Pago Pago - AMERIKA SAMOA

Ua pasia mai nei e le malo o Amerika Samoa ia le toe faaopoopoina o tausaga i se fanua lisi mo le Asosi Soka a Amerika Samoa (FFAS) i Tafuna, ma o lea faaopoopoga na faapea ona sainia i le aso 31 o Oketopa, 2023.

O le umi o lenei lisi, sa muamua ona tu’u i le iva tausaga, masina e 11 ma aso e 29, e amata atu ia Tesema 1, 2023 ae faamutaina ia Novema 27, 2033, ae peitai, i se tusi mai i le afioga i le Sui Kovana ia Talauega E. V. Ale, ia Novema 6, 2023 na faaooina atu i le Peresetene o le Senate, le afioga Tuaolo Manaia Fruean, sa ta’ua ai e Talauega le lava o le taimi na faaoo atu ai le fanoga a le FFAS mo le faaopoopoina o tausaga i le latou lisi.  Ina ia lisi mo le 55 tausaga, lea e faamutaina i le aso 30 o Novema 2078.  Ma ua taliaina e le sui Kovana ia lea talosaga.

O lenei mataupu sa muai ta’ua i se fesootaiga i le va o le afioga i le Kovana Sili ia Lemanu P. S. Mauga ma le Fofoga Fetalai o le Maota o Sui, el afioga ia Savali Talavou Ale, ia Novema 1, 2023, lea na suia ai e le kovana ia se Valaau mo le uluai tauaofiaga faapitoa i le nofoaiga lona 38 a le Fono Faitulafono.

I lea tusi, sa ta’ua ai e le afioga Lemanu le tatalaina o le uluai tauaofiaga faapitoa i le aso Gafua, Novema 13, 2023 i lalo ifo o le 10 aso faalekalena ma o mataupu o le a iloiloina ai, e aofia ai le fa’aaogaina o le $3,100,000 mai i tupe aoina mai i le tausaga tupe o le 2022 mo le tupe faaopoopo o le tausaga tupe o le 2024. 

E le gata i lea, o le a iloiloina ai foi se talosaga mai i le Faigamalo mo le fa’aaogaina o le $36,000,000 mai i tupe faasili sa aoina, e faaopoopo i le paketi o le tausaga tupe 2023.  Atoa ai ma le lisiina o se fanua pe a ma le 5.3 eka, i le fanua #3 i Tafuna, i le asosi soka a Amerika Samoa (FFAS).

I se faatalanoaga ma le peresetene o le FFAS i le amataga o le tausaga, na saunoa ai Fai’ivae Iuli Godine, i le amataga o la latou soalaupule ma le faigamalo mo se fanua mo le latou asosi, sa amata mai i sina fanua i tafatafa o le Stadium i Tafuna, ae peitai, o lea ua tatala mai se fanua atoa e mafai ona fau ai se ‘stadium’ mo polokalama a le latou asosi, e aofia ai ma ni fale mo ‘au e asiasi mai i atunuu i fafo.

Ae peitai, na saunoa Fai’ivae, o se suiga lata mai nei mai i taitai o le malo, ua toe vaeluaina ia le fanua tele lea sa tu’uina mai e le malo mo le latou asosi.  O le fanua lea e pito mai i luma o le auala, o le a fa’aaoga e le malo, ae o le fanua o le a fa’aaoga e le asosi soka, o lo o pito i totonu.  Ma na saunoa Fai’ivae, o se tulaga na tulai mai ai se suiga tele i fuafuaga a le latou asosi, ona sa iai se faamoemoega, o se meaalofa lea a le asosi mo fanau o le lumanai, e le gata i lenei fa’agatama ae mo isi fa’agatama, o le a mafai ona fa’aaogaina lea fanua.

Ae e pei ona saunoa le Peresetene o le FFAS, e le fai loto seisi i fuafuaga a le malo.

E ui i lea suiga, na fa’aalia e le afioga Fai’ivae lona agaga faafetai i le malo mo lenei fanua ua maua.  Ma e lata i le $5 miliona lea ua atofaina mo lenei galuega tele.  Ma e pei ona saunoa mai foi le CEO a le FFAS, le susuga Tavita Taumua, o le a amataina lenei galuega, i le taimi lava e pasiaina mai ai e le Fono le faaopoopoina o le latou lisi.