Patipatia e le Faipule a Swains ia le pasiaina o le HR 6062 ma lana faamaninoga i le mafuaaga na ia tete’e ai
Pago Pago - AMERIKA SAMOA
O le aso Tofi, Ianuari 16, 2025 na amata aloaia ai e le Failautusi o le Initeria ia le suiga e pei ona pasia e tagata palota o Amerika Samoa, i le 2022 (Constitutional Referendum). Ma ua mafai ona tino mai lenei faamoemoega, ona o le u’una’i malosi a le sui Faipule o Amerika Samoa i totonu o le Konekeresi, le Afioga Uifaatali Aumua Amata ma lana aufaigaluega, ina ia pasia le pili taufa’aofi, HR 6062, i le tauaofiaga lona 118 a le Konekeresi.
Ma o le a va’aia foi le taua o lenei pili, i le faamanatuina o le 100 tausaga talu ona pasia e le Konekeresi a Amerika, ia le avea o le motu o Swains ma se vaega o Amerika Samoa, ia Mati 4, 1925.
Na fa’aalia e le Faipule a Swains, le susuga ia Su’a Alexander Eli Jennings, ia lona agaga fa’afetai i sui o le ‘Constitutional Convention 2022’ ma tagata o Amerika Samoa ma Swains, mo le pasiaina o fa’ao’opoopoga e lima i le faavae, i le Referendum 2022.
Sa ta’ua e Su’a le fa’aalia o lagona a tagata palota, ina ua o latou palota ina ia tu’uina le agava’a i le Faipule a Swains, e mafai ai ona auai i palotaga i totonu o le Maota Fono, mo le ulua’i taimi, talu mai tausaga e 63.
E le gata i lea, sa ia fa’aleoina le agaga fa’amalo i le sui Faipule a Amerika Samoa, le Afioga Uifaatali ona o le pasiaina o lana pili (HR 6062) lea ua ave’esea ai se vaega o le Faavae a Amerika Samoa, lea sa na’o le Konekeresi e mafai ona faia se suiga po o se fa’aopoopoga i le Faavae, e pei ona aofia i totonu o le I’ugafono a le Senate 38-28 lea na pasia ia Oketopa 2, 2023.
Na fa’alauiloa mai foi e Su’a e faapea, talu ona avea o ia ma Faipule o Swains i le 2005, sa galue malosi ina ia mafai ona maua e tagatanu’u o Swains faapea tupulaga faia’e o Swins, ona faamanuiaina i aia tatau e tasi, e pei ona uima e tagatanu’u uma o Amerika Samoa.
Ma na fa’aalia foi e Su’a, o ia o se tasi na tete’e i le HR 6062. Na ia faamanino mai e faapea, e na te le’i faia lea tulaga, ona o se agaga tete’e i taumafaiga a le Afioga Uifaatali po o taitai o le malo. E le i iai foi ia te ia se agaga e faia se tulaga e ono afaina ai puipuiga faaleaganu’u o lo’o ‘ae’ae ai nei Amerika Samoa ma Swains, i lalo o le Tulafono. Pe na iai foi se lagona e fa’atelegese ona pasia faaopoopoga i le Faavae.
Ae na pau le agaga sa ia te ia, o se agaga fia faamanino le le tutusa o puipuiga i fanua ma aganu’u, i totonu o lenei pili. Ma o le taofia o le aia tatau e palota ai i totonu o le Fono Faitulafono mo le lata i le 65 tausaga, ua na’o sina vaega laititi i le fai tutusa o le motu o Swains.
Na ta’ua foi e Su’a e faapea, e ui ina sa auai i le Fonotele tau i Faavae i le 2022 (Constitutional Convention 2022) ma malaga atu i le laumua i Uasigitone e molimau i luma o le Konekeresi, faapea ma feutagaiga ma le tele o sui o le Konekeresi, aemaise o le apili mulimuli i le Peresetene o Amerika, ina ia taofiofi lenei pili, ae peitai, e le’i amanaiaina finagalo fa’aalia a Swains ma faapea ai ona pasia e le Konekeresi ia le HR 6062, i se palota autasi mai i maota e lua, ma pasia ai e le peresetene ia Ianuari 4, 2025.
Ae peitai, o se faamanuiaga i lea taumafaiga, ona o lo’o ua fa’amaumauina uma nei tulaga i totonu o fa’amaumauga a le Konekeresi, mo so’o se tulaga po o so’o se tasi, i le lumanai.
O le Faavae o le 1960 ma le 1967 sa maua ai e Swains ia se nofoa i totonu o le Maota Fono ma maua uma ai e Faipule ma Senatoa ia le malosiaga e palota ai, seia vagana ai le sui mai I Swains.
O lea gaioiga na tu’u’esea ai Swains mai ia Amerika Samoa mo le ulua’i taimi, talu ona avea mai le 1925 ma tu’uina atu ai i lalo o le pule’aga a le Matagaluega o Fuava’a a Amerika.
E aunoa ma se malosiaga e palota ai, na le mafai e Swains ona puipuia ona aia tatau, e aofia ai le puipuiga o ona fanua ma aganu’u, i lalo o le Faavae.
Ae peitai, i le pasiaina o le HR 6062 ma le ave’esea o aiaiga o se Iloiloga Faakonakeresi, ua mafai e le Afioga i le sui Faipule ia Uifaatali ma taitai o le malo, ona alo’ese mai i le fesili sa fa’aauau pea ona fesiligia i le Fonotele tau i Faavae o le 2022 (Constitutional Convention 2022), pe aisea na le maua ai e le Faipule a Swains ia le aia e palota ai i totonu o le Fono, i le silia ma le 63 tausaga.
