faatonusili o le Ofisa o Paketi a le malo, le faletua ia Catherine Saelua, i luma o le Komiti o Paketi ma Tupe Faasoasoa, a le Senate, i le taeao o le aso Gafua na se’i mavae, mo le soalaupuleina o lenei i’ugafono taufa’aofi.

E tusa ai ma le Faatomu’aga o lenei i’ugafono, ua ta’ua ai le ‘silafia o le taua tele o le matafaioi i le pulea o tupe mo le fa’agaoioia o le malo, ma le fa’ailoaina o le agalatatau ona faamaonia le malamalama o le fa’aaogaina o tupe sa le’i faamoemoeina mai puna’oa eseese, e aofia ai le lotoifale, o le malo tele, ma isi.”

“I le malamalama ai i le fatuaiga taua a le fonofaitulafono I le vaaia o tupe fa’aaoga ina ia malupuipuia ai manaoga o le lautele”.

“I le tuliloaina ai o isi faamoemoega lelei, ua alagatatau ai ona sui tulafono o lo o iai nei, ina ia fa’ao’o mai le Kovana se pili o tupe fa’asoa mo le iloiloina e le fonofaitulafono a’o le’i o’o ina fa’aaoga tupe e sili at unai lo lea sa mua’i fa’asoaina”.

“I le fa’ailoa ai foi o le manaoga ina ia fa’agafua mataupu mo faalavelave fa’afuasei e pei ona poloa’ia e le Kovana, e moomia ai se gaioiga vave ona o le puipuia o le saogalemu lautele, o le soifua maloloina po o le soifua manuia”.

Ina o faagasolo le iloiloga, sa faapea ona fesiligia e le Taitaifono o le Komiti, le afioga Senatoa Utu Sala Poasa ia le paleni o le vaegatupe a le malo, o le ‘Stabilization Fund’ lea sa faavaeina i le amataga o le 1980.

Sa tali le faletua ia Saelua, talu lava ona avea o ia ma Faatonusili o le Ofisa o Paketi, e le o toe iai se tupe o teuina i lea teugatupe e pei ona faatonuina mai i le tulafono, pe afai o iai ni tupe faasili.

Sa fia malamalama po o le a le paleni o lea vaegatupe ona o lo o faatulafonoina, le tatau ona teuina ai le $200,000 mai tupe faasili, i tausaga uma, seia atoa le $10 miliona, ona fa’asoasoaina lea o lenei tupe mo faalavelave faafuasei.

Na toe faaleoina e Saelua e faapea, na talu lava ona tulai mai i lona tofiga faaletaitai, e leai se tupe o toe teuina i totonu o lea vaegatupe ma i sona malamalama iai, e le o toe iai se tupe, i totonu o lea ‘account’.

Sa fa’aalia e Utu lona atugalu e tusa ai ma lenei tulaga, ma ia fa’aalia le faalagolago o le mamalu lautele i le faatonusili o le ofisa o tupe faasoasoa ma le teutupe, e la te mataituina le fa’aaogaina o tupe a le malo, ina ia iai se tupe e avanoa e fesoasoani ai i taimi o fa’alavelave fa’afuasei ma taimi o faalavelave faalenatura.

Na faapea foi ona toe faamanatu atu e le afioga i le Peresetene o le Senate, Tuaolo Manaia Fruean, ia Saelua, o lenei iugafono taufa’aofi, e manaomia ai le pasiaina e le Fono mo tupe lotoifale, feterale ma isi.  Sa ta’ua foi e Tuaolo le le’i fa’ao’oina mai o tupe a le ARPA i le Fono, ae e le’i fa’aaogaina, ma o lea tulaga, na saunoa ai Tuaolo, o le a le toe tupu mai, pe a pasia lenei i’ugafono.

 E tusa ai ma le faaopoopoga o le Maga 10.0502 i totonu o le iugafono taufa’aofi, ua ta’ua ai e faapea, “A o le’i fa’asoaina pe fa’aaogaina foi so’o se tupe mai tupe maua sa le’i faamoemoeina, e sili at unai lo lea na mua’i fa’asoaina, e tatau ona fa’ao’o atu e le Kovana se pili tupe i le Fono Faitulafono e fa’ailoa manino ai le mea o lo o faamoemoe e fa’aaoga ai tupemaua sa le’i faamoemoeina ma ia auiliili mai ai le fa’aaogaina”.

“O tupemaua sa le’i faamoemoeina, e aofia ai tupe mai totonu o le lotoifale, o le feterale, po o isi puna’oa e ese mai ai i mea sa mua’i fuafuaina’.

“O le a Iloilo e le Fono Faitulafono ma faamaonia, suia, pe te’ena foi le pili i luga o taualumaga faafono”.

Na pasia lenei i’ugafono taufa’aofi i lona faitauga faalua, i totonu o le Maota o le Senate.

FA’AMALAMALAMA’AGA AUILIILI

O pili mo paketi, pe a faaulufaleina ma pasia i tausaga faaletupe taitasi, e iai sona vaega o lo o faamalamalama mai ai ‘tupemaua sa le’i faamoemoeina’ ma le faatulafonoina o le faasoasoaina e le Fono Faitulafono.  Ae peitai, e le i taofia mai ai le faaaogaina o lea tupe e le Faigamalo, e aunoa ma le pasiaina mai e le Fono, ae e leai foi seisi ua faate’aina pe ua molia i le fa’aaogaina o ia vaegatupe.

Ma o lo o iai foi se faafitauli o lo o tulai mai, i le tofutofusia o Faigamalo ma a latou faauigaina o ‘tupemaua sa le’i faamoemoeina’  - o nisi taimi, o ‘tupemaua e le i faamoemoeina’, o tupe sa maua i su’egatusi, po o tupe e le i faasoasoaina i le tausaga faaletupe, e faatatau i teugatupe uma a le malo, i ona matagaluega ma ofisa eseese, ae le faapitoa i se teugatupe e tasi, e pei o le ‘General Fund’.