E aunoa ma se tali i lea fesili, sa faapea loa ona pasia e sui uma o le Fonotele, i se palota e 73 ioe, 43 leai, ma pasia e tagata o Amerika Samoa i lona fa’alauiloa muamua i le Referendum 2022.
Sa ta’ua foi e le Afioga i le Faipule a Swains, o le faaopoopoga mo Swains faapea ma isi faaopoopoga e 4, ana le seanoa le pasiaina e le Konekeresi, semanu e le aloaia. Ma sa iai se popolega i le Afioga Uifaatali, Kovana Lemanu ma taitai o le Maota Fono, o le a ono a’afia ia fanua ma tulaga fa’amatai a le atunu’u, pe afai ai iloiloina e le konekeresi ia le Faavae o le teritori.
Na iai foi so latou talitonuga, o le a mafai e le HR 6062 ona ave’esea ni atugaluga e fa’atatau i elemene o le fa’aSamoa, puipuia i lalo o tulafono lotoifale, e le o gatasi ma le Faavae a Amerika.
Sa ta’ua e Su’a, le faanoanoaga o le le’i pasiaina o le HR 6062 i le Constitutional Convention 2022, e maota uma e lua a le Fono, po o tagata o Amerika Samoa i le Referendum 2022. Ma na fa’atula’ia ai se atugaluga sili atu i le faatulagaina o se auala fou i le suiga o la tatou Faavae e taitai palotaina, e aunoa ma se faatagana mai i tagata o Amerika Samoa.
O le tulaga e faamaualuga ai tele Amerika Samoa ma Swains, i teritori uma a le Iunaite Setete, o le tulaga ese o puipuiga faaletulafono o ona fanua faapea tu ma aganu’u.
Ae peitai, ua fa’amalosia Swains e tau’ave le tiga o le tu’u’esea . O le Tulafono o lo’o faamalosia ai le puipuiga o fanua ma aganu’u mo Tutuila ma Manu’a, e puipuia ai foi Swains, i luga o pepa. Ae i lona faatinoga, e le o tutusa mo Swains.
O le ave’esea faamalosi o tagata a Swains i le silia ma le 150 tausaga, e pei ona saunoa Su’a, e mafua ona o tulaga faaletonu i le atina’eina o le motu, e aofia ai tulaga o femalagaiga ma tautua manaomia, e pei ona faatupeina e le malo feterale ma le malo lotoifale, mo Amerika Samoa atoa, ona ua na o Tutuila ma Manu’a ua fa’amanuiaina ai.
Ua fa’alauiloa mai foi e le Faipule a Swains, pe afai ai faia se ripoti o tala o le tupe i tausaga e 30 ua mavae atu, o le a fa’aalia ai le leai o se fesoasoani tau tupe feterale pe lotoifale, sa fa’aagaga mo Swains, e aofia ai foi ma le tala o le tupe a le malo mo le 2025, lea sa le’i mafai ona ia palota ai, e ui ua atoa le lua tausaga talu ona pasia le faaopoopoga e mafai ai ona palota ia le Faipule a Swains i totonu o le Maota Fono.
Ma ua taofi le afioga Su’a, o le mafuaaga lea ua leai ai ni tagata o totoe i totonu o Swains, ina ua tu’ua e ona toe tagata ia le motu i le 2013.
Na ta’ua e le Faipule mai Swains ia se saunoaga a le kovana malolo ia Lemanu P.S. Mauga, i le tatalaga o le Fono i le 2024, lea sa ia ta’ua ai le leai o ni isi o toe nonofo i Swains ona ua le faataunu’uina e le malo lo latou tiute mo le faamautuina o femalagaiga, feso’otaiga ma isi alagamanuia e manaomia e tagata ona nonofo ai i Swains.
Ma na ta’ua ai foi e Lemanu se popolega, o le a faapea foi ona tupu lea tulaga i Manu’a. Ma sa ia ta’ua ai le maligi o ona loimata i sana asiasiga i Manu’a ina ua vaaia tagata o Manu’a i le uafu i Faleasao, e fe’ausi agai i le va’a e la’u mai a latou uta i le pa’u matu, ina ua le mafai ona ofi atu le va’a i le ava.
Ua talitonu le Afioga Su’a, o le ‘ese’esega o Swains ma Amerika Samoa, ua mou atu. Ma e ui ina o se amataga lelei le palota i totonu o le Maota Fono, ae o lea ua o latou fa’amoemoe i le Ofisa o le initeria e iloiloina isi vaega o le Faavae o Amerika Samoa, o lo’o fa’ailoga tagata faasaga ia Swains, pe a faatusatusa ia Tutuila ma Manu’a.
O lana tatalo, o le a mafai, tauala atu i le palota i totonu o le Maota Fono ona finau Swains mo ona aia tatau. Ma sa fa’aalia e le Afioga i le faipule lona taga’i ma le faamoemoe maualuga, i leisi 100 tausaga o i luma, pe sili atu foi, ona aloaia lenei Teritori, o se vaega o Amerika Samoa (motu i Sasa’e o Samoa talu mai le 1900) ma Swains (faaopoopo ese atu ma avea o se vaega o Amerika Samoa e le Konekersi i le 1925).